വിളക്ക്‌

അദ്ധ്യായം 65 - സൂറത്തുത്വലാഖ്

2012-01-22T15:46:00.000+04:00

سورة الطلاق

മദീനയിൽ അവതരിച്ചു - സൂക്തങ്ങൾ12

بسم الله الرحمن الرحيم

പരമകാരുണികനും കരുണാനിധിയുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

يَا أَيُّهَا النَّبِيُّ إِذَا طَلَّقْتُمُ النِّسَاء فَطَلِّقُوهُنَّ لِعِدَّتِهِنَّ وَأَحْصُوا الْعِدَّةَ وَاتَّقُوا اللَّهَ رَبَّكُمْ لَا تُخْرِجُوهُنَّ مِن بُيُوتِهِنَّ وَلَا يَخْرُجْنَ إِلَّا أَن يَأْتِينَ بِفَاحِشَةٍ مُّبَيِّنَةٍ وَتِلْكَ حُدُودُ اللَّهِ وَمَن يَتَعَدَّ حُدُودَ اللَّهِ فَقَدْ ظَلَمَ نَفْسَهُ لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرً ا(1

നബിയേ അങ്ങ് ഭാര്യമാരെ വിവാഹ മോചനം നടത്തുന്നതായാൽ ഇദ്ദക്കാലത്തിനു (കണക്കാക്കി)അവരെ വിവാഹ മോചനം നടത്തുകയും ഇദ്ദയെ എണ്ണിക്കണക്കാക്കുകയും ചെയ്യുക നിങ്ങളുടെ രക്ഷിതാവായ അള്ളാഹുവെ സൂക്ഷിക്കുക അവരുടെ ഭവനങ്ങളിൽ നിന്ന് അവരെ നിങ്ങൾ പുറത്താക്കരുത് അവർ പുറത്തു പോവുകയും ചെയ്യരുത് വ്യക്തമായ വല്ല നീച വൃത്തിയും അവർ കൊണ്ടുവന്നാലല്ലാതെ.(അപ്പോൾ പുറത്താക്കാവുന്നതാണ്)അതെല്ലാം അള്ളാഹുവിന്റെ നിയമ പരിധികളാണ് അള്ളാഹുവിന്റെ നിയമ പരിധികൾ ആരെങ്കിലും വിട്ടുകടക്കുന്നതായാൽ അവൻ സ്വന്തത്തോട് തന്നെ അക്രമം പ്രവർത്തിച്ചു നിനക്കറിയില്ല അതിനു ശേഷം അള്ളാഹു വല കാര്യവും പുതിയതായി ഉണ്ടാക്കിയേക്കാം

ത്വലാഖ് എന്നാൽ വിവാഹ മോചനം എന്നാണ്. ഇവിടെ നബി(സ)യെ അഭിസംബോധന ചെയ്ത് കൊണ്ട് വിവാഹ മോചന സംബന്ധമായും മറ്റും മുസ്ലിം സമുദായം ആചരിക്കേണ്ട പല നിയമങ്ങളും അള്ളാഹു വിവരിക്കുകയാണ്.ഭർത്താവുമായി വിവാഹ ബന്ധം വേർപെട്ട സ്ത്രീ മറ്റൊരു ഭർത്താവിനെ സ്വീകരിക്കുന്നതിനു മുമ്പായി നിർബന്ധമായും അവൾ കാത്തിരിക്കേണ്ട കാലത്തിനാണ് ഇദ്ദ(ദീക്ഷാ കാലം)എന്ന് പറയുന്നത്

എണ്ണം എന്നർത്ഥമുള്ള ‘അദദ്’ എന്നതിൽ നിന്നാണ് ,ഇദ്ദ, എന്ന പദം ഉരിത്തിരിയുന്നത് സാധാരണഗതിയിൽ ആർത്തവങ്ങൾക്കിടയിൽ വരുന്ന ശുദ്ധികളുടെ എണ്ണത്തെയും മാസങ്ങളുടെ എണ്ണത്തെയും അടിസ്ഥാനമാക്കിയാണ് ഇദ്ദ ആചരിക്കുന്നത് എന്നതാണ് പ്രസ്തുത നാമകരണത്തിന്റെ കാരണം.ഗർഭാശയം ഗർഭമുക്തമാണെന്ന് അറിയാനോ തഅബ്ബുദി(പൊരുൾ ഗ്രാഹ്യമല്ലാത്ത മത ശാസന)യായോമരണപ്പെട്ട ഭർത്താവിനെക്കുറിച്ചുള്ള ദു:ഖ സൂചകമായോ നിശ്ചിത കാലം കാത്തിരിക്കുന്നതാണ് ഇസ്ലാമികമായി ഇദ്ദ. ഭർത്താവ് മരണപ്പെട്ടാലുള്ള ഇദ്ദ നാലു മാസവും പത്ത് ദിവസവുമാണ് സംയോഗം നടക്കുന്നതിനു മുമ്പേ ബന്ധം വേർപെടുത്തിയാൽ ഇദ്ദ ആവശ്യമില്ല .ഗർഭിണികൾ വിവാഹ മോചനം ചെയ്യപ്പെട്ടാലുള്ള ഇദ്ദയും ആർത്തവമുണ്ടായിട്ടില്ലാത്തവരുടെയും ഉണ്ടായിരുന്നതിനു ശേഷം ആർത്തവം നിലച്ചവരുടെയും ഇദ്ദയുടെ വിശദാംശം ഈ അദ്ദ്യായത്തിലെ നാലാം സൂക്തം വിശദീകരിക്കുന്നുണ്ട്.മരണത്തിനാൽ വരുന്ന ഇദ്ദയും ആർത്തവം നിലച്ചവരുടെ(ആർത്തവം തീരേ ഉണ്ടാവാത്തവരുടെയും)ഇദ്ദയും ഗർഭിണിയുടെ ഇദ്ദയും നിശ്ചിത സമയം നിലനിൽക്കുമ്പോൾ ആർത്തവം ഉണ്ടാവുന്ന സ്ത്രീയുടെ ഇദ്ദ മൂന്ന് ശുദ്ധിയാണെന്ന്

وَالْمُطَلَّقَاتُ يَتَرَبَّصْنَ بِأَنفُسِهِنَّ ثَلاَثَةَ قُرُوَءٍ

വിവാഹ മോചനം ചെയ്യപ്പെട്ട സ്ത്രീകൾ തങ്ങളുടെ സ്വന്തം കാര്യത്തിൽ മൂന്ന് മാസമുറകൾ കഴിയുന്നത് വരെ കാത്തിരിക്കേണ്ടതാണ് ,

ഖുർആൻ വിശദീകരിച്ചിട്ടുണ്ട് (2/228)

രണ്ട് ആർത്തവങ്ങൾക്കിടയിലോ ഒരു ആർത്തവത്തിന്റെയും പ്രസവ രക്തത്തിന്റെയും ഇടയിലുള്ളതോ ആയ ശുദ്ധിഘട്ടമാണ് ഒരു ഖുർഅ് (ശുദ്ധി) അപ്പോൾ മുമ്പ് ആർത്തവമുണ്ടായിട്ടില്ലാത്ത സ്ത്രീ ഥ്വലാഖ് ചൊല്ലപ്പെടുകയും തുടർന്ന് ആർത്തവമുണ്ടാവുകയും ചെയ്താൽ ഥ്വലാഖിന്റെ സമയത്തുള്ള ശുദ്ധി ഖുർ അ് ആയി പരിഗണിക്കപ്പെടുകയില്ല.കാരണം അത് രണ്ട് ആർത്തവങ്ങൾക്കിടയിൽ വന്ന ശുദ്ധിയല്ല.ഥ്വലാഖിനെ തുടർന്നുള്ള ആർത്തവത്തിനു ശേഷം ഇദ്ദ പരിധി അവസാനിക്കാൻ മൂന്ന് ശുദ്ധികൾ അനിവാര്യമാണ് നേരത്തേ ആർത്തവമുള്ളവർക്ക് ശേഷിക്കുന്ന ശുദ്ധിയും പൂർണ്ണ ശുദ്ധിയായി കണക്കാക്കപ്പെടും.അപ്പോൾ ശുദ്ധി സമയത്തിൽനിന്ന് ഒരു നിമിഷം ശേഷിക്കുമ്പോൾ വിവാഹ മോചിതയായ സ്ത്രീയുടെ ഇദ്ദ മൂന്നാം തവണ ആർത്തവമുണ്ടാവുന്നതോടെ അവസാനിക്കും.അതേ സമയം ആർത്തവകാരിയായിരിക്കെ വിവാഹ മോചിതയായ സ്ത്രീ നാലാം തവണ ആർത്തവമുണ്ടാകുന്നതോടെ മാത്രമേ ഇദ്ദ പൂർത്തിയായവളാവുകയുള്ളൂ.(ഫത്ഹുൽമുഈൻ)ഈ വകുപ്പിലുള്ളവരുടെ ഇദ്ദാ കാലം ഏറിയും കുറഞ്ഞുമിരിക്കും .അത് ഇനിയും കൂടാതിരിക്കാനാണ് ഈ സുക്ക്തത്തിൽ നിർദ്ദേശിക്കുന്നത് (ഇദ്ദ,ക്കാലത്ത് അവരെ വിവാഹ മോചനം നടത്തുകയും ഇദ്ദയെ എണ്ണിക്കണക്കാക്കുകയും ചെയ്യുക)

അതായത് ഥ്വലാഖ് ചൊല്ലുകയാണെങ്കിൽ അത് ആർത്തവം കഴിഞ്ഞ് ശുദ്ധിയായി ആ ശുദ്ധി കാലത്ത് അവളെ സംയോഗം ചെയ്യും മുമ്പേ ഥ്വലാഖ് ചൊല്ലണം അങ്ങനെയല്ലെങ്കിൽ അഥവാ ആർത്തവ സമയത്ത് ഥ്വാലാഖ് ചൊല്ലിയാൽ ഇദ്ദാ കാലം പിന്നെയും വർദ്ധിക്കും ഇത് സ്ത്രീയെ ബുദ്ധിമുട്ടിക്കലാണ്.അതിനാൽ ആർത്തവ കാലത്തോ സംയോഗം ചെയ്ത ശുദ്ധിയിൽ തന്നെയോ ഥ്വലാഖ് ചൊല്ലൽ ബിദഇയ്യായ (മതവിരുദ്ധമായ )ഥ്വലാഖാണ്. ഇദ്ദയെ എണ്ണിക്കണക്കാക്കണമെന്ന് പറയാൻ കാരണം ഇദ്ദാ കാലയളവിലുള്ള ഭക്ഷണം താമസം എന്നിവയൊക്കെ ഭർത്താവ് കൊടുക്കേണ്ടതിനാലും ഇദ്ദയുടെ തുടക്കവും ഒടുക്കവും തെറ്റിയാൽ പല ബുദ്ധിമുട്ടുകളും വരാൻ സാദ്ധ്യതയുണ്ട്.അത് വരാതിരിക്കാനാണ് എണ്ണിക്കണക്കാക്കണം എന്ന് പറഞ്ഞത്.ശുദ്ധിയുടെ കണക്ക് .ദിവസങ്ങളുടെ കണക്ക് എന്നിവയിലൂടെയാണല്ലൊ ഇദ്ദ തീരുമാനിക്കുന്നത് ആ നിലക്കും എണ്ണിക്കണക്കാക്കുക എന്നതിനു പ്രസക്തിയുണ്ട്

അവരെ പുറത്താക്കരുത് അവർ പുറത്ത് പോവുകയുമരുത് എന്ന് പറഞ്ഞതിൽ നിന്ന് വിവാഹ മോചനം ചെയ്യപ്പെട്ട സ്ത്രീ വിവാഹ മോചന സമയത്ത് ഏത് വീട്ടിലാണോ ഉള്ളത് അവിടെ തന്നെ താമസിക്കണം.അവളെ അവിടെ നിന്ന് ഇറക്കി വിടുകയോ അവൾ സ്വയം ഇറങ്ങിപ്പോവാനോ പാടില്ല.വ്യക്തമായ ദുർവൃത്തി കൊണ്ടു വന്നാൽ അല്ലാതെ എന്ന് പറഞ്ഞത് വ്യഭിചാരമാണെന്നും വഴക്കുണ്ടാക്കിക്കൊണ്ടിരിക്കൽ പോലുള്ള ദു:സ്വഭാവങ്ങൾ ഇതിൽ വരുമെന്നും അഭിപ്രായമുണ്ട്.ആ ഘട്ടത്തിൽ മാറിത്താമസിക്കാം എന്ന് ചുരുക്കം.

അവിടെ തന്നെ താമസിക്കുമ്പോൾ ഒരു പക്ഷെ മനസ്സ് മാറി വീണ്ടും യോചിപ്പിലെത്താൻ സാദ്ധ്യതയുണ്ടല്ലോ.പിരിക്കലല്ല ഒന്നിച്ചാക്കൽ തന്നെയാണല്ലോ വിവാഹ ലക്ഷ്യം.അതാണ് അള്ളാഹു പുതിയ കാര്യം ഉണ്ടാക്കിയേക്കും എന്ന് അവസാനം പറഞ്ഞത്.

فَإِذَا بَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ فَارِقُوهُنَّ بِمَعْرُوفٍ وَأَشْهِدُوا ذَوَيْ عَدْلٍ مِّنكُمْ وَأَقِيمُوا الشَّهَادَةَ لِلَّهِ ذَلِكُمْ يُوعَظُ بِهِ مَن كَانَ يُؤْمِنُ بِاللَّهِ وَالْيَوْمِ الْآخِرِ وَمَن يَتَّقِ اللَّهَ يَجْعَل لَّهُ مَخْرَجًا(2

അങ്ങനെ ആ സ്ത്രീകൾ അവരുടെ അവധിക്ക്(അടുത്ത്)എത്തിയാൽ നിങ്ങൾ അവരെ മര്യാദയനുസരിച്ച് വെച്ചു കൊള്ളുകയോ മര്യാദയനുസരിച്ച് അവരുമായി പിരിയുകയോ ചെയ്യുക നിങ്ങളിൽ നിന്നുള്ള രണ്ട് നീതിമാന്മാരെ സാക്ഷ്യപ്പെടുത്തുകയും അള്ളാഹുവിനു വേണ്ടി സാക്ഷ്യം നിലനിർത്തുകയും ചെയ്യുക അള്ളാഹുവിലും അന്ത്യ നാളിലും വിശ്വസിച്ചിരിക്കുന്നവർക്ക് ഇതു മൂലം ഉപദേശം നൽകപ്പെടുകയാണ് അള്ളാഹുവിനെ സൂക്ഷിക്കുന്നവർക്ക് അവൻ ഒരു രക്ഷാ മാർഗം ഏർപ്പെടുത്തിക്കൊടുക്കും

മടക്കി എടുക്കാവുന്ന ഥ്വലാഖിൽ (ഭാര്യയെ ഒന്നൊ രണ്ടോ ഥ്വലാഖ് ചൊല്ലുന്നിടത്ത് )ഇദ്ദ കഴിയുന്നതിനു മുമ്പേ അവളെ വിവാഹത്തിലേക്ക് തന്നെ മടക്കാവുന്നതാണ് ഇതിനു എന്റെ ഭാര്യയെ ഞാൻ എന്നിലേക്ക് മടക്കി എന്ന് പറഞ്ഞാൽ മതി.പക്ഷെ അങ്ങനെ വിവാഹത്തിലേക്ക് മടക്കുന്നത് നല്ല ഉദ്ദേശ്യത്തോടെയാവണം അവളെ വിഷമിപ്പിക്കാനാവരുത് അതിനു അവൻ തയാറല്ലെങ്കിൽ അവളുടെ കുറ്റങ്ങളും കുറവുകളും പറയാതെയും പുതിയ ശകാരങ്ങൾ നടത്താതെയും അവളുടെ ഥ്വലാഖ് നടപ്പിൽ വരുത്തണം മടക്കി എടുക്കാനും ഥ്വലാഖ് ചൊല്ലാനും സാക്ഷിക്ക് പറ്റുന്ന രണ്ടാളുകളെ സാക്ഷി നിർത്തണം പിന്നീട് തർക്കങ്ങൾ ഉടലെടുക്കാതിരിക്കാനും ഉടലെടുത്താൽ ഈ സാക്ഷികൾ മുഖേന അത് പരിഹരിക്കാനും സാധിക്കുമല്ലൊ.അങ്ങനെ സാക്ഷികൾ അവരുടെ ബാദ്ധ്യത നിർവഹിക്കേണ്ടി വരുമ്പോൾ അള്ളാഹുവിനെ ഓർത്ത് അവരുടെ കടമ സത്യ സന്ധമായി അവർ അത് നിർവഹിക്കണം അള്ളാഹുവിന്റെ നിയമ വിധികളെ കുറിച്ച് നൽകിയ ചില ഉപദേശങ്ങളാണിത്.അള്ളാഹുവിലും അന്ത്യ നാളിലും വിശ്വസിക്കുന്നവർ ഇത് അംഗീകരിച്ച് നടപ്പിൽ വരുത്തും.ഇതെല്ലാം ഉണർത്തിയ ശേഷം അള്ളാഹുവിന്റെ വിധി വിലക്കുകൾ അനുസരിച്ച് ജീവിക്കുന്നവർക്ക് അവരുടെ പ്രശ്നങ്ങൾക്ക് പോവഴിയും വിഷമങ്ങൾക്ക് രക്ഷാ മാർഗവും അവൻ ഉണ്ടാക്കി കൊടുക്കും എന്ന് അള്ളാഹു വാഗ്ദാനം ചെയ്തിരിക്കുകയാണ്.നാഥന്റെ വിധി വിലക്കുകൾ സൂക്ഷിക്കുകയും അവനെ അനുസരിക്കുകയും ചെയ്യുന്നവരെ അവൻ രക്ഷപ്പെടുത്തുമെന്നും അങ്ങനെയുള്ളവരെ ആർക്കും തകർക്കാനാവില്ലെന്നും ഈ വചനത്തിൽ സൂചയുണ്ട്.സത്യ വിശ്വാസിക്കുള്ളഏറ്റവും നല്ല സന്തോഷ വാർത്തയാണിത്

ഇമാം റാസി(റ)എഴുതുന്നു,വിവാഹ മോചനം ചെയ്യപ്പെട്ട സ്ത്രീയും പുരുഷനും അള്ളാഹുവിന്റെ വിധികൾ സൂക്ഷിച്ചവരാണെങ്കിൽ രണ്ട് പേർക്കും അള്ളാഹു മറ്റൊരു പരിഹാരം നൽകുമെന്നു ഇതിൽ സൂചനയുണ്ട് ഈ സൂക്തം പാരായണം ചെയ്ത് നബി(സ)പറഞ്ഞു.ദുനിയാവിന്റെ സംശയങ്ങളിൽ നിന്നും മരണ വേദനയിൽ നിന്നും അന്ത്യനാളിന്റെ കെടുതികളിൽ നിന്നും അള്ളാഹു അവനു രക്ഷ നൽകും എന്ന്.കൂടുതൽ വ്യാഖ്യാതാക്കളുടെയും പക്ഷം ഈ സൂക്തം അവതരിച്ചത് ഔഫ് ബിൻ മാലിക് അൽ അശ്ജ ഈ(റ)ന്റെ വിഷയത്തിലാണെന്നാണ്.തന്റെ മകനെ ശത്രു ബന്ധിയാക്കി പിടിച്ചപ്പോൾ ഔഫ്(റ)നബി(സ)യുടെ അടുത്ത് വന്ന് മകൻ നഷ്ടപ്പെട്ടതും തന്റെ ദാരിദ്ര്യാവസ്ഥയും വിശദീകരിച്ചു.അപ്പോൾ നബി(സ) അദ്ദേഹത്തോട് നിങ്ങൾ അള്ളാഹുവെ സൂക്ഷിക്കുകയും ക്ഷമിക്കുകയും ചെയ്യുക

لاحول ولاقوة الابالله العلي العظيم

എന്ന ദിക്ർ അധികരിപ്പിക്കുകയും ചെയ്യുക എന്ന് പറഞ്ഞു.അദ്ദേഹം അപ്രകാരം ചെയ്യുകയും ഒരു ദിവസം ശത്രുവിൽ നിന്ന് രക്ഷപ്പെട്ട് ഒരു ഒട്ടകവുമായി മകൻ വീട്ടിലെത്തുകയും ചെയ്തു.അപ്പോൾ ശത്രുവിൽ നിൻന്ന രക്ഷപ്പെട്ടു എന്ന് മാത്രമല്ല ഉപജീവന മാർഗവും അള്ളാഹു നൽകി ഇതാണ് രക്ഷയും വിചാരിക്കാത്ത മർഗേണ ഭക്ഷണവും നൽകുമെന്ന് പറഞ്ഞത്(റാസി)

وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا(3

(മാത്രമല്ല) അവൻ വിചാരിക്കാത്ത ഭാഗത്തിൽ അവനു അള്ളാഹു ഭക്ഷണം നൽകുകയും ചെയ്യും ആരെങ്കിലും അള്ളാഹുവിലേക്ക് ഭരമേൽ‌പ്പിക്കുന്നതായാൽ തനിക്ക് അവൻ തന്നെ മതി നിശ്ചയമായും അള്ളാഹു അവന്റെ (ഉദ്ദിഷ്ട)കാര്യം നടപ്പിൽ വരുത്തുന്നവനാണ് എല്ലാ‍ കാര്യത്തിനും അള്ളാഹു നിശ്ചയമായും ഒരു വ്യവസ്ഥ ഏർപ്പെടുത്തിയിട്ടുണ്ട്

ഇങ്ങനെ ജീവിതം ക്രമീകരിച്ചവർക്ക് അവർ വിജാരിക്കാത്ത ഭാഗത്ത് കൂടിഉപജീവന വഴി നൽകുമെന്നും ഉണർത്തിയിരിക്കുകയാണ് .അള്ളാഹുവിൽ ഭരമേൽ‌പ്പിക്കുന്നവർക്ക് അവൻ മതി .അവൻ എല്ലാം നടപ്പിൽ വരുത്താൻ കഴിവുള്ളവൻ തന്നെയാണ്.അള്ളാഹു എല്ലാത്തിനും ചില വ്യവസ്ഥകൾ നിശ്ചയിച്ചിട്ടുണ്ട് അതിനെ മറികടക്കാൻ ആർക്കുമാവില്ല ജീവിത വ്യവഹാരങ്ങളിൽ മുഴുകുമ്പോൾ പലരും അന്നമടക്കമം തനിക്കാവശ്യമായതെല്ലാം വ്യവസ്ഥ ചെയ്ത് നടപ്പാക്കുന്ന നാഥനെ വിസ്മരിക്കുകയാണ്.എന്നാൽ നാഥൻ തീരുമാനിക്കാത്ത ഒരു പിടി ഭക്ഷണം പോലും തനിക്ക് ലഭിക്കുകയില്ല ഇതാണ് യാഥാർത്ഥ്യം.എന്നിട്ടും ഈ നാഥനിൽ ഭരമേൽ‌പ്പിക്കാതെയും അവന്റെ നിർദ്ദേശങ്ങൾ പരിഗണിക്കാതെയും നന്ദി കേട് കാണിക്കുന്നത് എത്ര മേൽ അപരാധമല്ല! ആരെങ്കിലും ജനങ്ങളിൽ താൻ ശക്തനാവണമെന്നുദ്ദേശിക്കുന്നുവെങ്കിൽ അവൻ അള്ളാഹുവിൽ ഭരമേൽ‌പ്പിക്കട്ടെ എന്ന് നബി(സ) പറഞ്ഞിട്ടുണ്ട്(റാസി)

وَاللَّائِي يَئِسْنَ مِنَ الْمَحِيضِ مِن نِّسَائِكُمْ إِنِ ارْتَبْتُمْ فَعِدَّتُهُنَّ ثَلَاثَةُ أَشْهُرٍ وَاللَّائِي لَمْ يَحِضْنَ وَأُوْلَاتُ الْأَحْمَالِ أَجَلُهُنَّ أَن يَضَعْنَ حَمْلَهُنَّ وَمَن يَتَّقِ اللَّهَ يَجْعَل لَّهُ مِنْ أَمْرِهِ يُسْرًا(4

നിങ്ങളുടെ സ്ത്രീകളിൽ നിന്ന് ആർത്തവത്തെക്കുറിച്ച് നിരാശപ്പെട്ടവരാകട്ടെ (അവരുടെ ഇദ്ദാ കാലത്തെപ്പറ്റി)നിങ്ങൾ അജ്ഞരാണെങ്കിൽ അവരുടെ ഇദ്ദ മൂന്നു മാസമാകുന്നു ആർത്തവമുണ്ടായിട്ടില്ലാത്തവരുടെയും (ഇദ്ദ അങ്ങനെ തന്നെ)ഗർഭിണികളുടെ (ഇദ്ദയുടെ)അവധി അവർ പ്രസവിക്കലാണ് അള്ളാഹുവിനെ ആരെങ്കിലും സൂക്ഷിച്ചാൽ അവനു തന്റെ കാര്യത്തിൽ അള്ളാഹു സൌകര്യം ഉണ്ടാക്കിക്കൊടുക്കുന്നതാകുന്നു

ആർത്തവമുണ്ടാവാറുള്ള സ്ത്രീകളുടെ ഇദ്ദാ കാലാവധി മൂന്ന് ശുദ്ധിയാണെന്ന് നേരത്തെ പറഞ്ഞുവല്ലൊ.എന്നാൽ ആർത്തവ വിരാമമായ സ്ത്രീകളെയോ ആർത്തവമേ ഉണ്ടാവാത്ത സ്ത്രീകളെയൊ വിവാഹ മോചനം ചെയ്യപ്പെട്ടാൽ അവരുടെ ഇദ്ദാ‍ കാലാവധി മൂന്ന് മാസമാകുന്നു.ഇവരുടെ ഇദ്ദയെക്കുറിച്ച് ചിലർ ചോദിച്ചപ്പോഴായിരുന്നു ഈ സൂക്തം അവതരിച്ചത് എന്നാൽ ഭർത്താവ് മരണപ്പെട്ടാലുള്ള ഇദ്ദ ഇവർക്കും നാലു മാസവും പത്ത് ദിവസവും തന്നെയാണ് ഗർഭിണികളുടെ വിവാഹ മോചന ഇദ്ദയും ഭർത്താവ് മരണപ്പെട്ടാലുള്ള ഇദ്ദയും പ്രസവിക്കും വരെയാണ്.പ്രസവം ഉടൻ നടന്നാലും കുറേ താമസമുണ്ടായാലും ഇതിൽ മാറ്റമില്ല.ഇതിലെല്ലാം അള്ളാഹുവിനെ സൂക്ഷിക്കേണ്ടതുണ്ടെന്നുണർത്തിക്കൊണ്ടാണ് സൂക്തം അവസാനിക്കുന്നത്

ذَلِكَ أَمْرُ اللَّهِ أَنزَلَهُ إِلَيْكُمْ وَمَن يَتَّقِ اللَّهَ يُكَفِّرْ عَنْهُ سَيِّئَاتِهِ وَيُعْظِمْ لَهُ أَجْرًا(5

അത് അള്ളാഹുവിന്റെ കല്പനയാണ് അവൻ അത് നിങ്ങൾക്ക് വ്യക്തമാക്കിത്തന്നിരിക്കുന്നു അള്ളാഹുവിനെ ആരെങ്കിലും സൂക്ഷിക്കുന്നതായാൽ അവന്റെ തിന്മകളെ അവൻ മാപ്പാക്കിക്കൊടുക്കുന്നതും അവന് മികച്ച പ്രതിഫലം നൽകുന്നതുമാകുന്നു

അള്ളാഹുവിന്റെ കല്പനകൾ അനുസരിക്കണമെന്നും അത്തരക്കാരുടെ ചെറിയ അബദ്ധങ്ങൾ അള്ളാഹു മാപ്പാക്കുകയും നന്മക്ക് മികച്ച പ്രതിഫലം നൽകുമെന്നും ഉണർത്തിയിരിക്കയാണിവിടെ

أَسْكِنُوهُنَّ مِنْ حَيْثُ سَكَنتُم مِّن وُجْدِكُمْ وَلَا تُضَارُّوهُنَّ لِتُضَيِّقُوا عَلَيْهِنَّ وَإِن كُنَّ أُولَاتِ حَمْلٍ فَأَنفِقُوا عَلَيْهِنَّ حَتَّى يَضَعْنَ حَمْلَهُنَّ فَإِنْ أَرْضَعْنَ لَكُمْ فَآتُوهُنَّ أُجُورَهُنَّ وَأْتَمِرُوا بَيْنَكُم بِمَعْرُوفٍ وَإِن تَعَاسَرْتُمْ فَسَتُرْضِعُ لَهُ أُخْرَى(6

നിങ്ങൾ താമസിക്കുന്നിടത്ത് അതായത് നിങ്ങളുടെ കഴിവിനനുസരിച്ചുള്ള ഒരു സ്ഥലത്ത് നിങ്ങൾ അവരെ താമസിപ്പിക്കുക അവർക്ക് ഞെരുക്കം ഉണ്ടാക്കാനായി നിങ്ങൾ അവരെ ഉപദ്രവിക്കരുത് അവർ ഗർഭിണികളാണെങ്കിൽ പ്രസവിക്കുന്നത് വരെ നിങ്ങൾ അവർക്ക് ചിലവ് കൊടുക്കുകയും വേണം .ഇനി അവർ നിങ്ങൾക്ക് വേണ്ടി കുട്ടിക്ക് മുല കൊടുക്കുന്ന പക്ഷം അവർക്ക് നിങ്ങൾ അവരുടെ പ്രതിഫലം കൊടുക്കണം മര്യാദയനുസരിച്ച് നിങ്ങൾ പരസ്പരം കൂടിയാലോചിക്കുകയും ചെയ്യുക നിങ്ങൾക്ക് ഞെരുക്കം അനുഭവപ്പെടുകയാണെങ്കിൽ മറ്റൊരു സ്ത്രീ അവനു വേണ്ടി മുല കൊടുക്കാവുന്നതാണ്

ഥ്വലാഖ് ചൊല്ലപ്പെട്ട സ്ത്രീകളോടുള്ള ചില ബാദ്ധ്യതയാണ് ഈ സൂക്തങ്ങളിൽ പറയുന്നത് ഇദ്ദ കഴിയുന്നത് വരെ അവന്റെ കഴിവനുസരിച്ചുള്ള വസതിയിൽ അവളെ അവൻ താമസിപ്പിക്കണം വീടു വിട്ടു പോകത്തക്ക വിധം അവളെ ഉപദ്രവിക്കുകയോ ശല്യപ്പെടുത്തുകയോ അരുത്.ഗർഭിണിയാണെങ്കിൽ പ്രസവിക്കും വരെ ചിലവ് നൽകണം പ്രസവാനന്തരം അവൾ തന്നെയാണ് കുട്ടിക്ക് മുലയൂട്ടുന്നതെങ്കിൽ (അത് തന്നെയാണ് നല്ലത്)മുലകുടി മാറ്റുന്നത് വരെ അവൾക്ക് തക്ക പ്രതിഫലം നൽകേണ്ടതുണ്ട് പ്രതിഫലത്തെക്കുറിച്ച് പരസ്പരം ആലോചിച്ചു തീരുമാനിക്കണം.അവൾ മുലയൂട്ടുന്നതിൽ എന്തെങ്കിലും വിഷമം ഉണ്ടെന്ന് തോന്നുന്ന പക്ഷം മറ്റു സ്ത്രീകളെ മുലയൂട്ടാൻ ഏൽ‌പ്പിക്കാവുന്നതാണ്

لِيُنفِقْ ذُو سَعَةٍ مِّن سَعَتِهِ وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ لَا يُكَلِّفُ اللَّهُ نَفْسًا إِلَّا مَا آتَاهَا سَيَجْعَلُ اللَّهُ بَعْدَ عُسْرٍ يُسْرًا(7

കഴിവുള്ളവർ അവന്റെ കഴിവിൽ നിന്ന് ചെലവ് ചെയ്ത് കൊള്ളട്ടെ ആരുടെ മേൽ ആഹാരം കുടുസ്സാക്കപ്പെട്ടിരിക്കുന്നുവോ അവൻ അള്ളാഹു തനിക്ക് നൽകിയതിൽ നിന്ന് ചെലവഴിക്കട്ടെ അള്ളാഹു നൽകിയതല്ലാതെ (ചെലവഴിക്കുവാൻ)ആരെയും അവൻ ശാസിക്കുകയില്ല വിഷമത്തിനു ശേഷം അള്ളാഹു സൌകര്യത്തെ കൈവരുത്തിക്കൊടുക്കുന്നതാണ്

ചിലവ് കൊടുക്കുന്നതും മറ്റും അവന്റെ കഴിവിനനുസരിച്ച് നൽകിയാൽ മതിയാവും കഴിവിനപ്പുറം നൽകാൻ ആരെയും നിർബന്ധിക്കാവതല്ല.പ്രയാസമുള്ളവർ നിരാശപ്പെടേണ്ടതില്ലെന്നും അള്ളാഹു തനിക്ക് പ്രയാസം തീർത്തു തരുമെന്ന പ്രതീക്ഷയാണ് വെച്ചു പുലർത്തേണ്ടതെന്നും ഉണർത്തിയിരിക്കുകയാണ്

وَكَأَيِّن مِّن قَرْيَةٍ عَتَتْ عَنْ أَمْرِ رَبِّهَا وَرُسُلِهِ فَحَاسَبْنَاهَا حِسَابًا شَدِيدًا وَعَذَّبْنَاهَا عَذَابًا نُّكْرًا(8

എത്രയോരാജ്യം!തന്റെ രക്ഷിതാവിന്റെയും അവന്റെ ദൂതന്മാരുടെയും കല്പനകൾ അത് ധിക്കരിച്ചു കളഞ്ഞു അതിനാൽ അവയെ നാം കണിശമായി വിചാരണ ചെയ്യുകയും കഠിനമായി അവക്ക് ശിക്ഷ നൽകുകയും ചെയ്തു

എത്രയോ രാജ്യം എന്ന് പറഞ്ഞത് ആ രാജ്യത്തുള്ള ജനങ്ങൾ എന്ന അർത്ഥത്തിലാണ്.അള്ളാ‍ഹുവെയും അവന്റെദൂതന്മാരെയും ധിക്കരിച്ചവർക്ക് കഠിന ശിക്ഷയും വിചാരണയും നൽകി എന്ന് ഭൂതകാല ക്രിയ ഉപയോഗിച്ചത് ഭൂമിയിൽ വെച്ച് അവർ അനുഭവിച്ച ശിക്ഷകളെക്കുറിച്ചാണെന്നും പരലോകത്ത് വരാനിരിക്കുന്ന ശിക്ഷ അവർക്ക് ഉറപ്പായത് കൊണ്ട് ആ ശൈലി ഉപയോഗിച്ചതാണെന്നും വ്യാഖ്യാനമുണ്ട്..ബുദ്ധിയുള്ളവർക്കുള്ള ഒരു താക്കീതാണിത്

فَذَاقَتْ وَبَالَ أَمْرِهَا وَكَانَ عَاقِبَةُ أَمْرِهَا خُسْرًا(9

അങ്ങനെ അവയുടെ കാര്യത്തിന്റെ ദുഷ്ഫലം അവ ആസ്വദിച്ചു അവയുടെ കാര്യത്തിന്റെ പര്യവസാനം നഷ്ടം തന്നെയായിരുന്നു

ധിക്കാരത്തിന്റെ പ്രതിഫലം ഇവിടെയും അവർ അനുഭവിച്ചു പരലോകത്ത് വലിയ തിരിച്ചടി വരാനിരിക്കുന്നുമുണ്ട് എന്ന് സാരം

أَعَدَّ اللَّهُ لَهُمْ عَذَابًا شَدِيدًا فَاتَّقُوا اللَّهَ يَا أُوْلِي الْأَلْبَابِ الَّذِينَ آمَنُوا قَدْ أَنزَلَ اللَّهُ إِلَيْكُمْ ذِكْرًا(10

ആ രാജ്യക്കാർക്ക് അള്ളാഹു കഠിനമായ ശിക്ഷ ഒരുക്കി വെച്ചിട്ടുണ്ട് അത് കൊണ്ട് ബുദ്ധിയുള്ളവരേ ,അതെ സത്യ വിശ്വാസികളേ.നിങ്ങൾ അള്ളാഹുവിനെ സൂക്ഷിക്കുക നിശ്ചയമായും അള്ളാഹു നിങ്ങൾക്ക് ഒരു ഉൽബോധനം ഇറക്കിത്തന്നിരിക്കുന്നു

ഒരുക്കി വെച്ചു എന്ന് ഇവിടെ പറഞ്ഞ ശിക്ഷ പരലോക ശിക്ഷ തന്നെയാണ്. ഉൽബോധനം ഇറക്കി എന്ന് പറഞ്ഞത് വിശുദ്ധ ഖുർആനാണ്

رَّسُولًا يَتْلُو عَلَيْكُمْ آيَاتِ اللَّهِ مُبَيِّنَاتٍ لِّيُخْرِجَ الَّذِينَ آمَنُوا وَعَمِلُوا الصَّالِحَاتِ مِنَ الظُّلُمَاتِ إِلَى النُّورِ وَمَن يُؤْمِن بِاللَّهِ وَيَعْمَلْ صَالِحًا يُدْخِلْهُ جَنَّاتٍ تَجْرِي مِن تَحْتِهَا الْأَنْهَارُ خَالِدِينَ فِيهَا أَبَدًا قَدْ أَحْسَنَ اللَّهُ لَهُ رِزْقًا(11

വ്യക്തമായി വിവരിക്കുന്ന അള്ളാഹുവിന്റെ ആയത്തുകളെ നിങ്ങൾക്ക് ഓതിത്തരുന്ന ഒരു റസൂലിനെ (അവൻ അയക്കുകയും ചെയ്തിരിക്കുന്നു)സത്യത്തിൽ വിശ്വസിക്കുകയും സൽക്കർമ്മങ്ങൾ അനുഷ്ഠിക്കുകയും ചെയ്തവരെ അന്ധകാരങ്ങളിൽ നിന്ന് പ്രകാശത്തിലേക്ക് കൊണ്ടു വരാൻ വേണ്ടി .ആരെങ്കിലും അള്ളാഹുവിൽ വിശ്വസിക്കുകയും സൽക്കർമ്മങ്ങൾ അനുഷ്ഠിക്കുകയും ചെയ്യുന്നുവോ അടിഭാഗത്ത് കൂടി അരുവികൾ ഒഴുകുന്ന സ്വർഗങ്ങളിൽ അവനെ അള്ളാഹു പ്രവേശിപ്പിക്കും അതിൽ അവർ എന്നെന്നും നിരന്തര വാസികളായ നിലയിൽ.അവനു അള്ളാഹു ഉപജീവനം നന്നാക്കിക്കൊടുക്കുന്നതാണ്

ഉൽബോധനത്തിനുള്ള ഗ്രന്ഥവും അത് ഓതിക്കൊടുത്തും വിശദീകരിച്ചും ദിശാ ബോധം നൽകുന്ന റസൂലിനെയും അള്ളാഹു അയച്ചത് വലിയ അനുഗ്രഹം തന്നെയാണ്.ഈ പ്രബോധനം മുഖേന അവിശ്വാസത്തിന്റെയും അറിവില്ലായ്മയുടെയും സംശയങ്ങളുടെയും ഇരുട്ടിൽ നിന്ന് വിശ്വാസത്തിന്റെയും അറിവിന്റെയും തെളിവിന്റെയും വെളിച്ചത്തിലേക്ക് പ്രവാചകൻ(സ) നിങ്ങളെ ഉയർത്തിക്കൊണ്ടു വന്നു.ആ പ്രബോധനത്തിന്റെ അന്തസത്ത ഉൾക്കൊണ്ട് സത്യവിശ്വാസവും സൽക്കർമ്മവും കൊണ്ട് നടക്കുന്നവർക്ക് സുഖത്തിന്റെ പറുദീസയായ സ്വർഗ പ്രവേശനം കൊണ്ട് അള്ളാഹു അനുഗ്രഹിക്കുകയും അത് സ്ഥിര സംവിധാനമാക്കി അല്ലലുകളില്ലാത്ത സന്തോഷം അവൻ പ്രധാനം ചെയ്യുകയും ചെയ്യും അവിടുത്തെ ഉപജീവനം തികച്ചും മാത്ര്‌കാപരമായിരിക്കും.അതാണ് ഉപജീവനം നന്നാക്കി ക്കൊടുക്കുമെന്നുണർത്തിയത്

اللَّهُ الَّذِي خَلَقَ سَبْعَ سَمَاوَاتٍ وَمِنَ الْأَرْضِ مِثْلَهُنَّ يَتَنَزَّلُ الْأَمْرُ بَيْنَهُنَّ لِتَعْلَمُوا أَنَّ اللَّهَ عَلَى كُلِّ شَيْءٍ قَدِيرٌ وَأَنَّ اللَّهَ قَدْ أَحَاطَ بِكُلِّ شَيْءٍ عِلْمًا 12

ഏഴ് ആകാശങ്ങളെയും അവയെപ്പോലെ തന്നെ ഭൂമിയെയും സ്ര്‌ഷ്ടിച്ചവനാണ് അള്ളാഹു അവക്കിടയിൽ അവന്റെ കല്പന ഇറങ്ങിക്കൊണ്ടിരിക്കുന്നു നിശ്ചയം അള്ളാഹു എല്ലാ കാര്യത്തിനും കഴിവുള്ളവനാണെന്നും എല്ലാ വസ്തുക്കളെയും അറിവ് കൊണ്ട് അവൻ വലയം ചെയ്തിരിക്കുന്നുവെന്നും നിങ്ങൾ അറിയുവാൻ വേണ്ടിയാണ് (ഇതെല്ലാം നിങ്ങളെ അറിയിക്കുന്നത്)

ആകാശങ്ങൾ ഏഴെണ്ണമാണെന്ന് ഖുർആൻ പലയിടത്തും വ്യക്തമാക്കിയിട്ടുണ്ട് അതിന്റെ വിശദാംശങ്ങൾ പലതും നമുക്കറിഞ്ഞു കൂടാ.നാം കണ്ടെത്തിയിട്ടില്ലാത്ത എത്രയോ സത്യങ്ങൾ ഇപ്പോഴുമുണ്ടല്ലോ!ഭൂമിയും അത് പോലെ ഉണ്ടെന്ന് പറഞ്ഞതിൽ നിന്ന് ഭൂമിയും ഏഴെണ്ണമുണ്ടെന്ന് വ്യക്തം.വിശദാംശം നമുക്ക് അറിയില്ലെങ്കിലും പ്രപഞ്ച നാഥനായ അള്ളാഹുവിന്റെ വാക്കുകളെ നമുക്ക് കണ്ണടച്ച് സ്വീകരിക്കാൻ മാത്രമുള്ള സത്യങ്ങൾ ഇവിടെ ഉണ്ടല്ലൊ!ആകാശ ഭൂമികളിലെല്ലാം തന്നെ അവന്റെ കല്പനയനുസരിച്ചാണ് കാര്യങ്ങൾ നടന്നു കൊണ്ടിരിക്കുന്നത് അവന്റെ അറിവും തീരുമാനവുമില്ലാതെ ഒന്നും നടക്കുന്നില്ല എല്ലാറ്റിന്റെയും സ്ര്‌ഷ്ടാവും നിയന്താവും ഭരണ കർത്താവും അവൻ തന്നെ അവൻ സർവ ശക്തനും സർവജ്ഞനുമത്രെ ഇതെല്ലാം മനുഷ്യൻ എപ്പോഴും അറിഞ്ഞും ചിന്തിച്ചും തന്നെയാണിരിക്കേണ്ടത് അള്ളാഹു നമ്മെയെല്ലാം സജ്ജനങ്ങളിൽ പെടുത്തട്ടെ ആമീൻ

അദ്ധ്യായം 64 - സൂറത്തു-തഗാബുൻ

2012-01-10T12:00:00.000+04:00

سورة التغابن

മദീനയിൽ അവതരിച്ചു : സൂക്തങ്ങൾ 18

തഗാബുൻ എന്നാൽ ‘നഷ്ടം വെളിപ്പെടൽ’ എന്നാണർത്ഥം.ഈ അദ്ധ്യായത്തിന്റെ ഒമ്പതാം സൂക്തത്തിൽ പരലോകത്തെക്കുറിച്ച പരാമർശത്തിനിടയിൽ അത് നഷ്ടം വെളിപ്പെടുന്ന ദിവസമാകുന്നു എന്ന് പറഞ്ഞിട്ടുണ്ട്.അതിൽ നിന്നാണ് ഈ പേര് ലഭിച്ചത്

بسم الله الرحمن الرحيم

1 ) يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ

ആകാശ ഭൂമികളിലുള്ളവയെല്ലാം അള്ളാഹുവിന്റെ പരിശുദ്ധിയെ പ്രകീർത്തിക്കുന്നു അവനാണ് അധികാരം.അവന്നാണ് സർവസ്തുദിയും.അവൻ എല്ലാ കാര്യത്തിനും കഴിവുള്ളവനാകുന്നു

അഖില വസ്തുക്കളും അള്ളാഹുവിനു തസ്ബീഹ് ചെയ്യുന്നുണ്ട് എന്നാണിവിടെ പറയുന്നത്.അതിന്റെ കാരണമാണ് അധികാരം അവന്നാണ് എന്ന് പറഞ്ഞത് അത് കൊണ്ട് തന്നെ എല്ലാ സ്തുദിയും അവന്നു അവകാശപ്പെട്ടതാണ്.അവൻ ഉദ്ദേശിക്കുന്നതെന്തും ചെയ്യാൻ കഴിവുള്ളവനാണ്

2) هُوَ الَّذِي خَلَقَكُمْ فَمِنكُمْ كَافِرٌ وَمِنكُم مُّؤْمِنٌ وَاللَّهُ بِمَا تَعْمَلُونَ بَصِيرٌ

അവനാണ് നിങ്ങളെ സൃഷ്ടിച്ചവൻ.അപ്പോൾ നിങ്ങളിൽ സത്യനിഷേധികളും സത്യവിശ്വാസികളുമുണ്ട് നിങ്ങൾ പ്രവർത്തിക്കുന്നതിനെ പറ്റി അള്ളാഹു ശരിക്ക് കണ്ടറിയുന്നവനാകുന്നു

ഇല്ലായ്മയിൽ നിന്ന് നമ്മെ പടച്ചു എന്നത് അള്ളാഹു ചെയ്ത ഏറ്റവും വലിയ അനുഗ്രഹമാണ്.അതിനു നന്ദിയായി അവനെ അനുസരിക്കുന്ന അടിമകളായി മാറുകയായിരുന്നു എല്ലാവരും ചെയ്യേണ്ടിയിരുന്നതെങ്കിലും നിങ്ങൾ ഭിന്നിച്ച് ചിലർ വിശ്വാസികളും മറ്റു ചിലർ അവിശ്വാസികളുമായിപ്പോയി എന്നും അത് അള്ളാഹു ശരിക്കും മനസിലാക്കിയിട്ടുണ്ടെന്നും ഉണർത്തുകയാണ്

3) خَلَقَ السَّمَاوَاتِ وَالْأَرْضَ بِالْحَقِّ وَصَوَّرَكُمْ فَأَحْسَنَ صُوَرَكُمْ وَإِلَيْهِ الْمَصِيرُ

അവൻ ആകാശ ഭൂമികളെ സത്യസമേതം സൃഷ്ടിച്ചു.അവൻ നിങ്ങളെ രൂപപ്പെടുത്തുകയും അങ്ങനെ നിങ്ങളുടെ രൂപങ്ങൾ നന്നാക്കുകയും ചെയ്തു.അവങ്കലേക്ക് തന്നെയാണ് (നിങ്ങളുടെ)തിരിച്ചു ചെല്ലലും

സത്യ സമേതം സൃഷ്ടിച്ചു എന്നാൽ അവന്റെ അതിവിശാലമായ തന്ത്രങ്ങളോടെ അവൻ കണക്കാക്കിയത് പോലെ പടച്ചു എന്നാണ്.അവൻ നിങ്ങൾക്ക് രൂപം നൽകിയപ്പോൾ മറ്റാർക്കും നൽകാത്ത സൌന്ദര്യ രൂപം നൽകി .അവനിലേക്ക് തിരിച്ച് പോകേണ്ട നിങ്ങൾ അവനെ അനുസരിക്കാൻ ശ്രദ്ധിക്കണം

4) يَعْلَمُ مَا فِي السَّمَاوَاتِ وَالْأَرْضِ وَيَعْلَمُ مَا تُسِرُّونَ وَمَا تُعْلِنُونَ وَاللَّهُ عَلِيمٌ بِذَاتِ الصُّدُورِ

ആകാശഭൂമികളിലുള്ളതെല്ലാം അവൻ അറിയുന്നുണ്ട് നിങ്ങൾ രഹസ്യമാക്കുന്നതും പരസ്യമാക്കുന്നതും അവൻ അറിയുന്നു. ഹൃദയങ്ങളിൽ ഉള്ളതിനെപറ്റി അള്ളാഹു നന്നായി അറിയുന്നവനാണ്

ആകാശ ഭൂമികളിലുള്ളതെല്ലാം അള്ളാഹു അറിയുമെന്നുണർത്തിയ ശേഷം അടിമകൾ രഹസ്യമാക്കി വെക്കുന്നതും പരസ്യമാക്കുന്നതും അറിയുമെന്നും ഉണർത്തുകയും പിന്നീട് മനസ്സിലുള്ളത് അറിയുമെന്ന് പറഞ്ഞാൽ എല്ലാ കാര്യങ്ങളും അതി സൂക്ഷ്മമായും വിശാലമായും തന്നെ അറിയുന്നുണ്ടെന്നും ഒരു അണുവിന്റെ അത്ര പോലും അവ്യക്തത അള്ളാഹുവിനില്ലെന്നും ഉണർത്തിയിരിക്കുകയാണ്

5) أَلَمْ يَأْتِكُمْ نَبَأُ الَّذِينَ كَفَرُوا مِن قَبْلُ فَذَاقُوا وَبَالَ أَمْرِهِمْ وَلَهُمْ عَذَابٌ أَلِيمٌ

നിങ്ങൾക്ക് മുമ്പ് സത്യം നിഷേധിച്ചവരുടെ വ്ര്‌ത്താന്തം നിങ്ങൾക്ക് വന്നിട്ടില്ലേ?എന്നിട്ട് അവരുടെ പ്രവർത്തനങ്ങളുടെ ദുരന്തഫലം അവർ ആസ്വദിച്ചു അവർക്ക്(പരലോകത്ത്)വേദനാജനകമായ ശിക്ഷയുമുണ്ട്

അള്ളാഹുവിന്റെ മഹത്വവും കഴിവും അറിയിക്കുകയും അവനെ അനുസരിക്കണമെന്ന് കൽ‌പ്പിക്കുകയും എന്നാൽ പലരും അത് നിഷേധിച്ചിട്ടുണ്ടെന്ന് ഉണർത്തുകയും ചെയ്ത ശേഷം അള്ളാഹുവിനെ നിഷേധിച്ച പൂർവ സമുദായങ്ങളുടെ ദുരവസ്ഥയിലേക്ക് വിരൽ ചൂണ്ടുകയും അവരെ പോലെ നിഷേധത്തിലേക്ക് നീങ്ങുന്ന മക്കക്കാരോട് താക്കീതിന്റെ സ്വരത്തിൽ ഉണർത്തുകയുമാണിവിടെ.സത്യം നിഷേധിച്ച അവർക്ക് ഭൂമിയിൽ വെച്ച് തന്നെ വലിയ ശിക്ഷകൾ അവർക്ക് സംഭവിച്ചു.പരലോകത്ത് ഇനിയും കഠിന ശിക്ഷകൾ വരാനിരിക്കുന്നുമുണ്ട്

6) ذَلِكَ بِأَنَّهُ كَانَت تَّأْتِيهِمْ رُسُلُهُم بِالْبَيِّنَاتِ فَقَالُوا أَبَشَرٌ يَهْدُونَنَا فَكَفَرُوا وَتَوَلَّوا وَّاسْتَغْنَى اللَّهُ وَاللَّهُ غَنِيٌّ حَمِيدٌ

അതിനു കാരണം(ഇതാണ്)അവരുടെ ദൂതന്മാർ വ്യക്തമായ തെളിവുകളുമായി അവരുടെ അടുത്ത് ചെന്നിരുന്നു അപ്പോൾ മനുഷ്യരാണോ നമുക്ക് മാർഗദർശനം ചെയ്യുന്നത് എന്നവർ ചോദിച്ചു അങ്ങനെ അവർ സത്യം നിഷേധിക്കുകയും തിരിഞ്ഞുകളയുകയുമുണ്ടായി അള്ളാഹു (അവരിൽ നിന്നു)നിരാശ്രയത്വം വെളിപ്പെടുത്തുകയും ചെയ്തു അള്ളാഹു നിരാശ്രയനും സതുത്യർഹനുമാകുന്നു

വ്യക്തമായ തെളിവുകളുമായി പ്രവാചകന്മാർ അവരുടെ അടുത്ത് വന്നപ്പോൾ മനുഷ്യരാണോ നമുക്ക് മാർഗദർശനം നൽകുന്നത് എന്ന് ചോദിച്ചു കൊണ്ട് പ്രവാചകന്മാരെ അവർ പരിഹസിച്ചു തള്ളിക്കളയുകയും സത്യത്തിൽ നിന്ന് പിന്തിരിയുകയും ചെയ്തു.അവരുടെ ആരാധനയിലേക്ക് അള്ളാഹുവിനു ഒരു ആവശ്യവുമില്ലെന്നും ആരാധനയുടെ ഗുണം അവർക്ക് തന്നെയായിരുന്നു ലഭിക്കുകയെന്നും അവർ അതിൽ നിന്നു പിന്തിരിയുക വഴി സ്വയം അപകടത്തിൽ ചാടിയിരിക്കുകയാണെന്നും നിരാശ്രയനായ അള്ളാഹു ഭൂമിയിൽ അവരെ അവരുടെ പാട്ടിനു വിട്ടിരിക്കയാണെന്നും ഉണർത്തിയിരിക്കുകയാണ്

7) زَعَمَ الَّذِينَ كَفَرُوا أَن لَّن يُبْعَثُوا قُلْ بَلَى وَرَبِّي لَتُبْعَثُنَّ ثُمَّ لَتُنَبَّؤُنَّ بِمَا عَمِلْتُمْ وَذَلِكَ عَلَى اللَّهِ يَسِيرٌ

സത്യനിഷേധികൾ ജൽ‌പ്പിക്കുന്നു അവർ (മരണ ശേഷം) എഴുന്നേല്പിക്കപ്പെടുകയില്ലെന്ന്.(നബിയേ)പറയുക. എന്റെ നാഥനെത്തന്നെയാണ് (സത്യം) നിങ്ങൾ (മരണശേഷം)എഴുന്നേൽ‌പ്പിക്കപ്പെടുകതന്നെ ചെയ്യും പിന്നെ നിങ്ങൾ പ്രവർത്തിച്ചതിനെ പറ്റി നിങ്ങൾക്ക് വിവരം നൽകപ്പെടുന്നതാണ് അത് അള്ളാഹുവിനു നിസ്സാരകാര്യമാകുന്നു

മരിച്ചു മണ്ണടിഞ്ഞാൽ പിന്നെ തങ്ങളെ പുനർജനിപ്പിക്കാൻ അള്ളാഹുവിനാകില്ലെന്ന് അവർ ആണയിട്ടു പറഞ്ഞു.എന്നാൽ അള്ളാഹുവിൽ സത്യം ചെയ്ത് കൊണ്ട് നബി(സ)പറഞ്ഞത് നിങ്ങൾ മരണ ശേഷം പുനർജനിപ്പിക്കപ്പെടുക തന്നെ ചെയ്യുമെന്നും എന്നിട്ട് നിങ്ങളുടെ പ്രവർത്തനങ്ങളെക്കുറിച്ച് വിവരം നൽകുമെന്നും ഇത് അള്ളാഹുവിനു വളരെ നിസ്സാരമാണെന്നും ഉണർത്തിയിരിക്കയാണ്

8) فَآمِنُوا بِاللَّهِ وَرَسُولِهِ وَالنُّورِ الَّذِي أَنزَلْنَا وَاللَّهُ بِمَا تَعْمَلُونَ خَبِيرٌ

അത് കൊണ്ട് നിങ്ങൾ അള്ളാഹുവിലും അവന്റെ റസൂലിലും നാം അവതരിപ്പിച്ച പ്രകാശത്തിലും വിശ്വസിക്കുക നിങ്ങൾ പ്രവർത്തിക്കുന്നതിനെപറ്റി അള്ളാഹു സൂക്ഷ്മജ്ഞാനമുള്ളവനാകുന്നു

മുൻ കാല സമുദായങ്ങൾ നിഷേധം കാരണത്താലാണ് ശിക്ഷിക്കപ്പെട്ടത് .അത് പോലെ നിങ്ങൾ ശിക്ഷിക്കപ്പെടാതിരിക്കാനായി അള്ളാഹുവിലും റസൂലിലും ഖുർ ആനിലും വിശ്വസിക്കുക.പ്രകാശമെന്ന് പറഞ്ഞത് ഖുർ ആനിനെക്കുറിച്ചാണ്

ഇരുട്ടിൽ നിന്ന് പ്രകാശം മുഖേന വഴികണ്ടെത്താൻ സാധിക്കുമ്പോലെ എല്ലാ സംശയങ്ങളിൽ നിന്നും ഖുർ ആൻ മുഖേന രക്ഷപ്പെടാനാവും.അത് കൊണ്ടാണ് പ്രകാശം എന്ന് ഖുർആനെക്കുറിച്ച് പറഞ്ഞത് നിങ്ങൾ പ്രവർത്തിക്കുന്നതിനെ പറ്റി അള്ളാഹു സൂക്ഷ്മമായി അറിയുന്നവനാണ് എന്നതിന്റെ വിവക്ഷ നിങ്ങളുടെ രഹസ്യവും പരസ്യവും അള്ളാഹു അറിയുന്നുണ്ടെന്നും അത് കൊണ്ട് എല്ലാ അവസ്ഥയിലും അള്ളാഹുവെ സൂക്ഷിക്കുകയും അവനെ ഭയപ്പെടുകയും ചെയ്യണമെന്നുമാണ്

9) يَوْمَ يَجْمَعُكُمْ لِيَوْمِ الْجَمْعِ ذَلِكَ يَوْمُ التَّغَابُنِ وَمَن يُؤْمِن بِاللَّهِ وَيَعْمَلْ صَالِحًا يُكَفِّرْ عَنْهُ سَيِّئَاتِهِ وَيُدْخِلْهُ جَنَّاتٍ تَجْرِي مِن تَحْتِهَا الْأَنْهَارُ خَالِدِينَ فِيهَا أَبَدًا ذَلِكَ الْفَوْزُ الْعَظِيمُ

ആ സമ്മേളിപ്പിക്കും നാളിലേക്ക് അവൻ നിങ്ങളെ ഒരുമിച്ചു കൂട്ടുന്ന ദിവസത്തെ(ഓർക്കുക)അത് നഷ്ടം വെളിപ്പെടുന്ന ദിവസമാണ് ആർ അള്ളാഹുവിൽ വിശ്വസിക്കുകയും സൽക്കർമ്മം അനുഷ്ടിക്കുകയും ചെയ്യുന്നുവോ അവരുടെ പാപങ്ങളെ അവൻ പൊറുക്കുന്നതാണ് താഴ്ഭാഗങ്ങളിൽ കൂടി അരുവികൾ ഒഴുകിക്കൊണ്ടിരിക്കുന്ന സ്വർഗങ്ങളിൽ അവൻ അവരെ പ്രവേശിപ്പിക്കുകയും ചെയ്യും അതിൽ അവർ എന്നെന്നും സ്ഥിരവാസികളായ നിലയിൽ .അത് മഹത്തായ വിജയം തന്നെയാകുന്നു

സത്യ നിഷേധികൾ നരകത്തിലെത്തിപ്പെടുകയും പരാജയം അവർക്ക് ബോദ്ധ്യപ്പെടുകയും ചെയ്യുന്ന ദിനമാണത്.പരലോകത്തിനു പകരം ഭൌതിക ജീവിതം വിലക്ക് വാങ്ങി ആ കച്ചവടത്തിൽ നഷ്ടം പറ്റിയവരാണവരെന്ന് ഖുർആൻ പല സ്ഥലത്തും പറഞ്ഞിട്ടുണ്ട് അതേ സമയം സത്യ വിശ്വാസം സ്വീകരിക്കുന്നത് ലാഭകരമായ കച്ചവടമാണെന്നും ഖുർ ആൻ ഉണർത്തിയിട്ടുണ്ട്

അള്ളാഹുവെ അനുസരിച്ച അവന്റെ അടിമകൾക്ക് ഒരു കണ്ണും കാണാത്തതും ഒരു കാതും കേൾക്കാത്തതും ഒരു മനുഷ്യനും ചിന്തിക്കാൻ പോലും കഴിയാത്തതുമായ സൌകര്യങ്ങളാണ് ഒരുക്കി വെച്ചിരിക്കുന്നത് എന്ന് ഇസ്ലാം വിവരിച്ചിട്ടുണ്ട്

10) وَالَّذِينَ كَفَرُوا وَكَذَّبُوا بِآيَاتِنَا أُوْلَئِكَ أَصْحَابُ النَّارِ خَالِدِينَ فِيهَا وَبِئْسَ الْمَصِيرُ

സത്യം നിഷേധിക്കുകയും നമ്മുടെ ദൃഷ്ടാന്തങ്ങളെ കള്ളമാക്കുകയും ചെയ്തവരാകട്ടെ അവർ നരകക്കാരാണ് അവർ അതിൽ സ്ഥിരവാസികളായ നിലയിൽ.തിരിച്ചെത്തുന്ന ആസ്ഥാനം വളരെ ചീത്തയായതുതന്നെ

നരകാവകാശികൽ നിഷേധികളായ കാരണത്താൽ അള്ളാഹുവിന്റെ കോപത്തിനർഹരായിരിക്കയാൽ അവർക്ക് ശാസ്വതമായ നരകമുണ്ടെന്നും അത് വളരെ മോശമായ സങ്കേതമാണെന്നും ഉണർത്തിയിരിക്കയാണ്

11) مَا أَصَابَ مِن مُّصِيبَةٍ إِلَّا بِإِذْنِ اللَّهِ وَمَن يُؤْمِن بِاللَّهِ يَهْدِ قَلْبَهُ وَاللَّهُ بِكُلِّ شَيْءٍ عَلِيمٌ

യാതൊരു വിപത്തും തന്നെ അള്ളാഹുവിന്റെ അനുമതി കൂടാതെ ബാധിക്കുകയില്ല ആരെങ്കിലും അള്ളാഹുവിൽ വിശ്വസിച്ചാൽ അവന്റെ ഹൃദയത്തിനു അവൻ മാർഗദർശനം നൽകുന്നതാണ് എല്ലാകാര്യങ്ങളെ പറ്റിയും അള്ളാഹു നന്നായി അറിയുന്നവനാകുന്നു

അതായത് നിങ്ങൾക്ക് ബാധിക്കുന്ന എന്ത് കാര്യവും അള്ളാഹുവിന്റെ അറിവോടെയും അവന്റെ തീരുമാനമനുസരിച്ചും മാത്രമാണ് സംഭവിക്കുന്നത്.സത്യവിശ്വാസം സ്വീകരിച്ച വ്യക്തിക്ക് അള്ളാഹു ഹൃദയത്തിനു മാർഗ ദർശനം നൽകിയിരിക്കയാൽ രോഗം /ദാരിദ്ര്യം/വരൾച്ച തുടങ്ങി എന്ത് വിപത്ത് ബാധിക്കുമ്പോഴും അത് അള്ളാഹു നിശ്ചയിച്ചതാണെന്ന് മനസ്സിലാക്കുകയും ഞാനും എന്റെ എല്ലാ കാര്യങ്ങളും അള്ളാഹുവിലേക്ക് ഏൽ‌പ്പിക്കപ്പെടേണ്ടതാണെന്നും ചിന്തിച്ച് അവൻ സാമാധാനം കണ്ടെത്തുകയും ചെയ്യും..അള്ളാഹുവിൽ വിശ്വസിച്ചാൽ സന്തോഷ വേളകളിൽ അവൻ അള്ളാഹുവിനു നന്ദി ചെയ്യുകയും പരീക്ഷണം വരുമ്പോൾ ക്ഷമിക്കുകയും ചെയ്യും അത് രണ്ടും അവനു വലിയ നേട്ടമുണ്ടാക്കുകയും ചെയ്യും എന്ന് ഈ സൂക്തത്തിന്റെ ആശയത്തിൽ വരുന്നതാണ്(റാസി)

വിശ്വസിച്ചു എന്ന് നാവു കൊണ്ട് മാത്രം പറയുന്നവനെയും യഥാർത്ഥത്തിൽ വിശ്വസിക്കുന്നവനെയും അള്ളാഹു അറിയുന്നുണ്ടെന്ന് സൂചിപ്പിക്കുകയാണ് അള്ളാഹു എല്ലാം നന്നായി അറിയും എന്ന വാക്കിലൂടെ

12) وَأَطِيعُوا اللَّهَ وَأَطِيعُوا الرَّسُولَ فَإِن تَوَلَّيْتُمْ فَإِنَّمَا عَلَى رَسُولِنَا الْبَلَاغُ الْمُبِينُ

നിങ്ങൾ അള്ളാഹുവിനെയും അവന്റെ റസൂലിനെയും അനുസരിക്കുക ഇനി നിങ്ങൾ തിരിഞ്ഞു പോവുകയാണെങ്കിൽ നിശ്ചയം നമ്മുടെ ദൂതന്റെ ബാധ്യത പ്രബോധനം മാത്രമാകുന്നു

അള്ളാഹുവിന്റെ കല്പനകളും റസൂലിന്റെ നിർദ്ദേശങ്ങളും അനുസരിക്കണം .അതിൽ പെട്ടതാണ് വിപത്തു വരുമ്പോഴുള്ള ക്ഷമ.ഈ കല്പനകളെ അവഗണിച്ച് ആരെങ്കിലും ജീവിച്ചാൽ പ്രവാചകനു ഒന്നും വരാനില്ല.അവിടുത്തെ ബാദ്ധ്യത പ്രബോധനം മാത്രമാണ് അത് അവിടുന്ന് ഭംഗിയായി നിർവഹിക്കുകയും ചെയ്തു.അത് ആരെങ്കിലും ഉൾക്കൊണ്ടാൽ അവനു നന്നു എന്ന് മാത്രം

13) اللَّهُ لَا إِلَهَ إِلَّا هُوَ وَعَلَى اللَّهِ فَلْيَتَوَكَّلِ الْمُؤْمِنُونَ

അള്ളാഹുമാത്രമാകുന്നു ആരാധ്യൻ.സത്യവിശ്വാസികൾ അള്ളാഹുവിന്റെ മേൽ ഭരമേൽ‌പ്പിച്ചു കൊള്ളുക

അള്ളാഹു മാത്രമാണ് ആരാധ്യൻ .അവന്റെ തീരുമാനങ്ങൾ എല്ലാം നാം അനുസരിക്കണം അവന്റെ മേൽ ഭരമേൽ‌പ്പിക്കണം.കാരണം അള്ളാഹുവിന്റെ തീരുമാനമനുസരിച്ചാണ് എല്ലാം നടക്കുന്നത്

14) يَا أَيُّهَا الَّذِينَ آمَنُوا إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ فَاحْذَرُوهُمْ وَإِن تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَّحِيمٌ

സത്യവിശ്വാസികളേ.നിശ്ചയം നിങ്ങളുടെ ഇണകളിലും മക്കളിലും നിങ്ങൾക്ക് ശത്രുക്കളുണ്ട് അതിനാൽ അവരെ നിങ്ങൾ സൂക്ഷിച്ച് കൊള്ളുക.നിങ്ങൽ മാപ്പ് ചെയ്യുകയും വിട്ടു കൊടുക്കുകയും പൊറുത്തുകൊടുക്കുകയും ചെയ്യുന്നുവെങ്കിൽ നിശ്ചയമായും അള്ളാഹു വളരെ പൊറുക്കുന്നവനും പരമകാരുണികനുമാകുന്നു

ഭൌതിക ജീവിതം നശ്വരമാണ് പാരലോക ജീവിതം അനശ്വരവും.അനശ്വരമായ പരലോക ജീവിതം സുരക്ഷിതവും സുഖകരവുമാക്കേണ്ടതിനാവശ്യമായ മുന്നൊരുക്കങ്ങളെല്ലാം ഈ ലോക ജീവിതത്തിൽ തന്നെ തയ്യാർ ചെയ്യേണ്ടതാണ് അത് ചെയ്യാത്തവർ അവിടെ ഗുരുതരമായ കഷ്ട നഷ്ടങ്ങൾക്ക് പാത്രമായിത്തീരുകയും ചെയ്യും.അതിനാൽ പരലോകത്തെ സുഖ ജീവിതത്തിനു തടസ്സമുണ്ടാക്കുന്നവരെല്ലാം അവന്റെ ശത്രുക്കൾ തന്നെയാണ് .മനുഷ്യൻ അവന്റെ ഭാര്യാ സന്താനങ്ങളെ അതിയായി സ്നേഹിക്കുന്നവരാണ് അവർക്ക് വേണ്ടി ഉറക്കമൊഴിക്കാനും കഠിനാദ്ധ്വാനം ചെയ്യാനും സന്നദ്ധരാണ് അങ്ങനെയുള്ള ഭാര്യ മക്കളുടെ ദുശ്ശാഠ്യത്തിനോ നിർബന്ധത്തിനോ വഴങ്ങി അവൻ ചിലപ്പോൾ പല തെറ്റുകളും ചെയ്യുകയും അതിന്റെ ഫലമായി പരലോകത്ത് പരാചയപ്പെടുകയും ചെയ്യും.ഇവരുടെ തലയണ മന്ത്രം കേട്ട് കുടുംബത്തെ കയ്യൊഴിക്കാനും അയൽക്കാരോട് വഴക്കിടാനും സ്നേഹിതരുമായി തെറ്റിപ്പിരിയാനും ഇടവരും.ഇവരുടെ ഉപദേശമനുസരിച്ച് ദാന ധർമ്മങ്ങൾ മുടക്കാനും ധൂർത്ത് കാണിക്കാനും മത പരമായ പല നന്മകളും കയ്യൊഴിക്കാനും ഇവരോടുള്ള സ്നേഹം കാരണമാകാറുണ്ട്.അങ്ങനെ നന്മയിൽ നിന്ന് തന്നെ അകറ്റുകയും തിന്മ ചെയ്യിപ്പിക്കുകയും ചെയ്യുന്ന ഭാര്യ മക്കൾ തന്റെ ശത്രുവാണെന്ന് തിരിച്ചറിയണമെന്നാണിവിടെ താക്കീത് ചെയ്യുന്നത് അതെ സമയം പരലോക നന്മക്ക് തനിക്ക് പ്രചോദനം നൽകുന്ന ഭാര്യ മക്കൾ തന്റെ ഏറ്റവും വലിയ ഭാഗ്യമാണെന്നും ഇസ്ലാം നിരീക്ഷിച്ചിട്ടുണ്ട്.ഈ സൂക്തത്തിന്റെ അവതരണ പാശ്ചാത്തലമായി ഇബ്നു അബ്ബാസ്(റ)പഠിപ്പിക്കുന്നത്

മക്കയിൽ സത്യ വിശ്വാസം സ്വീകരിച്ച ചില പുരുഷന്മാർ മദീനയിലേക്ക് പാലായനത്തിനൊരുങ്ങിയപ്പോൾ അവരുടെ കുടുംബങ്ങൾ അവരെ തടയുകയും ഹിജ് റ എന്ന നന്മയിൽ നിന്ന് മുടക്കുകയും ചെയ്തപ്പോഴാണീ സുക്തം അവതരിച്ചത്.

'നിങ്ങൾ മാപ്പ് ചെയ്ത് കൊടുക്കുന്നുവെങ്കിൽ' എന്ന് അള്ളാഹു പറഞ്ഞത് ഇങ്ങനെ നന്മ മുടക്കാൻ ശ്രമിച്ച ഭാര്യാ സന്താനങ്ങൾ തെറ്റ് ബോദ്ധ്യപ്പെട്ട് തിരുത്താൻ ശ്രമിച്ചാൽ നിങ്ങൾ അവർക്ക് മാപ്പ് ചെയ്യുകയും വിട്ട് കൊടുക്കുകയും ചെയ്യണമെന്നും അങ്ങനെ നിങ്ങൾ ചെയ്യുന്ന പക്ഷം അള്ളാഹു നിങ്ങൾക്കും മാപ്പ് നൽകുമെന്നും ഉണർത്താനാണ്

15) إِنَّمَا أَمْوَالُكُمْ وَأَوْلَادُكُمْ فِتْنَةٌ وَاللَّهُ عِندَهُ أَجْرٌ عَظِيمٌ

അനിശ്ചയമായും നിങ്ങളുടെ സ്വത്തുക്കളും സന്താനങ്ങളും ഒരു പരീക്ഷണം മാത്രമാണ് അള്ളാഹുവാകട്ടെ അവന്റെ അടുത്ത് വമ്പിച്ച പ്രതിഫലമുണ്ട് താനും

സ്വത്തും സന്താനങ്ങളും പരീക്ഷണമാണെന്ന് പറഞ്ഞത് വളരെ ശ്രദ്ധേയമാണ്.അത് രണ്ടും മനുഷ്യനു ഉപകാരമാവും പോലെ ഉപദ്രവവുമാകാം .ഈ പരീക്ഷണത്തെ അള്ളാഹുവിന്റെ ത്ര്‌പ്തിക്ക് പറ്റും വിധം ഉപയോഗപ്പെടുത്തുകയാണ് വേണ്ടതെന്നും അള്ളാഹുവിന്റെ ത്ര്‌പ്തിയും അവന്റെ കല്പനയും അവഗണിച്ച് ഇവരെ സന്തോഷിപ്പിച്ച് ഈ പരീക്ഷണത്തിൽ പരാചയപ്പെടരുതെന്നും കാരണം അള്ളാഹുവിന്റെ സന്നിധിയിലാണ് വമ്പിച്ച പ്രതിഫലമുള്ളതെന്നും(അത് നഷ്ടപ്പെടുന്ന ഒന്നും ചെയ്യരുതെന്നും സാരം

16) فَاتَّقُوا اللَّهَ مَا اسْتَطَعْتُمْ وَاسْمَعُوا وَأَطِيعُوا وَأَنفِقُوا خَيْرًا لِّأَنفُسِكُمْ وَمَن يُوقَ شُحَّ نَفْسِهِ فَأُوْلَئِكَ هُمُ الْمُفْلِحُون

അത് കൊണ്ട് നിങ്ങൾക്ക് സാദ്ധ്യമായ വിധം അള്ളാഹുവിനെ സൂക്ഷിക്കുക നിങ്ങൾ കേൾക്കുകയും അനുസരിക്കുകയും നിങ്ങൾക്ക് സ്വന്തം തന്നെ ഗുണമായ നിലക്ക് ധനം ചിലവഴിക്കുകയും ചെയ്യുക ആരെങ്കിലും തന്റെ മനസ്സിന്റെ ആർത്തിയിൽ നിന്ന് സുരക്ഷിതരാക്കപ്പെടുന്നതായാൽ അവർ തന്നെയാണ് വിജയികൾ

ധനവും മക്കളും മുഖേനയുള്ള പരീക്ഷണത്തിൽ വിജയികളാവാനുള്ള മാർഗമാണീ സൂക്തം പഠിപ്പിക്കുന്നത്.എല്ലാ വിഷയത്തിലും കഴിയും വിധം അള്ളാഹുവിന്റെ വിധി വിലക്കുകൾ സൂക്ഷിക്കുക.അള്ളാഹുവെ സൂക്ഷിക്കേണ്ട ക്രമത്തിൽ സൂക്ഷിക്കണമെന്ന സൂക്തം(3/102) അവതരിച്ചപ്പോൾ സഹാബികൾക്ക് വല്ലാത്ത പ്രയാസമനുഭവപ്പെട്ടു.ഞങ്ങൾക്കിത് പൂർണ്ണമായി നടപ്പാക്കാൻ കഴിയില്ലല്ലൊ (ചിലപ്പോൾ ചില പുണ്യങ്ങൾ നഷ്ടപ്പെട്ട് പോയാലോ) എന്ന് അവർ വിഷമം പ്രകടിപ്പിച്ചു അപ്പോഴാണ് നന്മയിൽ നിന്ന് നിങ്ങൾക്ക് കഴിയുന്നത്ര പ്രവർത്തിക്കുക എന്ന് അള്ളാഹു അവതരിപ്പിച്ച് അവരെ ആശ്വസിപ്പിച്ചത് അള്ളാഹുവും റസൂലും പറഞ്ഞത് അനുസരിക്കുക അവരവർക്ക് ഗുണകരമായി തീരുന്നവയിൽ ധനം ചിലവഴിക്കുക എന്നിവയെല്ലാം പ്രാവർത്തികമാക്കിയാൽ പരീക്ഷണത്തിൽ വിജയിക്കും എന്നാൽ ഇതെല്ലാം തകിടം മറിക്കുന്നതാണ് പിശുക്ക്.തന്റെ കയ്യിലുള്ളത് ചിലവഴിക്കാതിരിക്കലും മറ്റുള്ളവരുടെത് കൊതിക്കലുമാണ് ഇവിടെ പറഞ്ഞ ആർത്തി.ഇതിൽ നിന്ന് രക്ഷപ്പെട്ടാലേ വിജയിക്കാനാവൂ എന്നാണിവിടെ ഉണർത്തുന്നത്.നിർബന്ധങ്ങൾക്ക് പുറമെ പരമാവധി സുന്നത്തുകൾ കൂടി പകർത്താനാണ് സാധിക്കും വിധം സൂക്ഷിക്കുക എന്ന് പറഞ്ഞത്.എന്നാൽ തിന്മകൾ ഒഴിവാക്കാൻ സാധിക്കാതെ വരില്ലല്ലൊ അതിനാൽ തെറ്റുകൾ ചെയ്യാൻ ഒരു ന്യായവുമില്ല.ഞാൻ നിങ്ങളോട് വല്ല കാര്യവും കൽ‌പ്പിച്ചാൽ അതിൽ നിന്ന് നിങ്ങൾക്ക് സാദ്ധ്യമായതെല്ലാം ചെയ്യണമെന്നും നിങ്ങളോട് ഞാൻ എന്ത് വിരോധിച്ചാലും അത് ഉപേക്ഷിക്കണമെന്നും നബി(സ)പറഞ്ഞതിന്റെ ചുരുക്കം ഇതാണ്

17 ) إِن تُقْرِضُوا اللَّهَ قَرْضًا حَسَنًا يُضَاعِفْهُ لَكُمْ وَيَغْفِرْ لَكُمْ وَاللَّهُ شَكُورٌ حَلِيمٌ

അള്ളാഹുവിനു നിങ്ങൾ നല്ല കടം കൊടുക്കുന്നതായാൽ അവൻ നിങ്ങൾക്കതിരട്ടിപ്പിച്ച് തരുന്നതും നിങ്ങൾക്കവൻ പൊറുത്തു തരുന്നതുമാകുന്നു അള്ളാഹു ഏറ്റവും നന്ദി സ്വീകരിക്കുന്നവനും സഹനമുള്ളവനുമാകുന്നു

കടം കൊടുക്കുക എന്നത് കൊണ്ട് അള്ളാഹു ഇഷ്ടപ്പെട്ട മാർഗത്തിൽ ധർമ്മം ചെയ്യുക എന്നാണ് ഉദ്ദേശ്യം.അത് ഇരട്ടിപ്പിച്ച് തരുമെന്നാ‍ൽ പത്ത് മുതൽ എഴുന്നൂർ ഇരട്ടി വരെയും അതിനപ്പുറവും അള്ളാഹു പ്രതിഫലം നൽകുമെന്നും അവനു ചെയ്യുന്ന സൽക്കർമ്മങ്ങൾക്ക് പ്രതിഫലം അള്ളാഹു നൽകുമെന്നും നിങ്ങളിൽ നിന്ന് സംഭവിക്കുന്ന ദോഷങ്ങൾക്ക് ഉടൻ ശിക്ഷ നൽകാതെ അവൻ സഹനം കാണിക്കുന്നവനാണെന്നും ഉണർത്തിയിരിക്കുകയാണ്

18) عَالِمُ الْغَيْبِ وَالشَّهَادَةِ الْعَزِيزُ الْحَكِيمُ

അവൻ അദൃശ്യകാര്യവും ദൃശ്യകാര്യവും അറിയുന്നവനും പ്രതാപ ശാലിയും അഗാധജ്ഞനുമാകുന്നു

എല്ലാം അറിയുന്ന അള്ളാഹു അവൻ ഇച്ചിക്കുന്നതെല്ലാം നടപ്പാക്കാൻ പ്രതാപമുള്ളവനും അഗാധജ്ഞനുമാണ് അവന്റെ വിധികൾ അനുസരിക്കാനും ദോഷ ബാധയെ സൂക്ഷിക്കാനും നമുക്ക് പ്രചോദനം നൽകുകയാണിതിലൂടെ .അള്ളാഹു അവന്റെ ഇഷ്ട ജനങ്ങളിൽ നമ്മെയെല്ലാം ഉൾപ്പെടുത്തട്ടെ ആമീൻ

അദ്ധ്യായം 63 : സൂറത്തുൽ മുനാഫിഖൂൻ

2011-12-28T16:35:00.000+04:00

سورة المنافقون

മദീനയിൽ അവതരിച്ചു : വാക്യങ്ങൾ 11

بسم الله الرحمن الرحيم

പരമ കാരുണികനും കരുണാനിധിയുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

إِذَا جَاءكَ الْمُنَافِقُونَ قَالُوا نَشْهَدُ إِنَّكَ لَرَسُولُ اللَّهِ وَاللَّهُ يَعْلَمُ إِنَّكَ لَرَسُولُهُ وَاللَّهُ يَشْهَدُ إِنَّ الْمُنَافِقِينَ لَكَاذِبُونَ (1

(നബിയേ)അങ്ങയുടെ അടുക്കൽ കപടവിശ്വാസികൾ വരുമ്പോൾ, നിശ്ചയമായും തങ്ങൾ അള്ളാഹുവിന്റെ റസൂൽ തന്നെയാണെന്ന് ഞങ്ങൾ സാക്ഷ്യപ്പെടുത്തുന്നു, എന്ന് അവർ പറയും.തങ്ങൾ അള്ളാഹുവിന്റെ റസൂൽ തന്നെയാണെന്ന് അള്ളാഹുവിന്നറിയാം.കപട വിശ്വാസികൾ കള്ളം പറയുന്നവർ തന്നെയാണെന്ന് അള്ളാഹു സാക്ഷ്യപ്പെടുത്തുകയും ചെയ്യുന്നു

ബാഹ്യമായി മുസ്ലിമാണെന്ന് നടിക്കുകയും ഉള്ളിൽ സത്യനിഷേധം ഒളിപ്പിച്ചു വെക്കുകയും ചെയ്യുന്നവർക്കാണ് മുനാഫിഖുകൾ-കപടവിശ്വാസികൾ-എന്ന് പറയുന്നത്.അങ്ങനെയുള്ള ചിലർ മദീനയിലുമുണ്ടായിരുന്നു. നബി(സ)യുടെയും സത്യവിശ്വാസികളുടെയും മുന്നിലെത്തുമ്പോൾ വിശ്വസിച്ചവരാണ് ഞങ്ങൾ എന്ന് സത്യം ചെയ്ത് ആണയിട്ട് സ്ഥാപിക്കാൻ അവർ ശ്രമിക്കുമായിരുന്നു. എന്നാൽ അവരുടെ വാക്കുകൾ സത്യത്തിനെതിരാണെന്നും കള്ള സത്യമാണവർ ചെയ്തിരിക്കുന്നതെന്നും അള്ളാഹു വ്യക്തമാക്കിയിരിക്കുന്നു

ഇമാം ഖുർത്വുബി എഴുതുന്നു ഇമാം ബുഖാരി(റ)സൈദു ബിൻ അർഖമിൽ നിന്ന് റിപ്പോർട്ട് ചെയ്യുന്നുഞാൻ എന്റെ പിത്ര്‌വ്യനോടൊപ്പം ഒരു യുദ്ധത്തിലായിരിക്കെ (തബൂഖ് യുദ്ധമാണതെന്നും ബനുൽ മുസ്ഥലഖ് യുദ്ധമാണെന്നും അഭിപ്രായമുണ്ട്- ഫത്ഹുൽബാരി) കപട നേതാവ് അബ്ദുള്ളാഹ് ബിൻ ഉബയ്യ് ബിൻ സുലൂൽ പറയുന്നത് ഞാൻ കേട്ടു.(യാത്രക്കിടയിൽ വിശ്രമത്തിനിറങ്ങിയിടത്ത് വെച്ചായിരുന്നു ഈ സംസാരം-ഫത്ഹുൽ ബാരി‌)നബി(സ)യുടെ അടുത്തുള്ളവർക്ക് അവർ നബി(സ)യുടെ അടുത്ത് നിന്ന് പിരിഞ്ഞു പോകും വരെ നിങ്ങൾ ഒന്നും ചിലവഴിക്കരുത് എന്നും. നാം മദീനയിൽ മടങ്ങിയെത്തിയാൽ അവിടെയുള്ള യോഗ്യന്മാർ താഴ്ന്നവരെ പുറത്താക്കും(സഹാബത്തിനെയായിരുന്നു താഴ്ന്നവർ എന്ന് അവൻ ഉദ്ദേശിച്ചത്)എന്നും അവൻ പറയുന്നതാണ് ഞാൻ കേട്ടത്.ഞാൻ അത് എന്റെ പിതൃവ്യനോട് പറയുകയും അദ്ദേഹം നബി(സ)യെ അറിയിക്കുകയും ചെയ്തു.അപ്പോൾ നബി(സ)കപടനേതാവിനെയും അനുയായികളെയും വിളിപ്പിച്ച് നിങ്ങൾ ഇങ്ങനെ പറഞ്ഞോ എന്ന് ചോദിക്കുകയും ഞങ്ങൾ അങ്ങനെ പറഞ്ഞിട്ടേയില്ലെന്ന് അവർ സത്യം ചെയ്യുകയും ചെയ്തു,അപ്പോൾ അവരുടെ സത്യം നബി(സ)സ്വീകരിക്കുകയും എന്നെ നിരാകരിക്കുകയും ചെയ്തു.ജീവിതത്തിൽ ഒരിക്കലുമുണ്ടായിട്ടില്ലാത്ത വിധം ഞാൻ മാനസികമായി വിഷമിച്ചു.പിന്നെ പുറത്തിറങ്ങാതെ ഞാൻ വീട്ടിൽ തന്നെ ഇരിപ്പായി(ഞാൻ നബി(സ)യോട് കള്ളം പറഞ്ഞു എന്ന് പലരും എന്നെക്കുറിച്ച് ധരിക്കുകയും ആപ്രതിഷേധം അവർ പ്രകടിപ്പിക്കുകയും ചെയ്തു.അതായിരുന്നു ഞാൻ പുറത്തിറങ്ങാതിരിക്കാൻ കാരണം)അപ്പോൾ ഈ അദ്ധ്യായത്തിന്റെ ആദ്യം മുതൽ കപടനേതാവിന്റെ പ്രസ്താവനയടക്കമുള്ള ഭാഗങ്ങൾ അള്ളാഹു അവതരിപ്പിച്ചു.അപ്പോൾ നബി(സ)എന്റെ ആടുത്തേക്ക് വിളിക്കാനായി ആളെ അയക്കുകയും നിങ്ങളെ അള്ളാഹു സത്യമാക്കിയിരിക്കുന്നു എന്ന് പറയുകയും ചെയ്തു(ബുഖാരി ഹദീസ് നമ്പർ 4900)

ഇമാം തുർമുദിയുടെ സുനനിൽ 3313-മത് ഹദീസിൽ ഇങ്ങനെ കാണാം സൈദ് ബിൻ അർഖം(റ)പറഞ്ഞു.ഞങ്ങൾ നബി(സ)യോടൊപ്പം യുദ്ധത്തിനു പുറപ്പെട്ടു.എവിടെയെങ്കിലും സംഘം ഇറങ്ങിയാൽ വെള്ളമുള്ളിടത്തേക്ക് ഞങ്ങൾ വേഗം പോകും എന്നാൽ ഗ്രാമീണരായ അറബികൾ ഏറ്റവും ആദ്യം വെള്ളത്തിന്റടുത്ത് എത്തുമായിരുന്നു.അങ്ങനെ ഒരു ഗ്രാമീണൻ മുന്നോട്ട് വന്ന് വെള്ളം കെട്ടി നിർത്തുകയും ചുറ്റുഭാഗത്തും കല്ലുകൾ വെക്കുകയും അതിന്റെ മേൽ തോൽ വിരിപ്പിട്ട് തന്റെ കൂട്ടുകാർവരാനായി കാത്തിരിക്കുകയും ചെയ്തു.അപ്പോൾ അൻസാരികളിൽ പെട്ട ഒരു യോദ്ധാവ് ആ കെട്ടി നിർത്തിയ വെള്ളത്തിൽ നിന്ന് തന്റെ ഒട്ടകത്തെ വെള്ളം കുടിപ്പിക്കാൻ ശ്രമിച്ചു.ഗ്രാമീണൻ അത് തടഞ്ഞു.അപ്പോൾ കെട്ടിയ നിർത്തിയ വെള്ളം ആ അൻസാരി പൊട്ടിച്ച് വിടാനായി കെട്ടി നിർത്താനുപയോഗിച്ച ഒരു കല്ല് വലിച്ചൂരി.ഗ്രാമീണൻ ഒരു മരക്കഷ്ണമെടുത്ത് അൻസാരിയുടെ തലക്കടിക്കുകയും മുറിവ് പറ്റുകയും ചെയ്തു.അപ്പോൾ ആ അൻസാരി കപടനേതാവായ അബ്ദുള്ളാഹ് ബിൻ ഉബ്അയ്യ് ബിൻ സുലൂലിനോട് പോയി പരാതി പറഞ്ഞു.അപ്പോൾ അബ്ദുള്ളക്ക് ദേഷ്യം വരികയും റസൂലിന്റെ അടുത്ത് നിന്ന് അവർ പോകും വരെ നിങ്ങൾ ഒന്നും ചിലവഴിക്കരുത് –ഗ്രാമീണരെ ഉദ്ദേശിച്ചാണ് അവൻ ചുറ്റുഭാഗത്തുള്ളവർ എന്ന് പറഞ്ഞത് നബി(സ)യുടെ അടുത്ത് ഭക്ഷണം കൊണ്ടു വന്നാൽ ഗ്രാമീണർ അത് കഴിക്കാൻ എത്താറുണ്ടായിരുന്നു.ഇനി അവർക്ക് ഒന്നും കൊടുക്കരുതെന്നാണ് അവന്റെ വാക്കിന്റെ ധ്വനി-അതോടൊപ്പം നാം മദീനയിൽ മടങ്ങിയെത്തിയാൽ യോഗ്യരായ നാം ഗ്രാമീണരെ പുറത്താക്കുമെന്നും അവൻ പ്രഖ്യാപിച്ചു.കപടനേതാവിന്റെ ഈ പ്രഖ്യാപനം കേട്ട ഞാൻ അത് എന്റെ പിതൃവ്യനോട് പറയുകയും അവർ നബി(സ)യെ അറിയിക്കുകയുംനബി(സ)കപടനേതാവിനോട് വിശദീകരണം തേടുകയും അവൻ അത് നിഷേധിക്കുകയും ചെയ്തു.അപ്പോൾ അവനെ സ്വീകരിക്കുകയും എന്റെ വാദം നിരാകരിക്കുകയും ചെയ്തു.ഞാൻ നബി(സ)യോട് നുണ പറഞ്ഞു എന്ന് സഹാബികൾ പലരും ധരിച്ചപ്പോൾ എനിക്ക് വല്ലാത്ത വിഷമമായി.അങ്ങനെ നബി(സ)ക്കൊപ്പം ദു:ഖത്താൽ കുനിഞ്ഞ മുഖവുമായി യാത്ര തുടരവെ നബി(സ)എന്റെ അടുത്ത് വരികയും എന്റെ ചെവിയിൽ പിടിച്ച് ഉരസുകയും എന്നെ നോക്കി ചിരിക്കുകയും ചെയ്തു.സാശ്വതമായി ഭൂമിയിൽ ജീവിക്കുന്നതിനേക്കാൾ വലിയ സന്തോഷമാണ് ആ സമയത്ത് എനിക്കുണ്ടായത്.പിന്നീട് അബൂബക്കർ(റ)എന്റെ അടുത്ത് വന്ന് നബി(സ)എന്ത് പറഞ്ഞു എന്ന് ചോദിക്കുകയും ചെയ്തു.ഒന്നും പറഞ്ഞില്ലെന്നും ചെവിപിടിച്ചുരസുകയും ചിരിക്കുകയുമാണ് ചെയ്തതെന്നും ഞാൻ പറഞ്ഞു.സന്തോഷിക്കുക എന്ന് പറഞ്ഞ് അബൂബകർ(റ)മാറി.പിന്നീട് ഇതേ പോലെ ഉമർ(റ)വും ചെയ്തു.പിന്നീട് വന്ന പ്രഭാതത്തിൽ നബി(സ)ഈ അദ്ധ്യായം പാരായണം ചെയ്തു

അബ്ദുള്ളാഹ് ബിൻ അംറ്(റ) റിപ്പോർട്ട് ചെയ്യുന്നു നബി(സ)പറഞ്ഞു.നാലു കാര്യങ്ങൾ ഒരാളിലുണ്ടായാൽ അവൻ പൂർണ്ണ കപടനാണ്.ഇതിൽ നിന്ന് ഒരു കാര്യം ഒരാളിൽ ഉണ്ടായാൽ കാപട്യത്തിന്റെ ഒരു കാര്യം അവനിലുണ്ടാകും അത് അവൻ ഒഴിവാക്കും വരെ.വിശ്വസിക്കപ്പെട്ടാൽ വഞ്ചന കാണിക്കുക,സംസാരിച്ചാൽ കള്ളം പറയുക,വാഗ്ദാനം ചെയ്താൽ വഞ്ചന കാണിക്കും,പിണങ്ങിയാൽ തെറി പറയും.ഇത് സത്യവിശ്വാസികൾക്കുള്ള ശക്തമായ താക്കീതാണ്.ഈ ദു:സ്വഭാവങ്ങൾ നമ്മിലുണ്ടോ എന്ന് ചിന്തിക്കുകയും ഉണ്ടെങ്കിൽ അത് ഒഴിവാക്കുകയും വേണം(ഖുർത്വുബി)

അവർ സാക്ഷ്യം വഹിക്കും എന്ന് പറഞ്ഞത് അവരുടെ മനസ്സിൽ നബി(സ)അള്ളാഹുവിന്റെ റസൂലാണെന്ന് വിശ്വാസമുണ്ടെന്ന സത്യം ചെയ്തു കൊണ്ട് തങ്ങളുടെ കാപട്യം മറച്ചു വെക്കലാണവരുടെ ഉദ്ദേശ്യം.എന്നാൽ തങ്ങൾ - അവർ പറഞ്ഞത് പോലെ- അള്ളാഹുവിന്റെ റസൂലാണെന്ന് അള്ളാഹുവിനറിയാം.എന്നാൽ അവർക്ക് അങ്ങനെ വിശ്വാസമുണ്ടെന്ന വാദം കള്ളമാണെന്ന് അള്ളാഹു സാക്ഷ്യം വഹിക്കുകയും ചെയ്യുന്നു.ഒന്നു പറയുകയും അതിനെതിരു വിശ്വസിക്കുകയും ചെയ്താൽ അവൻ കള്ളനാണെന്ന് ഇതിൽ നിന്ന് മനസിലാക്കാം(ഖുർത്വുബി)

اتَّخَذُوا أَيْمَانَهُمْ جُنَّةً فَصَدُّوا عَن سَبِيلِ اللَّهِ إِنَّهُمْ سَاء مَا كَانُوا يَعْمَلُونَ 2

അവർ തങ്ങളുടെ സത്യങ്ങളെ ഒരു മറയാക്കി വെച്ചിരിക്കുകയാണ്.അങ്ങനെ അള്ളാഹുവിന്റെ മാർഗത്തിൽ നിന്ന് അവർ (ജനങ്ങളെ) തടയുന്നു നിശ്ചയമായും അവർ പ്രവർത്തിച്ചു കൊണ്ടിരിക്കുന്നത് വളരെ ചീത്ത തന്നെ!

സ്വന്തം മറ പൊളിയാതിരിക്കാനുള്ള ഒരു അടവ് മാത്രമാണീ സത്യം ചെയ്യൽ എന്നും അത് മുഖേന ചില നല്ല മനുഷ്യരെ വഞ്ചിക്കാനും അവരുടെ വലയിൽ പെടുത്തുവാനും അവർക്ക് സാധിച്ചിരുന്നുവെന്നും ഇത് വളരെ ദുഷിച്ച നിലപാടാണെന്നും അള്ളാഹു അറിയിക്കുന്നു

അവരുടെ സാക്ഷ്യത്തെക്കുറിച്ചല്ലഅവർ സത്യത്തെ മറയാക്കി എന്ന് പറഞ്ഞത് മറിച്ച് തുടക്കത്തിൽ പറഞ്ഞ പോലെ പറഞ്ഞത് പറഞ്ഞിട്ടില്ലെന്ന് പറഞ്ഞ സത്യത്തെയാണിവിടെ ഉദ്ദേശ്യം

അള്ളാഹുവിന്റെ മാർഗം അവർ അവഗണിച്ചു എന്നും ഇവിടെ ആശയമാകാം ഞങ്ങൾ തന്നെ വിശ്വസിച്ചിട്ടില്ല ഞങ്ങൾ അവരെ നിഷേധിച്ചിരിക്കുന്നു മുഹമ്മദ്(സ)ശരിയായ പ്രവാചകനായിരുന്നെങ്കിൽ ഇത് മനസിലാക്കേണ്ടതായിരുന്നില്ലേ എന്ന് പറഞ്ഞ് കൊണ്ട് ജൂതരെയും ബഹുദൈവാരാധകരെയും ഇസ്ലാമിലേക്ക് വരുന്നതിൽ നിന്ന് അവർ തടഞ്ഞു എന്നും ഇവിടെ ഉദ്ദേശ്യമാകാം.എന്നാൽ അവരുടെ മനസിൽ വിശ്വാസമില്ലെന്ന് അറിയാത്തത് കൊണ്ടല്ല പരസ്യമായി ശഹാദത്ത് കലിമ ചൊല്ലിയവനെ ബാഹ്യമായി മുസ്ലിമായി കണക്കാക്കലും അവന്റെ കാപട്യത്തിന്റെ ശിക്ഷ പരലോകത്തേക്ക് മാറ്റിവെക്കലുമാണ് ഇസ്ലാമിന്റെ ശൈലി എന്നത് കൊണ്ടാണ് നേരത്തെ അവരെ പരസ്യമായി വഷളാക്കാതിരുന്നത് എന്നുമാണ് അള്ളാഹു ഇവിടെ ഉണർത്തുന്നത് അവരുടെ ഈ കാപട്യവും സത്യത്തിൽ നിന്ന് ആളുകളെ തിരിച്ചു വിടലുമൊക്കെ വളരെ ചീത്തയായ നടപടിയാണെന്നും അള്ളാഹു ഉണർത്തുന്നു

ذَلِكَ بِأَنَّهُمْ آمَنُوا ثُمَّ كَفَرُوا فَطُبِعَ عَلَى قُلُوبِهِمْ فَهُمْ لَا يَفْقَهُونَ (3

അത് അവർ (നാവുകൊണ്ട് മാത്രം)വിശ്വസിക്കുകയും (ഹൃദയം കൊണ്ട്)നിഷേധിക്കുകയും ചെയ്തത് കൊണ്ടാണ്.അതിനാൽ അവരുടെ ഹൃദയങ്ങൾക്ക് മുദ്രവെക്കപ്പെട്ടിരിക്കുന്നു അതിനാൽ അവർ സത്യം ഗ്രഹിക്കുന്നില്ല

അവർ ഇത്രയും ദുഷിച്ച് പോയത് നാവുകൊണ്ട് വിശ്വസിച്ചു എന്ന് പറയുകയും മനസ്സിൽ അവിശ്വാസം കൊണ്ട് നടക്കുകയും ചെയ്തത് കൊണ്ടാണ്. ഇതിന്റെ

ഫലമായി അവരുടെ ഹ്ര്‌ദയങ്ങൾ ഏറ്റവും കടുത്ത് പോവുകയും മേലിൽ ഒരു നന്മയും കടക്കാത്ത വിധം അവ അടച്ചു പൂട്ടിമുദ്രവെക്കപ്പെടുകയും ചെയ്തു.അതിനാൽ ഇനി അവർ സത്യം ഗ്രഹിക്കുമെന്ന് പ്രതീക്ഷിക്കാവതല്ല

وَإِذَا رَأَيْتَهُمْ تُعْجِبُكَ أَجْسَامُهُمْ وَإِن يَقُولُوا تَسْمَعْ لِقَوْلِهِمْ كَأَنَّهُمْ خُشُبٌ مُّسَنَّدَةٌ يَحْسَبُونَ كُلَّ صَيْحَةٍ عَلَيْهِمْ هُمُ الْعَدُوُّ فَاحْذَرْهُمْ قَاتَلَهُمُ اللَّهُ أَنَّى يُؤْفَكُونَ (4

അവരെ നിങ്ങൾ കണ്ടാൽ അവരുടെ ശരീരങ്ങൾ നിങ്ങളെ അത്ഭുതപ്പെടുത്തും.സംസാരിക്കുകയാണെങ്കിൽ അവർ പറയുന്നത് നിങ്ങൾ ശ്രദ്ധിച്ചു കേൾക്കുകയും ചെയ്യും.ചാരിവെക്കപ്പെട്ട മരത്തടികളെന്നോണമാണവർ.എല്ലാ ശബ്ദവും തങ്ങൾക്കെതിരാണെന്ന് അവർ വിചാരിക്കും അവർ ശത്രുക്കളാണ്.അതിനാൽ അവരെ സൂക്ഷിച്ചു കൊള്ളുക.അള്ളാഹു അവരെ ശപിക്കട്ടെ എങ്ങിനെയാണവർ(സത്യം വിട്ട്)തെറ്റിക്കപ്പെടുന്നത്?

അവരെ കണ്ടാൽ അഴകുള്ള ശരീരവും ആകർഷകമായ സംസാരവും ആയതിനാൽ ആരും ശ്രദ്ധിച്ച് പോകും(കപട നേതാവ് അബ്ദുള്ളാഹ് ബിൻ ഉബയ്യ് ബിൻ സുലൂൽ നല്ല സംസാര വൈഭവം പ്രകടിപ്പിച്ചിരുന്ന ആരോഗ്യവും ആകർഷകമായ ശരീരവുമുണ്ടായിരുന്ന ആളായിരുന്നു എന്ന് ഇബ്നു അബ്ബ്ബ്ബാസ്(റ) പറഞ്ഞിട്ടുണ്ട്) പക്ഷെ അവർ ചാരിവെച്ച മരത്തടി പോലെയാണ് ഉപകാരമില്ല ധീരതയുമില്ല വല്ല ശബ്ദവും കേട്ടാൽ വിളറിയായി.തങ്ങൾക്കെതിരിൽ വല്ല ആപത്തും വരുന്നുവെന്നാണ് ധാരണ.തങ്ങളുടെ കാപട്യം പുറത്താക്കും വിധം വല്ല പ്രഖ്യാപനവും അള്ളാഹുവിൽ നിന്ന് വരുമോ എന്നവർ ഭയപ്പെട്ടിരുന്നു. പക്ഷെ അവർ തങ്ങളുടെ ശത്രുക്കളാണെന്നും കുതന്ത്രങ്ങളിലും വഞ്ചനയിലും മിടുക്കന്മാരാണെന്നും .അത് കൊണ്ട് അവരെ സൂക്ഷിക്കണമെന്നും അവരുടെ ഒരു കുതന്ത്രങ്ങളിലും കുടുങ്ങരുതെന്നുമാണ് അള്ളാഹു ഉണർത്തുന്നത് അവർ അള്ളാഹുവിന്റെ ശാപത്തിനർഹരാണെന്നത്രെ തുടർന്ന് പറഞ്ഞത്.നബി(സ)സത്യ പ്രവാചകനാണെന്നതിനു എത്രയോ വ്യക്തമായ തെളിവുകൾ അവർക്ക് ലഭിച്ചിട്ടുണ്ടെന്നും പിന്നെയും അവർ സത്യത്തിൽ നിന്ന് തെറ്റിക്കപ്പെട്ടത് എങ്ങനെ എന്ന് ആശ്ചര്യം പ്രകടിപ്പിക്കുകയാണിവിടെ

وَإِذَا قِيلَ لَهُمْ تَعَالَوْا يَسْتَغْفِرْ لَكُمْ رَسُولُ اللَّهِ لَوَّوْا رُؤُوسَهُمْ وَرَأَيْتَهُمْ يَصُدُّونَ وَهُم مُّسْتَكْبِرُونَ 5

നിങ്ങൾ വരൂ അള്ളാഹുവിന്റെ റസൂൽ നിങ്ങൾക്ക് വേണ്ടി പൊറുക്കലിനെ തേടും എന്ന് അവരോട് പറയപ്പെട്ടാൽ അവർ അവരുടെ തലകൾ തിരിച്ചു കളയും.അഹംഭാവം നടിച്ചവരായിക്കൊണ്ട് അവർ തിരിഞ്ഞു പോകുന്നതായി തങ്ങൾ കാണുകയും ചെയ്യും

കപടന്മാരുടെ ദുഷിച്ച നിലപാടുകളെക്കുറിച്ച് വിവരിക്കുകയാണിനി.നബി(സ)യെക്കൊണ്ട് തങ്ങൾക്ക് വേണ്ടി പൊറുക്കലിനെ തേടാൻ ആവശ്യപ്പെടുന്നത് സത്യവിശ്വാസിയുടെ സ്വഭാവമാണ്.കാരണം.നമുക്ക് വേണ്ടി അള്ളാഹുവോട് നബി(സ) നടത്തുന്നശുപാർശ സ്വീകരിക്കപ്പെടാനുള്ള സാദ്ധ്യത കൂടുതലാണ്.അതിനു വേണ്ടി അവരെ ക്ഷണിച്ചാൽ ഞങ്ങൾക്ക് അതിന്റെ ആവശ്യമില്ലെന്ന ഭാവത്തിൽ അഹങ്കാരികളായി അവർ തല തിരിച്ചു പോകും

ഇമാം ഖുർത്വുബി(റ)എഴുതുന്നു.കപടന്മാരെ അനാവരണം ചെയ്തു കൊണ്ടുള്ള മുൻ കഴിഞ്ഞ സൂക്തങ്ങൾ അവതരിച്ചപ്പോൾ അവരുടെ കുടുംബക്കാരായ സത്യവിശ്വാസികൾ അവരുടെ അടുത്ത് ചെന്ന് അള്ളാഹു നിങ്ങളുടെ കാപട്യത്തെ വെളിവാക്കി നിങ്ങളെ വഷളാ‍ക്കിയിരിക്കുന്നു.അതിനാൽ കാപട്യത്തിൽ നിന്ന് പിന്തിരിഞ്ഞ് നബി(സ)യുടെ അടുത്ത് പോയി നബി(സ)യെക്കൊണ്ട് നിങ്ങൾക്ക് വേണ്ടി അള്ളാഹുവോട് പൊറുക്കലിനെ തേടിക്കൂ.അങ്ങനെ അള്ളാഹു നിങ്ങളുടെ ദോഷം പൊറുത്ത് തരട്ടെ എന്ന് പറഞ്ഞു അപ്പോൾ പരിഹാസ പൂർവം അവർ തലതിരിച്ചു കളയുകയും അഹങ്കരിക്കുകയും ചെയ്തു.അബ്ദുള്ളാഹ് ബിബ് ഉബയ്യിനോട് നബി(സ)യുടെ അടുത്ത് പോയി പൊറുക്കലിനെ തേടാൻ ആവശ്യപ്പെടണമെന്ന് പറഞ്ഞപ്പോൾ അവൻ ഇങ്ങനെ പ്രതികരിച്ചു നിങ്ങൾ എന്നോട് വിശ്വസിക്കാൻ പറഞ്ഞു.ഞാൻ അനുസരിച്ചു.സക്കാത്ത് കൊടുക്കാൻ പറഞ്ഞു.ഞാൻ അതും ചെയ്തു.ഇനി ഞാൻ മുഹമ്മദ് നബിക്ക് സുജൂദ് ചെയ്യാനേ ബാക്കിയുള്ളൂ എന്ന്.(ഖുർത്വുബി) നബിയെക്കൊണ്ട് പൊറുക്കലിനെ തേടാൻ ആവശ്യപ്പെടുന്നത് നബിക്കുള്ള ആരാധനയാണെന്ന് കണ്ടെത്തിയത് അവന്റെ ധിക്കാരമായിരുന്നു ഒരിക്കലും മുസ്ലിംകൾക്ക് അത്തരമൊരു അഭിപ്രായമുണ്ടാകാവതല്ലെന്നും നബി(സ)അള്ളാഹുവിലേക്കുള്ള നമ്മുടെ മാധ്യമമാണെന്നും ഈ സൂക്തം നമ്മെ പഠിപ്പിക്കുന്നു

سَوَاء عَلَيْهِمْ أَسْتَغْفَرْتَ لَهُمْ أَمْ لَمْ تَسْتَغْفِرْ لَهُمْ لَن يَغْفِرَ اللَّهُ لَهُمْ إِنَّ اللَّهَ لَا يَهْدِي الْقَوْمَ الْفَاسِقِينَ (6

തങ്ങൾ അവർക്ക് വേണ്ടി പൊറുക്കലിനെ തേടലും തേടാതിരിക്കലും അവരുടെ മേലിൽ സമമാണ് –അള്ളാഹു അവർക്ക് പൊറുത്തുകൊടുക്കുന്നതേയല്ല-ധിക്കാരികളായ ജനതയെ അള്ളാഹു നേർമാർഗത്തിൽ ചേർത്തുകയില്ല തന്നെ

അവർ ദുഷ്ടന്മാരായത് കൊണ്ട് അവർക്ക് വേണ്ടി നബി(സ)പൊറുക്കലിനെ തേടിയാലും അവർക്ക് അള്ളാഹു പൊറുക്കുകയില്ല .കാരണം വിശ്വാസം ശരിയായാലല്ലേ നബി(സ)യുടെ ശുപാർശ ഫലിക്കുകയുള്ളൂ

هُمُ الَّذِينَ يَقُولُونَ لَا تُنفِقُوا عَلَى مَنْ عِندَ رَسُولِ اللَّهِ حَتَّى يَنفَضُّوا وَلِلَّهِ خَزَائِنُ السَّمَاوَاتِ وَالْأَرْضِ وَلَكِنَّ الْمُنَافِقِينَ لَا يَفْقَهُونَ (7

അള്ളാഹുവിന്റെ റസൂലിന്റെ അടുത്തുള്ളവർക്ക് നിങ്ങൾ(ഒന്നും)ചെലവ് ചെയ്യരുത് അവർ (നബിയുടെ അടുത്ത് നിന്ന്)ഒഴിഞ്ഞു പോകാൻ വേണ്ടി എന്ന് പറയുന്നവരാണവർ ആകാശഭൂമികളുടെ ഭണ്ഡാരങ്ങൾ അള്ളാഹുവിനുള്ളതാണ് പക്ഷെ കപട വിശ്വാസികൾ ഇത് ഗ്രഹിക്കുന്നില്ല

കപടന്മാർക്ക് മുസ്ലിംകളോടുണ്ടായിരുന്ന പകയും കുശുമ്പും എത്ര ആഴത്തിലായിരുന്നു എന്ന് മനസിലാക്കാനുപകരിക്കുന്ന ചില കാര്യങ്ങൾ ആണിവിടെ പറയുന്നത്.നബി(സ)യുടെ കൂടെയുണ്ടായിരുന്ന സഹാബികൾക്ക് ഒന്നും നൽകരുതെന്നും അങ്ങനെ വന്നാൽ നബി(സ)യുടെ അടുത്ത് നിന്ന് അവർ ഒഴിഞ്ഞു പോകുമെന്നും അവർ പറഞ്ഞു.എന്നാൽ ഇത് വെറും വ്യാമോഹമാണെന്നും നിങ്ങൾ അവർക്ക് ഒന്നും നൽകിയില്ലെങ്കിലും അവർ വിഷമിക്കേണ്ടി വരില്ല.കാരണം മനുഷ്യരുടെ ആഹാരാദികളും മറ്റും അവരുടെ കയ്യിലല്ലെന്നും ആകാശഭൂമിയിലുള്ള എല്ലാം അള്ളാഹുവിന്റെ നിയന്ത്രണത്തിലാണെന്നും അത് കൊണ്ട് ഇവരുടെ ഭീഷണിക്ക് അല്പം പോലും വിലകൽ‌പ്പിക്കേണ്ടതില്ലെന്നും ഉണർത്തിയിരിക്കുകയാണ്.അള്ളാഹു ഒരു കാര്യം തീരുമാനിച്ചാൽ അതിന്റെ വഴികൾ അള്ളാഹു എളുപ്പമാക്കും എന്ന് കപടന്മാർക്ക് അറിയാത്തത് കൊണ്ടാണ് ഇത്തരം തിട്ടൂരങ്ങൾ അവർ പുറപ്പെടുവിച്ചത് എന്നാണിതിന്റെ ചുരുക്കം

يَقُولُونَ لَئِن رَّجَعْنَا إِلَى الْمَدِينَةِ لَيُخْرِجَنَّ الْأَعَزُّ مِنْهَا الْأَذَلَّ وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَكِنَّ الْمُنَافِقِينَ لَا يَعْلَمُونَ (8

നാം മദീനയിലേക്ക് മടങ്ങിച്ചെന്നാൽ കൂടുതൽ അന്തസ്സുള്ളവർ ഏറ്റവും താഴ്ന്നവരെ അവിടെ നിന്ന് പുറത്താക്കുകതന്നെ ചെയ്യും എന്നവർ പറയുന്നു അന്തസ്സ് അള്ളാഹുവിനും അവന്റെ റസൂലിനും സത്യവിശ്വാസികൾക്കുമാമാണ് താനും!പക്ഷെ കപട വിശ്വാസികൾ (അത്)അറിയുന്നില്ല

ഒരിക്കൽ നബി(സ)യും സഹാബികളും മദീനക്ക് പുറത്തേക്കുള്ള ഒരു യുദ്ധയാത്രയുണ്ടായി.ചില കപടന്മാരും ആകൂട്ടത്തിലുണ്ടായിരുന്നു യാത്രക്കിടയിൽ അവർ പറഞ്ഞു.നാം നാട്ടിൽ മടങ്ങിയെത്തട്ടെ.ആർക്കാണ് അന്തസ്സെന്ന് കാണിച്ചു കൊടുക്കാം .അതായത് അന്തസ്സുള്ള (നമ്മൾ) താഴ്ന്നവരെ(മുസ്ലിംകളെ )അവിടെ നിന്ന് പുറത്താക്കുക തന്നെ ചെയ്യും എന്തൊരു വീരവാദം!ഇവർക്കാണ് അന്തസ്സെന്നും മുസ്ലിംകൾ താഴ്ന്നവരാണെന്നും ആരാണിവരോട് പറഞ്ഞത്?അള്ളാഹുവിനും റസൂലിനും സത്യവിശ്വാസികൾക്കും തന്നെയാണ് അന്തസ്സ്.അതില്ലാതാക്കാൻ ഇവർക്കാവില്ല..പക്ഷെ അത് മനസിലാക്കാൻ ഈ പാവങ്ങൾക്കാവില്ല എന്നാണ് അള്ളാഹു ഉണർത്തിയത്

يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ وَمَن يَفْعَلْ ذَلِكَ فَأُوْلَئِكَ هُمُ الْخَاسِرُونَ 9

സത്യ വിശ്വാസികളേ.നിങ്ങളുടെ സ്വത്തുക്കളും സന്താനങ്ങളും അള്ളാഹുവിന്റെ സ്മരണയിൽ നിന്ന് നിങ്ങളെ അശ്രദ്ധയിലാക്കാതിരിക്കട്ടെ.ആരെങ്കിലും അങ്ങനെ ചെയ്യുന്നുവെങ്കിൽ അവർ തന്നെയാണ് നഷ്ടപ്പെട്ടവർ

ധനവും സന്താനങ്ങളും കാരണമായി അള്ളാഹുവിന്റെ സ്മരണ നഷ്ടപ്പെട്ടു പോകരുതെന്ന് താക്കീത് ചെയ്തിരിക്കുകയാണിവിടെ.അങ്ങനെ നഷ്ടപ്പെട്ടു പോയവർ സ്ഥിരമായി പരാചയപ്പെടും.ധനത്തിന്റെ ബലത്തിൽ തങ്ങൾക്കാണ് യോഗ്യത എന്ന് അഹങ്കരിച്ചിരുന്ന കപടന്മാരുടെ നിലപാടിനെ ചോദ്യം ചെയ്യുകയായിരുന്നുവല്ലോ കഴിഞ്ഞ സൂക്തങ്ങളിൽ.ഇനി സത്യവിശ്വാസികളോട് കപടന്മാരെ പോലെ ധനമാണെല്ലാം എന്ന ധാരണയിൽ അതിൽ മാത്രം സമയം കളഞ്ഞ് അള്ളാഹുവിന്റെ സ്മരണ നഷ്ടപ്പെടുത്തരുത് അത് നിങ്ങളുടെ പരലോക നാശത്തിനു ഹേതുവാകും എന്നാണ് സാരം,ധനം പോലെ സന്താനങ്ങളും ചിലരെ അഹങ്കാരികളാക്കും അത് ശ്രദ്ധിക്കണമെന്നുമാണിതിന്റെ ആശയം

وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ 10

നിങ്ങൾക്ക് നാം നൽകിയിട്ടുള്ളതിൽ നിന്ന് നിങ്ങൾ ചിലവഴിക്കുക നിങ്ങളിൽ ഓരോരുത്തനും മരണം വന്നെത്തുകയും അപ്പോൾ എന്റെ രക്ഷിതാവേ അടുത്ത ഒരു അവധിവരെ എന്നെ പിന്തിച്ചു കൂടെ?എന്നാൽ ഞാൻ ധർമ്മം ചെയ്യുകയും സദ് വ്ര്‌ത്തരുടെ കൂട്ടത്തിൽ ആയിത്തീരുകയും ചെയ്യുമായിരുന്നല്ലോ എന്ന് പറയുകയും ചെയ്യുന്നതിനു മുമ്പ്.

അള്ളാഹു നൽകിയ ധനം മരണത്തിനുമുമ്പ് അളാഹുവിന്റെ മാർഗത്തിൽ ചിലവഴിക്കുന്നതിൽ വീഴ്ച വരുത്തരുതെന്നും അനുകൂല സമയവും സമ്പത്തും നന്മക്ക് ഉപയോഗിക്കാത്തവരൊക്കെ മരണ സമയം ഖേദിക്കേണ്ടി വരുമെന്നും അപ്പോൾ സമയം നീട്ടിക്കിട്ടാൻ ആവശ്യപ്പെട്ടിട്ട് ഒരു കാര്യവുമില്ല സക്കാത്തിന്റെ സമയമായാൽ സക്കാത്ത് കൊടുക്കാൻ താമസിക്കരുതെന്നും മറ്റെല്ലാ‍ നിർബന്ധങ്ങളും സമയത്ത് നിർവഹിക്കാ‍ാൻ ശ്രദ്ധിക്കണമെന്നും ഇത് നമ്മെ പഠിപ്പിക്കുന്നു

وَلَن يُؤَخِّرَ اللَّهُ نَفْسًا إِذَا جَاء أَجَلُهَا وَاللَّهُ خَبِيرٌ بِمَا تَعْمَلُونَ 11

ഒരാളെയും അവന്റെ അവധി എത്തിയാൽ അള്ളാഹു പിന്തിക്കുകയില്ല നിങ്ങൾ പ്രവർത്തിക്കുന്നതിനെ പറ്റി അള്ളാഹു സൂക്ഷ്മജ്ഞാനമുള്ളവനാകുന്നു

മരണം വരെയാണ് പ്രവർത്തിക്കാനുള്ള സമയം.മരണശേഷം പ്രവർത്തിച്ചതിന്റെ പ്രതിഫലം ലഭിക്കുന്ന സമയമാണ്.പ്രവർത്തിക്കേണ്ട സമയത്ത് പ്രവർത്തിച്ചാലല്ലേ പ്രതിഫലത്തിന്റെ നേരത്ത് സന്തോഷിക്കാനാവൂ.അള്ളാഹു നന്മ വർദ്ധിപ്പിച്ച് പരലോക വിജയികളിലുൾപ്പെടാൻ നമ്മെ സഹായിക്കട്ടെ ആമീൻ

അദ്ധ്യായം 62 -സൂറത്തുൽ ജുമുഅ:

2011-12-17T16:40:00.000+04:00

سورة الجمعة

മദീനയിൽ അവതരിച്ചു -സൂക്തങ്ങൾ 11

بسم الله الرحمن الرحيم

يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ الْمَلِكِ الْقُدُّوسِ الْعَزِيزِ الْحَكِيمِ (1

ആകാശ ഭൂമികളിലുള്ളവയെല്ലാം അള്ളാഹുവിന്റെ പരിശുദ്ധിയെ പ്രകീർത്തനം ചെയ്യുന്നു രാജാധിപതിയും മഹാ പരിശുദ്ധനും പ്രതാപ ശാലിയും അഗാധജ്ഞനുമായവൻ

ഈ അദ്ധ്യായത്തിൽ ജുമുഅയെക്കുറിച്ച് പരാമർശമുള്ളത് കൊണ്ടാണ് അദ്ധായത്തിനു ജുമുഅ:എന്ന് നാമം ലഭിച്ചത്. ഇതും തുടർന്ന് വരുന്ന മുനാഫിഖൂന:എന്ന അദ്ധ്യായവും നബി(സ) ജുമുഅ:നിസ്ക്കാരത്തിൽ ഓതാറുണ്ടായിരുന്നു ഇതിൽ ജുമുഅക്ക് പുറമെ മുസ്‌ലിംകളുടെ ആജന്മ ശത്രുക്കളായ ജൂതന്മാരെക്കുറിച്ച് പറയുന്നുണ്ട്. അടുത്ത അദ്ധ്യായത്തിൽ ദ്വിമുഖമുള്ളവരായ ഇസ്‌ലാമിന്റെ ശത്രുക്കളായ കപടന്മാരെക്കുരിച്ചും പറയുന്നു. മുസ്‌ലിംകൾ സമ്മേളിക്കുന്ന ജുമുഅയിൽ ഈ രണ്ട് ശത്രുക്കളെക്കുറിച്ചും ഓർമ്മപ്പെടുന്ന സൂറത്തുകൾ ഓതുന്നത് ഫലപ്രദം തന്നെയല്ലേ!

هُوَ الَّذِي بَعَثَ فِي الْأُمِّيِّينَ رَسُولًا مِّنْهُمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِن كَانُوا مِن قَبْلُ لَفِي ضَلَالٍ مُّبِينٍ (2

അക്ഷരജ്ഞാനമില്ലാത്തവരിൽ അവരിൽ നിന്നു തന്നെയുള്ള ഒരു റസൂലിനെ നിയോഗിച്ചവനാണവൻ.അവന്റെ ആയത്തുകളെ ആ റസൂൽ അവർക്ക് ഓതിക്കൊടുക്കുകയും അവരെ സംസ്ക്കരിക്കുകയും അവർക്ക് വേദ ഗ്രന്ഥവും വിജ്ഞാനവും പഠിപ്പിച്ചു കൊടുക്കുകയും ചെയ്യുന്നു നിശ്ചയമായും അവർ അതിനു മുമ്പ് വ്യക്തമായ വഴിപിഴവിൽ തന്നെയായിരുന്നു

പൊതുവെ അക്ഷരാഭ്യാസമില്ലാത്തവരായിരുന്നു അറബികൾ അത് കൊണ്ടാണ് ഉമ്മിയ്യുകൾ എന്ന് അവരെ വിശേഷിപ്പിച്ചത് അപൂർവം ചിലർക്ക് (അക്ഷരാഭ്യാസമുണ്ടായിരുന്നുവെന്നത് സ്മരിക്കുകയും വേണം.) ഇവിടെ ഉമ്മിയ്യൂൻ എന്നാൽ അറബികൾ എന്നാണുദ്ദെശ്യം.-എന്ന് ഇബ്നു അബ്ബാസ്(റ) ൽ നിന്ന് വ്യാഖ്യാനം വന്നിട്ടുണ്ട്.നബി(സ) ഉമ്മിയ്യാണെന്ന് പറഞ്ഞതിന്റെ അർത്ഥം എഴുത്തും വായനയും പഠിച്ചിട്ടില്ലാത്തവർ എന്ന അർത്ഥത്തിലാണ്.നേരത്തേ എഴുത്തും വായനയും പഠിച്ചിരുന്നുവെങ്കിൽ ആ പഠനത്തിൽ കിട്ടിയതാണ് ഖുർആൻ എന്ന് അവർക്ക് തെറ്റിദ്ധാരണ വരാൻ സാധ്യതയുണ്ടാകുമായിരുന്നു. എന്നാൽ ഒരു പള്ളിക്കൂടത്തിലും പോകാതെ ഇത്ര ആശയസമ്പുഷ്ടമായ ഖുർആൻ നബി(സ) ഓതുന്നത് അവിടുത്തെ അമാനുഷികത തന്നെയെന്ന് അവർക്ക് മന:സിലാക്കാമല്ലൊ! അവിടുത്തെ സത്യസന്ധത വ്യക്താമാവുകയും ചെയ്യുമല്ലൊ! അവരിൽ നിന്നുള്ള റസൂൽ എന്ന് പറഞ്ഞതിൽ നിന്ന് ആ റസൂലിനെക്കുറിച്ച് അവർക്ക് നല്ല പോലെ അറിയുമെന്നും ആ റസൂലുമായി സമ്പർക്കം പുലർത്താനും ഇടപഴകാനും അവർക്ക് അവസരം ഉണ്ടെന്നും മാത്രമല്ല ആ നിയോഗമവർക്ക് അഭിമാനകരമാണെന്നും വ്യക്തമാക്കുന്നതാണീ പ്രയോഗം. അവരിൽ നിന്നു നിയോഗിച്ചു എന്ന് പറഞ്ഞതിൽ നിന്ന് നബി(സ) അവരിലേക്ക് മാത്രമുള്ള റസൂലാണെന്ന് മനസിലാക്കാവതല്ല പ്രഥമ സംബോധിതർ അവരാണെന്ന് മാത്രമേയുള്ളൂ നബി(സ) അറബിയായത് കൊണ്ട് അവരിൽ നിന്ന് എന്ന് പറഞ്ഞതാണ് അവരിലേക്ക് മാത്രം എന്ന് ഉദ്ദേശമുണ്ടായിരുന്നുവെങ്കിൽ ഉമ്മിയ്യുകളിലേക്ക് നിയോഗിച്ചു എന്നാണ് പറയേണ്ടിയിരുന്നത്. നബി(സ) എല്ലാവരിലേക്കുമുള്ള റസൂലാണെന്ന് ഖുർആൻ പലയിടത്തും വ്യക്തമാക്കിയിട്ടുണ്ട്

ആ റസൂലിന്റെ പ്രവർത്തനമാണ് തുടർന്ന് പറയുന്നത്.

(1) ഖുർആൻ ഓതിക്കൊടുക്കുക. ഖുർആനിന്റെ പാരായണ ശൈലി നബി(സ)യിൽ നിന്ന് കേട്ടത് പരമ്പരാഗതമായി കേട്ട് കൊണ്ടാണ് ഇന്നും പാരായണം ചെയ്തു വരുന്നത്. ഒരിക്കലും എഴുത്തും വായനയും പഠിച്ചത് കൊണ്ട് മാത്രം യഥാവിധി ഖുർആൻ പാരായണം ചെയ്യാൻ കഴിയില്ല. അഥവാ ഖുർആൻ ഓതിക്കൊടുക്കുക എന്നത് വലിയൊരു ദൌത്യം തന്നെ എന്ന് ചുരുക്കം.

(2) അവരെ സംസ്ക്കരിക്കുക.സത്യ വിശ്വാസത്തിന്റെ വിശുദ്ധിയിലൂടെ മനസിലെയും കർമ്മങ്ങളിലെയും എല്ലാ ചെളിയും ഒഴിവാക്കി സത്യ നിഷേധത്തിൽ നിന്നും ദോഷങ്ങളിൽ നിന്നും അവരെ ശുദ്ധിയാക്കുക എന്നതാണ് സംസ്ക്കരണം.തെറ്റുകളിൽ മുഴുകിയിട്ടും ഒരു മന:സാക്ഷിക്കുത്തും തോന്നാതിരുന്ന ഒരു സമൂഹത്തെ സംസ്ക്കരിച്ചപ്പോൾ തെറ്റാവാൻ സാധ്യതയുള്ള വല്ലതും വന്നേക്കുമോ എന്ന് പോലും ഭയപ്പെട്ട് കരയുന്നവരാക്കി മാറ്റാൻ നബി(സ)ക്ക് കഴിഞ്ഞു.

(3) വേദഗ്രന്ഥം (ഖുർആൻ)അവർക്ക് പഠിപ്പിക്കുക.മറ്റു വിജ്ഞാനങ്ങൾ പഠിപ്പിക്കുക.ഖുർആൻ ഓതിക്കൊടുക്കലും ആശയം പഠിപ്പിക്കലും രണ്ടാണെന്ന് ഇതിൽ നിന്ന് മനസിലാക്കാം. ഖുർആനിന്റെ ആശയം നബി(സ) വിശദീകരിക്കുമ്പോൾ മാത്രമേ മനസ്സിലാക്കാൻ സാധിക്കൂ.നബി(സ)യെ അവഗണിച്ച് കേവലം അറബിഭാഷാ പഠനത്തിലൂടെ യഥാർത്ഥത്തിൽ ഖുർ ആൻ മനസിലാക്കാനാവില്ല.മറ്റു വിജ്ഞാനങ്ങൾ എന്നത് അവിടുത്തെ സുന്നത്തുകൾ എന്ന അർത്ഥത്തിലാണ്.ഈ റസൂൽ വരുന്നതിനു മുമ്പ് അവർ സത്യത്തിൽ നിന്ന് ബഹുദൂരം അകലെയായിരുന്നു എങ്കിലും റസൂൽ മുഖേന അള്ളാഹു അവരെ സത്യത്തിലേക്ക് വഴി നടത്തി

وَآخَرِينَ مِنْهُمْ لَمَّا يَلْحَقُوا بِهِمْ وَهُوَ الْعَزِيزُ الْحَكِيمُ (3

അവരിൽ പെട്ട മറ്റുചിലരുടെ അടുക്കലേക്കുമാണ് (റസൂലിനെ അയച്ചിരിക്കുന്നത്)അവർ ഇവരോടൊപ്പം എത്തിച്ചേർന്നു കഴിഞ്ഞിട്ടില്ല .അവൻ പ്രതാപിയും അഗാധജ്ഞനുമാകുന്നു

അറബികളിലേക്ക് മാത്രമോ അക്കാലത്തുള്ളവരിലേക്ക് മാത്രമോ അല്ല നബി(സ) റസൂലായിട്ടുള്ളത് എന്ന് ഈ സൂക്തം വ്യക്തമാക്കുന്നു.ഇതു വരെയും വന്നിട്ടില്ലാത്തവരിലേക്ക് അതായത് ഭാവിയിൽ വരാനിരിക്കുന്നവർക്ക് കൂടി അവിടുന്ന് റസൂലാണെന്ന് വ്യക്തമാക്കുകയാണിവിടെ.നേരത്തേ ഉമ്മിയ്യീൻ എന്നതിനു അറബികൾ എന്ന് ഇബ്നു അബ്ബാസ്(റ)ന്റെ വ്യാഖ്യാനം നാം കണ്ടു.മറ്റു ചിലർ എന്ന് ഇവിടെ പറഞ്ഞ അനറബികൾ എന്ന് ഇബ്നു ഉമർ(റ) അടക്കമുള്ളവർ വ്യാഖ്യാനിക്കുന്നുണ്ട്.അപ്പോൾ അറബികളിലേക്കും അനറബികളിലേക്കും നബി(സ) റസൂലാണെന്ന് ഈ രണ്ട് സൂക്തങ്ങൾ അറിയിക്കുന്നു

ذَلِكَ فَضْلُ اللَّهِ يُؤْتِيهِ مَن يَشَاء وَاللَّهُ ذُو الْفَضْلِ الْعَظِيمِ (4

അത് അള്ളാഹുവിന്റെ അനുഗ്രഹമാണ് അവനുദ്ദേശിക്കുന്നവർക്ക് അത് അവൻ നൽകുന്നു അള്ളാഹു മികച്ച അനുഗ്രഹമുള്ളവനാകുന്നു

പ്രവാചകത്വം അള്ളാഹുവിന്റെ അനുഗ്രഹമാണ് അത് അവൻ തീരുമാനിക്കുന്നവർക്ക് അവൻ നൽകും എന്നാണിവിടെ ഒരു വ്യാഖ്യാനം. ഇസ്രാഈല്യർക്ക് കുത്തകയാണ് പ്രവാചകത്വം എന്ന അവരുടെ ധാരണ തകർക്കുകയാണീ സൂക്തം.ഇവിടെ പറഞ്ഞ അനുഗ്രഹം ഇസ്‌ലാം ആണെന്നും അള്ളാഹുവിന്റെ മാർഗത്തിൽ ചിലവഴിക്കുന്ന ധനമാണെന്നും മറ്റും അഭിപ്രായമുണ്ട്

مَثَلُ الَّذِينَ حُمِّلُوا التَّوْرَاةَ ثُمَّ لَمْ يَحْمِلُوهَا كَمَثَلِ الْحِمَارِ يَحْمِلُ أَسْفَارًا بِئْسَ مَثَلُ الْقَوْمِ الَّذِينَ كَذَّبُوا بِآيَاتِ اللَّهِ وَاللَّهُ لَا يَهْدِي الْقَوْمَ الظَّالِمِينَ (5

തൌറാത്തനുസരിച്ച് നടക്കുവാൻ ചുമതലപ്പെടുത്തപ്പെടുകയും പിന്നെ ആ ചുമതല നിർവഹിക്കാതിരിക്കുകയും ചെയ്തവരുടെ സ്ഥിതി വലിയ ഗ്രന്ഥങ്ങൾ ചുമക്കുന്ന കഴുതകളുടെ പോലെയാണ്.അള്ളാഹുവിന്റെ ലക്ഷ്യങ്ങളെ നിഷേധിച്ച ജനതയുടെ ഉപമ എത്ര ചീത്ത!അക്രമികളായ ജനതയെ അള്ളാഹു നേർവഴിയിലാക്കുകയില്ല

ഗ്രന്ഥങ്ങൾ ചുമന്ന് നടക്കുന്ന കഴുതകൾക്ക് അത് എന്താണെന്നും അതിന്റെ സ്ഥാനമെന്തെന്നും ഒന്നും അറിയില്ല അവ പേറി നടക്കുന്നതിനാലുള്ള വിഷമങ്ങളും ഞെരുക്കങ്ങളും അനുഭവിക്കുകയും വേണം ഇത് പോലെയാണ് തൌറാത്ത് അനുസരിച്ച് ജീവിക്കാൻ ചുമതലപ്പെടുത്തപ്പെട്ട ജൂതരുടെ സ്ഥിതി.അവരത് യഥാവിധി അനുസരിച്ചില്ല നേരേ മറിച്ച് അതിനെ അവർ മാറ്റി മറിക്കുകയും യഥേഷ്ടം ദുർവ്യാഖ്യാനം ചെയ്യുകയുമാണുണ്ടായത് തന്നിമിത്തം ആ വേദഗ്രന്ഥം അവർക്ക് പ്രചോദനം ചെയ്തില്ല മാത്രമല്ല അത് യഥാവിധി അനുസരിക്കാത്തതിനാൽ അള്ളാഹുവിന്റെ ശാപ കോപങ്ങൾക്കും കഠിന ശിക്ഷകൾക്കും അവർ അർഹരാവുകയും ചെയ്തു.തങ്ങളുടെ മുതുകിൽ ഉള്ളത് എന്തെന്ന് മനസിലാക്കാൻ സാധിക്കാത്ത ജീവികളാണ് കഴുതകൾ.ഇവർ അങ്ങനെയല്ല.ഇവർക്ക് ബുദ്ധിയുണ്ട്.അത് പ്രയോചനപ്പെടുത്താത്തവർ കഴുതകളേക്കാൾ പിഴച്ചവരാണ്

قُلْ يَا أَيُّهَا الَّذِينَ هَادُوا إِن زَعَمْتُمْ أَنَّكُمْ أَوْلِيَاء لِلَّهِ مِن دُونِ النَّاسِ فَتَمَنَّوُا الْمَوْتَ إِن كُنتُمْ صَادِقِينَ (6

(നബിയേ!) തങ്ങൾ പറയുക.യഹൂദികളേ!മറ്റു മനുഷ്യരെക്കൂടാതെ തങ്ങൾ മാത്രം അള്ളാഹുവിനു മിത്രങ്ങളാണെന്ന് നിങ്ങൾ ജൽ‌പ്പിക്കുകയാണെങ്കിൽ നിങ്ങൾ മരണത്തെ ഒന്നു ആഗ്രഹിക്കുക.നിങ്ങൾ സത്യവാദികളാണെങ്കിൽ.

ഞങ്ങൾ അള്ളാഹുവിന്റെ ഇഷ്ടക്കാരും മക്കളുമാണെന്ന്(ഖുർആൻ 5/18)ജൂതർ പറഞ്ഞിരുന്നു അങ്ങനെ പറയുന്നതിൽ ഇവർക്ക് വിശ്വാസമുണ്ടെങ്കിൽ അവർക്ക് മഹത്തായ നേട്ടം അനുഭവിക്കാൻ സൌകര്യമൊരുക്കാനായി ഒന്നു മരണത്തെ ആഗ്രഹിക്കാമോഎന്ന് അള്ളാഹു അവരെ വെല്ലുവിളിക്കുകയാണ്

وَلَا يَتَمَنَّوْنَهُ أَبَدًا بِمَا قَدَّمَتْ أَيْدِيهِمْ وَاللَّهُ عَلِيمٌ بِالظَّالِمِينَ (7

അവരുടെ കരങ്ങൾ മുൻ കൂട്ടി ചെയ്തു വെച്ചത് നിമിത്തം ഒരിക്കലും അവരതിനു കൊതിക്കുകയില്ല അക്രമികളെക്കുറിച്ച് അള്ളാഹു നന്നായി അറിയുന്നവനാകുന്നു

അള്ളാഹുവിന്റെ മക്കളാണ് തങ്ങളെന്ന വാദം അവരുടെ ദുരഭിമാനത്തിൽ നിന്നുണ്ടായതാണ് അത് സത്യമാണെങ്കിൽ മരണാനന്തരമുള്ള പ്രശ്നമുക്തവും ആഹ്ലാദകരവുമായ സ്വർഗ ജീവിതത്തെ എത്രയും നേരത്തെ അവർ സ്വാഗതം ചെയ്യും എന്നാൽ ആ വെല്ലുവിളി സ്വീകരിക്കുവാനും മരണം കൊതിക്കാനും അവർ ഒരിക്കലും തയാറാവുകയില്ല എന്നാണ് ഖുർ ആൻ പറയുന്നത്.വെറുതെ വായ കൊണ്ടെങ്കിലും ഈ വെല്ലുവിളി സ്വീകരിക്കുന്നതായി ഒരു ഭംഗി വാക്ക് പറയാൻ പോലും ഒരു ജൂതനും തയാറായില്ല. നടപടികള് ശരിയല്ലെന്ന് സ്വന്തത്തെക്കുറിച്ച് അവർക്ക് തന്നെ ബോധ്യമുള്ളതിനാലാണത്.അവർ അക്രമികളാണെന്ന് നന്നായി അറിയുന്നവനാണ് അള്ളാഹു

قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ ثُمَّ تُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُم بِمَا كُنتُمْ تَعْمَلُونَ (8

(നബിയേ) പറയുക.ഏതൊരു മരണത്തിൽ നിന്നാണോ നിങ്ങൾ ഓടിപ്പോകുന്നത് അത് നിങ്ങളുമായി കണ്ട് മുട്ടുക തന്നെ ചെയ്യും പിന്നീട് അദൃശ്യ കാര്യങ്ങളും ദൃശ്യ കാര്യങ്ങളും അറിയുന്നവന്റെ അടുത്തേക്ക് നിങ്ങൾ മടക്കപ്പെടും അപ്പോൾ നിങ്ങൾ പ്രവർത്തിച്ചു കൊണ്ടിരുന്നതിനെ പറ്റി അവൻ നിങ്ങൾക്ക് വിവരിക്കുന്നതാണ്

എന്നാൽ വെല്ലു വിളി സ്വീകരിക്കാൻ മടിച്ച ഈ മരണമെന്ന സത്യം അവർ കണ്ട് മുട്ടുക തന്നെ ചെയ്യും .അതിൽ നിന്നു രക്ഷപ്പെടാനുള്ള ഓട്ടം അവരെ മരണത്തിൽ നിന്ന് രക്ഷപ്പെടുത്തുകയില്ല.മരണ ശേഷം അവരുടെ പ്രവർത്തനത്തിന്റെ ശിക്ഷ അവർക്ക് നൽകുകയും അവരുടെ കുറ്റങ്ങൾ എന്താണെന്ന് അവർക്ക് വിവരം നൽകപ്പെടുകയും ചെയ്യും

يَا أَيُّهَا الَّذِينَ آمَنُوا إِذَا نُودِي لِلصَّلَاةِ مِن يَوْمِ الْجُمُعَةِ فَاسْعَوْا إِلَى ذِكْرِ اللَّهِ وَذَرُوا الْبَيْعَ ذَلِكُمْ خَيْرٌ لَّكُمْ إِن كُنتُمْ تَعْلَمُونَ (9

സത്യ വിശ്വാസികളേ! വെള്ളിയാഴ്ച നിസ്ക്കാരത്തിലേക്ക് വിളിക്കപ്പെട്ടാൽ അള്ളാഹുവിന്റെ സ്മരണയിലേക്ക് നിങ്ങൾ പോവുകയും കച്ചവടം വിടുകയും ചെയ്യുക അതാണ് നിങ്ങൾക്ക് ഏറ്റവും ഗുണകരം.നിങ്ങൾ അറിയുന്നവരായിട്ടുണ്ടെങ്കിൽ

വെള്ളിയാഴ്ച ജുമുഅക്കുള്ള ബാങ്കൊലി മുഴങ്ങിയാൽ കച്ചവടം തുടങ്ങിയ ഭൌതിക വ്യവഹാരങ്ങളെല്ലാം നിറുത്തി വെച്ച് അള്ളാഹുവിന്റെ സ്മരണയിലേക്ക് വരിക.നിങ്ങൾ അറിവുള്ളവരാണെങ്കിൽ അതാണ് നിങ്ങൾക്ക് ഏറ്റവും ഗുണകരം എന്നാണിവിടെ പറയുന്നത്.

ഇമാം മിമ്പറിൽ കയറി ഇരുന്ന ഉടനെ നടത്തപ്പെടുന്ന ബാങ്കാണിത് നബി(സ)യുടെ കാലത്ത് ജുമുഅക്ക് ഈ ഒരു ബാങ്ക് മാത്രമാണുണ്ടായിരുന്നത് അതേ അവസ്ഥ ഉസ്മാൻ(റ)ന്റെ കാലം വരെ തുടർന്നു തന്റെ കാലത്ത് ആളുകൾ വർദ്ധിക്കുകയും ജുമുഅക്ക് വരാൻ പലരും വൈകാൻ തുടങ്ങുകയും ചെയ്തപ്പോൾ നേരത്തേ ജുമുഅയുടെ സമയമാവുന്നു എന്ന് അറിയിക്കാൻ നേരത്തേയുണ്ടായിരുന്ന ബാങ്കിന്റെ അല്പം മുമ്പായി (زوراء സൌറാഇൽ നിന്ന് ഒരു ബാങ്ക് വിളിക്കാൻ ഉസ്മാൻ(റ) കൽ‌പ്പിച്ചു (സൌറാഅ് എന്നത് മദീനാ പള്ളിക്കടുത്തുള്ള അങ്ങാടിയിലുള്ള ഉയരം കൂടിയ ഒരു കെട്ടിടമാണ്)അന്ന് ധാരാളം സഹാബികൾ ജീവിച്ചിരിപ്പുണ്ട് ആരും ഇത് എതിർക്കാതെ എല്ലാരും അംഗീകരിക്കുകയും മുസ്ലിം ലോകത്ത് അത് നിരാക്ഷേപമായി സ്ഥിരപ്പെടുകയും ഇന്നും മുസ്ലിംകൾ അത് നടപ്പാക്കുകയും ചെയ്യുന്നു നബി(സ)യുടെ നാലു ഖലീഫമാരുടെ ചര്യ സ്വീകരിക്കണമെന്ന് നബി(സ) നമ്മെ ഉപദേശിച്ചത് കൂടി ഇതിനോട് ചേർത്ത് വായിക്കുക.ഒന്നാം ബാങ്ക് കേൾക്കുമ്പോഴാണ് പലരും ജുമുഅക്ക് ധൃതിപിടിച്ച് ഒരുങ്ങുന്നത് .ഇവിടെ പറഞ്ഞ ദിക്റ് ഖുത്വുബയും നിസ്ക്കാരവും ആണെന്ന് ഇമാം ഖുർത്വുബി രേഖപ്പെടുത്തുന്നു. ഇവിടെ സത്യ വിശ്വാസികളേ എന്ന് വിളിച്ചതിൽ സ്ത്രീകളെ അള്ളാഹു ഉദ്ദേശിച്ചിട്ടില്ല കാരണം രോഗി, സ്ത്രീ.കുട്ടി,യാത്രക്കാരൻ.അടിമ എന്നിവർക്ക് ജുമുഅ നിർബന്ധമില്ല എന്ന് നബി(സ) വിശദീകരിച്ചിട്ടുണ്ട്

സൂര്യനുദിക്കുന്ന ദിനങ്ങളിൽ ഏറ്റവും സ്രേഷ്ടമായ ദിനമാണ് വെള്ളിയാഴ്ച.ജുമു അക്ക് ബാങ്ക് വിളിക്കുമ്പോഴാണ് പോകൽ നിർബന്ധമാകുന്നതെങ്കിലും നേരത്തെ തന്നെ കുളിച്ച് സുഗന്ധമുപയോഗിച്ച് അടക്കത്തോടും ഭക്തിയോടും കൂടി പോവുകയും ആദ്യ സ്വഫ്ഫിൽ സ്ഥലം പിടിക്കുന്നതുമെല്ലാം പ്രത്യേകം പ്രോത്സാഹിപ്പിക്കപ്പെട്ടിട്ടുണ്ടെന്ന് ഓർക്കുക.കാര്യമായ കാരണങ്ങളില്ലാതെ ജുമുഅ ഉപേക്ഷിക്കുന്നതിനെതിരെ ശക്തമായി നബി(സ) ഉണർത്തിയിട്ടുണ്ട്.ഖുത്വുബ എന്നത് വെള്ളിയാഴ്ച നിർവഹിക്കേണ്ട ഒരു പ്രത്യേക ആരാധനയാണ്.അത് കൊണ്ട് തന്നെ അത് നബി(സ) ചെയ്ത് കാണിച്ച് തന്ന പോലെ ചെയ്യൽ നിർബന്ധമായതിനാൽ ഇസ്ലാമിന്റെ ഭാഷയായ അറബി തന്നെയായിരിക്കണം ഖുത്വുബക്ക് ഉപയോഗിക്കേണ്ടത്.അത് കൊണ്ടാണ് അനറബി സംസാരിക്കുന്ന നാടുകളിൽ പോലും ഈ ആരാധന മുൻ കാലത്ത് മുഴുവനും അറബിയിൽ തന്നെ ലോകത്ത് എല്ലായിടത്തും നടന്നത്.ബാങ്ക് പോലും തുർക്കി ഭാഷയിലേക്ക് മാറ്റാൻ ഉത്തരവിട്ട കമാൽ പാഷ എന്ന വ്യക്തിയാണ് ലോക തലത്തിൽ ഖുത്വുബയുടെ ഭാഷ മാറ്റുന്ന അനാവശ്യ ശൈലിക്ക് തുടക്കം കുറിച്ചത്.ഖുത്വുബ ഒരു കേവല പ്രസംഗമല്ലെന്നും ധാരാളം നിബന്ധനകൾ പാലിക്കേണ്ട ഒരു ആരാധനയാണെന്നും അത് പരമ്പരാഗതമായി മുസ്ലിം ഉമ്മത്ത് അനുഷ്ടിച്ച ശൈലി തന്നെ തുടരണമെന്നും നാം അറിയണം കാരണം മുസ്ലിം പാരമ്പര്യം തള്ളുന്നത് നരക വാസത്തിലേക്ക് എത്തിക്കുമെന്ന ഖുർ ആനിന്റെ(4./115 )താക്കീത് പ്രത്യേകം സ്മരിക്കേണ്ടതാണ്.

فَإِذَا قُضِيَتِ الصَّلَاةُ فَانتَشِرُوا فِي الْأَرْضِ وَابْتَغُوا مِن فَضْلِ اللَّهِ وَاذْكُرُوا اللَّهَ كَثِيرًا لَّعَلَّكُمْ تُفْلِحُونَ ( 10

എന്നിട്ട് നിസ്ക്കാരം നിർവഹിക്കപ്പെട്ടാൽ നിങ്ങൾ ഭൂമിയിൽ വ്യാപരിക്കുകയും അള്ളാഹുവിന്റെ അനുഗ്രഹത്തിൽ നിന്ന് തേടുകയും അള്ളാഹുവിനെ അധികമായി ഓർക്കുകയും ചെയ്യുക.നിങ്ങൾ വിജയിക്കുവാൻ വേണ്ടി

ജുമുഅ:നിസ്ക്കാരം കഴിഞ്ഞാൽ പുറത്തിറങ്ങി ആഹാര മാർഗം അന്വേഷിക്കാമെന്നും എന്നാൽ അപ്പോഴും അള്ളാഹുവിനെ ഓർക്കണമെന്നും ഈ വാക്യം ഉണർത്തുന്നു.ജുമുഅ:നിസ്ക്കാരവും ജമാഅത്ത് നിസ്ക്കാരവും കഴിഞ്ഞാൽ അവിടെ ഇരുന്ന് ദിക്റും ദുആയും നടത്തൽ ഭൂമിയിൽ വ്യാപിക്കാമെന്ന് അനുവദിച്ചു കൊണ്ടുള്ള അള്ളാഹുവിന്റെ കല്പനക്ക് എതിരല്ല.മറിച്ച് അത്തരം കാര്യങ്ങളൊക്കെ ചെയ്യണമെന്ന് തന്നെയാണ് ഇസ്ലാമികാദ്ധ്യാപനം.നിസ്ക്കാര ശേഷം പോകുന്നതിനു വിരോധമല്ല എന്ന് മാത്രമാണിവിടെ പറഞ്ഞത് നിസ്ക്കരിച്ചുടൻ പോകണമെന്നല്ല.നിസ്ക്കരിച്ചിടത്ത് തന്നെ ഇരിക്കുന്നതിന്റെ മഹത്വം വിശദീകരിക്കുന്ന ധാരാളം നബി വചനങ്ങൾ കാണാം നിസ്ക്കാര ശേഷം അവിടെ തന്നെ ഇരിക്കുന്നവർക്ക് മലക്കുകൾ അള്ളാഹുവേ ഇദ്ദേഹത്തിനു നീ ഗുണം ചെയ്യുകയും അനുഗ്രഹം ചെയ്യുകയും ചെയ്യേണമേ എന്ന് പ്രാർത്ഥിക്കും അടുത്ത നിസ്ക്കാരം പ്രതീക്ഷിച്ചിരിക്കുമ്പോഴെല്ലാം അവൻ നിസ്കാരത്തിൽ തന്നെയാണ് എന്ന ഹദീസ്(ബുഖാരി/മുസ്ലിം) ഒരു ഉദാഹരണം

ജീവിതോപാധികളുടെ മാർഗമായി കാണുന്ന വഴികൾ അന്വേഷിക്കുമ്പോഴും അള്ളാഹുവെ മറക്കരുതെന്നാണിവിടെ ഉണർത്തിയത്.നബി(സ) പറഞ്ഞു. നിങ്ങൾ അങ്ങാടിയിൽ പ്രവേശിക്കുമ്പോൾ

لااله الاالله وحده لاشريك له له الملك وله الحمد يحيي ويميت وهو حي لايموت بيده الخير وهو علي كل شيء قدير

എന്ന് പറയുക ഇത് പറഞ്ഞാൽ ലക്ഷക്കണക്കിനു നന്മകൾ അവനു എഴുതപ്പെടുകയും ലക്ഷക്കണക്കിനു തിന്മകൾ അവനെ തൊട്ട് ഒഴിവാക്കപ്പെടുകയും ലക്ഷക്കണക്കിനു സ്ഥാനം അവനു നൽകപ്പെടുകയും ചെയ്യും എന്ന് അപ്പോൾ ഏത് സാഹചര്യത്തിലും അള്ളാഹുവിന്റെ സ്മരണ നാം വിടാൻ പാടില്ല..

وَإِذَا رَأَوْا تِجَارَةً أَوْ لَهْوًا انفَضُّوا إِلَيْهَا وَتَرَكُوكَ قَائِمًا قُلْ مَا عِندَ اللَّهِ خَيْرٌ مِّنَ اللَّهْوِ وَمِنَ التِّجَارَةِ وَاللَّهُ خَيْرُ الرَّازِقِينَ ( 11

അവർ വല്ല കച്ചവടമോ വിനോദമോ കണ്ടാൽ അതിലേക്കവർ പിരിഞ്ഞു പോവുകയും നിൽക്കുന്നവരായിരിക്കെ തങ്ങളെ അവർ ഉപേക്ഷിക്കുകയും ചെയ്യുന്നു പറയുക അള്ളാഹുവിങ്കലുള്ളത് വിനോദത്തേക്കാളും കച്ചവടത്തേക്കാളും ഉത്തമമാകുന്നു അള്ളാഹു ഉപജീവനം നൽകുന്നവരിൽ ഉത്തമനത്രെ!

നബി(സ) ഒരു വെള്ളിയാഴ്ച ജുമുഅ ഖുത്വുബ നടത്തുകയായിരുന്നു (അക്കാലത്ത് പെരുന്നാൾ നിസ്ക്കാരം പോലെ ജുമുഅ നിസ്ക്കാരം കഴിഞ്ഞിട്ടായിരുന്നു ഖുഥുബ നടത്തിയിരുന്നത് ) ആ സമയത്ത് ഒരു കച്ചവട സംഘം മദീനയിലേക്ക് പ്രവേശിച്ചു ആ സംഘത്തിന്റെ ആരവം കേട്ടപ്പോൾ ഖുഥുബ കേട്ടുകൊണ്ടിരുന്ന കുറേ ആളുകൾ അങ്ങോട്ട് ഓടിപ്പോയി.അബൂബക്കർ(റ) ഉമർ(റ) അടക്കം 12 പേർ മാത്രം പള്ളിയിൽ ശേഷിച്ചു ആ സമയത്താണ് ഈ സൂക്തം അവതരിച്ചത്.കച്ചവട സംഘങ്ങൾ പുറത്തെക്ക് പോകുമ്പോഴും തിരിച്ചു വരുമ്പോഴും ആളുകൾ തടിച്ച് കൂടുകയും ചെണ്ട മുതലായവ മുട്ടുന്നതും പതിവായിരുന്നു.അതിനെ സൂചിപ്പിച്ചാണിവിടെ വിനോദം കണ്ടാൽ എന്ന് സൂചിപ്പിച്ചത് .നബി(സ)ഖുഥുബ നിർവഹിക്കുമ്പോൾ നിന്നു കൊണ്ടായിരുന്നു നിർവഹിച്ചിരുന്നത് എന്നത് കൊണ്ടാണ് നിൽക്കുന്നവരായിരിക്കെ എന്ന് പറഞ്ഞത്.നബി(സ)ഖുതുബ നിർവഹിക്കുമ്പോൾ തങ്ങളെ വിട്ട് പോയത് ശരിയല്ല എന്ന് ഉണർത്തുകയും അങ്ങനെ ചെയ്തതിനെ ആക്ഷേപിക്കുകയും ചെയ്യുകയാണിവിടെ.മേലിൽ ഇത്തരം സംഭവങ്ങൾ ആവർത്തിക്കരുതെന്നും അള്ളാഹുവിൽ നിന്ന് ലഭിക്കുന്ന നന്മകൾക്കാണ് സത്യവിശ്വാസികൾ പ്രാധാന്യം കൽ‌പ്പിക്കേണ്ടതെന്നും അവരെ ഓർമ്മിപ്പിച്ചിരിക്കുന്നു

അള്ളാഹു നന്മയിൽ സജീവമാകാൻ നമ്മെ തുണക്കട്ടെ ആമീൻ

അദ്ധ്യായം 61 - സൂറത്തുസ്സ്വഫ്ഫ്

2011-12-05T14:49:00.001+04:00

سورة الصف

സൂക്തങ്ങൾ -14 : മദീനയിൽ അവതരിച്ചു

بسم الله الرحمن الرحيم

(1) سَبَّحَ لِلَّهِ مَا فِي السَّمَاوَاتِ وَمَا فِي الْأَرْضِ وَهُوَ الْعَزِيزُ الْحَكِيمُ

ആകാശ ഭൂമികളിലുള്ളവയെല്ലാം അള്ളാഹുവിന്റെ പരിശുദ്ധിയെ പ്രകീർത്തനം ചെയ്യുന്നു അവൻ പ്രതാപശാലിയും അഗാധജ്ഞനുമാകുന്നു

ഇമാം റാസി(റ)എഴുതുന്നു. അള്ളാഹുവിന്റെ പരിശുദ്ധിയെ വാഴ്ത്തുക എന്നാൽ അള്ളാഹു മാത്രമാണ് നാഥനെന്നും അവൻ ഏകനാണെന്നും(അവനു ആരാധനയിൽ പങ്കാളികളുണ്ടെന്ന ബഹുദൈവാരാധകരുടെ വാദം ശരിയല്ലെന്നും)അടക്കം അവന്റെ വിശുദ്ധി പ്രഖ്യാപനം ചെയ്യുക എന്നത് ആകാശഭൂമിയിലുള്ള മുഴുവൻ വസ്തുക്കളും നിർവഹിച്ചു പോരുന്നുണ്ട് എന്നാണ്.ഇവിടെ പ്രകീർത്തനം ചെയ്തു എന്ന് അർത്ഥം ലഭിക്കുന്ന سَبَّحَ എന്ന ഭൂതകാല ക്രിയയാണ് ഉപയോഗിച്ചത് ചില അദ്ധ്യായങ്ങളിൽ (ഉദാഹരണം ഇതിന്റെ ശേഷമുള്ള അദ്ധ്യായമായ സൂറത്തുൽ ജുമു അ:യിൽ) പ്രകീർത്തനം ചെയ്യും എന്ന് അറിയിക്കുന്ന ഭാവികാല ക്രിയയായ يُسَبِّحُ എന്നാണ് പറഞ്ഞത് ചിലയിടങ്ങളിൽ പ്രകീർത്തനം ചെയ്യൂ എന്ന് അറിയിക്കുന്ന سَبِّحِ എന്ന കല്പന ക്രിയയും ഉപയോഗിച്ചു.ഇതിൽ നിന്ന് അള്ളാഹുവിന്റെ മഹത്വത്തോട് യോചിക്കും വിധമുള്ള വിശുദ്ധി വിളംബരം ചെയ്യുന്ന ആകാശഭൂമിയിലുള്ളതിന്റെ യൊക്കെ പ്രകീർത്തനം കഴിഞ്ഞ കാലത്തും വർത്തമാന കാലത്തും ഭാവികാലത്തും തുടർന്നു കൊണ്ടേയിരിക്കുന്നു എന്ന് മനസ്സിലാക്കാനാണ് (സുബ്ഹാനള്ളാഹ്)

അവൻ പ്രതാപിയാണെന്ന് പറഞ്ഞാൽ അവൻ എല്ലാവരെയും അതിജയിക്കുമെന്നും അവനെ ഒരാൾക്കും-ഒന്നിനും-ഒരു വിഷയത്തിലും അതിജയിക്കാനോ പരാജയപ്പെടുത്താനോ സാധിക്കുകയില്ല എന്നുമാണ് സാരം

حكيم ആണെന്നതിന്റെ സാരം അവന്റെ വിധികൾ ഏത് വിഷയത്തിലാണെങ്കിലും അന്തിമമാണെന്നും അവനെതിരിൽ വിധിക്കാൻ ആർക്കും സാധിക്കില്ലെന്നുമാണ്.കാരണം അവൻ ത്രികാലത്തെക്കുറിച്ചും അഗാധമായി ജ്ഞാനമുള്ളവനാണ്.അത് കൊണ്ട് തന്നെ അവന്റെ വിധി മാത്രമേ അന്തിമമാവുകയുള്ളൂ(റാസി)

(2) يَا أَيُّهَا الَّذِينَ آَمَنُوا لِمَ تَقُولُونَ مَا لَا تَفْعَلُونَ

സത്യവിശ്വാസികളേ. നിങ്ങൾ ചെയ്യാത്തത് പറയുന്നത് എന്തിനാണ്?

ചെയ്യാത്തത് പറയുന്നത് എന്തിനാണെന്ന് അവരിൽ നിന്ന് അറിവ് നേടാനുള്ള ചോദ്യമല്ല മറിച്ച് ശരിയായ മാർഗം കൈവിട്ട് വാക്കും പ്രവർത്തിയും തമ്മിൽ യോചിപ്പില്ലാത്തവരെ ശക്തമായി താക്കീത് ചെയ്യാനാണീ ചോദ്യം

(3) كَبُرَ مَقْتًا عِندَ اللَّهِ أَن تَقُولُوا مَا لَا تَفْعَلُونَ

നിങ്ങൾ ചെയ്യാത്തത് നിങ്ങൾ പറയുക എന്നത് അള്ളാഹുവിങ്കൽ വളരെ ക്രോധകരമായിട്ടുള്ളതാകുന്നു

അള്ളാഹുവിന്റെ മാർഗത്തിൽ യുദ്ധം ചെയ്യുവാൻ ആഗ്രഹം പ്രകടിപ്പിക്കുകയും യുദ്ധം നിയമമാക്കപ്പെട്ടപ്പോൾ അതിൽ ചിലർക്ക് അസഹ്യത തോന്നുകയും ചെയ്ത സന്ദർഭത്തിലാണ് ഈ വാക്യങ്ങൾ അവതരിച്ചതെന്നും കപടന്മാർ നിങ്ങൾ യുദ്ധത്തിനു പുറപ്പെടുകയും യുദ്ധം ചെയ്യുകയും ചെയ്താൽ നിങ്ങൾക്കൊപ്പം ഞങ്ങളും പുറപ്പെടുകയും യുദ്ധം ചെയ്യുകയും ചെയ്യും എന്ന് മുസ്‌ലിംകളോട് പറയുകയും എന്നിട്ട് യുദ്ധം വന്നപ്പോൾ പിന്തിരിഞ്ഞു മാറി നിൽക്കുകയും ചെയ്തു.അപ്പോൾ അവരുടെ വിഷയത്തിലാണിതെന്നും മറ്റും അഭിപ്രായമുണ്ട്

അവതരിച്ച സന്ദർഭം ഏതായാലും അതിലെ ആശയം ഗൗരവമേറിയ ഒരു പൊതു തത്വമാണ്. വാഗ്ദാനമായോ നേർച്ചയായോ ഒരു നല്ല കാര്യം ചെയ്യാമെന്ന് വായ കൊണ്ട് പറഞ്ഞാൽ അത് പ്രവൃത്തിയിൽ വരുത്തണം ചെയ്യാൻ തയാറില്ലാത്ത കാര്യം ചെയ്യുമെന്ന് പറയരുത് അത് അള്ളാഹുവിന്റെ ദേഷ്യത്തിനു കാരണമാകും ചെയ്തിട്ടില്ലാത്തത് ചെയ്തു എന്ന് പറയുന്നതും തെറ്റു തന്നെ!

നബി(സ)പറഞ്ഞു. കപടവിശ്വാസികളുടെ അടയാളം മൂന്നെണ്ണമാണ്. വാഗ്ദാനം ചെയ്താൽ ലംഘിക്കും, സംസാരിച്ചാൽ വ്യാജം പറയും, വിശ്വസിക്കപ്പെട്ടാൽ ചതിക്കും (ബുഖാരി/മുസ്‌ലിം) വാഗ്ദാന ലംഘനം മഹാ അപരാധം തന്നെ.

مَقْتً എന്നാൽ ദേഷ്യത്തിലെ ഏറ്റവും ഉയർന്ന പടിയിലുള്ളത് എന്നാണ്

(4) إِنَّ اللَّهَ يُحِبُّ الَّذِينَ يُقَاتِلُونَ فِي سَبِيلِهِ صَفًّا كَأَنَّهُم بُنيَانٌ مَّرْصُوصٌ

(കല്ലുകൾ)സുദൃഢമായി സംയോജിപ്പിച്ച ഒരു മതിൽ പോലെ അണി ചേർന്ന് കൊണ്ട് അള്ളാഹുവിന്റെ മാർഗത്തിൽ യുദ്ധം ചെയ്യുന്നവരെ അവൻ ഇഷ്ടപ്പെടുക തന്നെ ചെയ്യുന്നു

ഇടക്ക് വളവൊ വിടവോ ഇല്ലാതെ കെട്ടുറപ്പോടെ അണിനിരന്നുകൊണ്ട് അള്ളാഹുവിന്റെ മാർഗത്തിൽ അടരാടുന്ന പടയാളികളെ അള്ളാഹു പ്രശംസിക്കുകയും പ്രോത്സാഹിപ്പിക്കുകയും ചെയ്യുന്നു.അണിയൊപ്പിച്ച് നിൽക്കുന്നത് ശത്രുവിന്റെ പരാജയത്തിനു വളരെ സഹായകമാണ്. ജമാഅത്തായുള്ള നിസ്ക്കാരത്തിലും അണി ശരിപ്പെടുത്താൻ നിർദ്ദേശമുണ്ട്

കഴിഞ്ഞ സൂക്തത്തിൽ വാക്കും പ്രവർത്തിയും തമ്മിൽ പൊരുത്തക്കേടുള്ളവരെ അള്ളാഹു ആക്ഷേപിച്ചപ്പോൾ വാക്കിനൊപ്പം പ്രവർത്തിയും നന്നാക്കി യുദ്ധത്തിനു അടിയുറച്ച് നിന്നവരെ പ്രശംസിക്കുകയാണ് ഈ സൂക്തത്തിൽ.

وَإِذْ قَالَ مُوسَى لِقَوْمِهِ يَا قَوْمِ لِمَ تُؤْذُونَنِي وَقَد تَّعْلَمُونَ أَنِّي رَسُولُ اللَّهِ إِلَيْكُمْ فَلَمَّا زَاغُوا أَزَاغَ اللَّهُ قُلُوبَهُمْ وَاللَّهُ لَا يَهْدِي الْقَوْمَ الْفَاسِقِينَ (5

മൂസാ(അ)തന്റെ ജനതയോട് പറഞ്ഞ സന്ദർഭം (ഓർക്കുക) എന്റെ ജനങ്ങളേ! നിങ്ങൾ എന്തിനാണ് എന്നെ ബുദ്ധിമുട്ടിക്കുന്നത്? ഞാൻ നിങ്ങളിലേക്കുള്ള അള്ളാഹുവിന്റെ ദൂതനാണെന്ന് നിങ്ങൾക്ക് തന്നെ അറിയാമല്ലോ.അങ്ങനെ അവർ സത്യത്തിൽ നിന്ന് വ്യതിചലിച്ചപ്പോൾ അവരുടെ ഹ്ര്‌ദയങ്ങളെ അള്ളാഹു(നേർമാർഗത്തിൽ നിന്ന് )തെറ്റിച്ചുകളഞ്ഞു ധിക്കാരികളായ ജനതയെ അള്ളാഹു സന്മാർഗത്തിലാക്കുകയില്ല

നബി(സ)യെ നിഷേധിക്കുന്ന ശത്രുക്കളുടെ നിലപാടുകൾ കാര്യമാക്കേണ്ടതില്ലെന്നും ശരിയായ പ്രവാചകനാണെന്ന് ബോദ്ധ്യമുണ്ടായിട്ടും മൂസാ(അ) ഒട്ടേറെ വിഷമങ്ങൾ സഹിക്കേണ്ടി വന്നിട്ടുണ്ടെന്നും നബി(സ)യെ അറിയിച്ച് അവിടുത്തെ ആശ്വസിപ്പിക്കുകയാണിവിടെ. മൂസാ(അ)ന്റെ ചരിത്രം പഠിപ്പിച്ച്, നബി(സ)യെ എതിർക്കുന്നതിന്റെ പരിണിത ഫലം എന്തായിരിക്കുമെന്ന് ശത്രുക്കളെ ഉൽബോധിപ്പിക്കൽ ഇതിന്റെ ലക്ഷ്യമാണ്

മൂസാ(അ)നെ ബുദ്ധിമുട്ടിക്കുക എന്നതിൽ മൂസാ(അ)നു മണിവീക്കമുണ്ടെന്ന അവരുടെ ആരോപണവും വ്യഭിചാരാരോപണം നടത്താൻ വേശ്യകളെ അവർ ഏർപ്പാടാക്കിയതും ഞങ്ങൾക്ക് ഇവർക്കുള്ളത് പോലെ ദൈവങ്ങളെ സ്ഥാപിച്ചു തരണമെന്ന് ആവശ്യപ്പെട്ടതും യുദ്ധത്തിനു വിളിച്ചപ്പോൾ നിങ്ങളും നാഥനും പോയി യുദ്ധം ചെയ്യുക ഞങ്ങൾ ഇവിടെ ഇരിക്കുകയാണ് എന്ന് പറഞ്ഞതും അള്ളാഹുവെ പരസ്യമായി കണ്ടാലേ ഞങ്ങൾ വിശ്വസിക്കൂ എന്ന് പറഞ്ഞതും ഒരേ തരം ഭക്ഷണം സഹിക്കാനാവില്ലെന്ന് പറഞ്ഞതുമൊക്കെ ഈ ബുദ്ധിമുട്ടിക്കുക എന്നതിന്റെ പരിധിയിൽ വരും(ഖുർത്വുബി/റാസി)

ഞാൻ അള്ളാഹുവിന്റെ ദൂതനാണെന്ന് നിങ്ങൾക്ക് നിസ്സംശയം അറിയാമെന്നിരിക്കെ .നിങ്ങൾ എന്നെ ബുദ്ധിമുട്ടിക്കുകയല്ല മറിച്ച് ആദരിക്കുകയല്ലേ വേണ്ടത് എന്ന് മൂസാ(അ) ചോദിക്കുന്നു

അവർ സത്യത്തിൽ നിന്ന് മാറിയപ്പോൾ അള്ളാഹു അവരെ ആ വഴിക്ക് വിടുകയും ഇത്തരം ധിക്കാരികൾക്ക് അള്ളാഹു സന്മാർഗം നൽകുകയില്ലെന്നും താക്കീത് ചെയ്തിരിക്കുകയാണ്

പ്രവാചകനെ അനാദരിച്ചതിനാലും അള്ളാഹുവെ ധിക്കരിച്ചതിനാലും അതിന്റെ ശിക്ഷയായി അവർക്ക് അള്ളാഹു വഴികേടിലാവുക എന്ന അവസ്ഥ അവരിൽപടച്ചു എന്നും ഇവിടെ വ്യാഖ്യാനമുണ്ട്.ആദരവിനർഹരായവരെ അനാദരിക്കുന്നതിന്റെ ഗൗരവം ഇതിൽ നിന്ന് മനസിലാക്കാം നബി(സ)യുടെ മഹത്വത്തിനു നിരക്കാത്ത പരാമർശനം നബി(സ)യെക്കുറിച്ച് നടത്തുന്നവർ അവരുടെ ആത്മീയ നാശത്തിനു അത് കാരണമാകുമെന്ന് സഗൌരവം ചിന്തിക്കണം

وَإِذْ قَالَ عِيسَى ابْنُ مَرْيَمَ يَا بَنِي إِسْرَائِيلَ إِنِّي رَسُولُ اللَّهِ إِلَيْكُم مُّصَدِّقًا لِّمَا بَيْنَ يَدَيَّ مِنَ التَّوْرَاةِ وَمُبَشِّرًا بِرَسُولٍ يَأْتِي مِن بَعْدِي اسْمُهُ أَحْمَدُ فَلَمَّا جَاءهُم بِالْبَيِّنَاتِ قَالُوا هَذَا سِحْرٌ مُّبِينٌ (6

മർയമിന്റെ പുത്രൻ ഈസാ(അ)പറഞ്ഞ സന്ദർഭം(ഓർക്കുക )ഇസ്രാഈല്യരേ! നിശ്ചയമായും ഞാൻ നിങ്ങളിലേക്ക് അള്ളാഹുവിന്റെ ദൂതനാകുന്നു എന്റെ മുമ്പിലുള്ള തൌറാത്തിനെ ശരിവെച്ചവനായിക്കൊണ്ടും എന്റെ ശേഷം വരുന്ന അഹ്‌മദ് എന്ന് പേരുള്ള ഒരു പ്രവാചകനെക്കുറിച്ച് സന്തോഷവാർത്ത അറിയിക്കുന്നവനായിക്കൊണ്ടും (ആകുന്നു ഞാൻ നിയുക്തനായിട്ടുള്ളത്)അങ്ങനെ അദ്ദേഹം വ്യക്തമായ തെളിവുകളും കൊണ്ട് അവരുടെ അടുക്കൽ വന്നപ്പോൾ ഇത്(ഈസാ(അ)കൊണ്ടുവന്നത്)വ്യക്തമായ ജാലവിദ്യയാണെന്ന് അവർ പറഞ്ഞു

മൂസാ(അ)നെക്കുറിച്ചുണർത്തിയ ശേഷം ഈസാ(അ)നെക്കുറിച്ചുണർത്തുകയാണിവിടെ. നേരത്തേ തൌറാത്ത് നൽകപ്പെട്ട ഇസ്രാഈല്യർ പുതിയൊരു ഗ്രന്ഥത്തെക്കുറിച്ചു കേട്ടാൽ തെറ്റിദ്ധരിക്കാൻ സാദ്ധ്യതയുണ്ടെന്നതിനാൽ താൻ തൌറാത്തിനെ അംഗീകരിക്കുന്നവനാണെന്നും അതിനെ നിരാകരിക്കുന്നില്ലെന്നും തൌറാത്തിനെ ശരിവെക്കുന്നവനായിട്ടാണ് അള്ളാഹു എന്നെ പ്രവാചകനായി നിയോഗിച്ചിരിക്കുന്നതെന്നും ഈസാ(അ)പ്രഖ്യാപിക്കുന്നു .തൌറാത്തിനെ അംഗീകരിക്കുന്നു എന്നതിനു അതിലെ നിയമങ്ങൾ തന്നെ എല്ലാ വിഷയത്തിലും താനും പിന്തുടരും എന്ന അർത്ഥമില്ല.പ്രത്യുത കാലികമായി ചില നിയമങ്ങളിൽ മാറ്റം വരുത്തിയിട്ടുണ്ടെന്നതാണ് വസ്തുത.

وَمُصَدِّقًا لِّمَا بَيْنَ يَدَيَّ مِنَ التَّوْرَاةِ وَلِأُحِلَّ لَكُم بَعْضَ الَّذِي حُرِّمَ عَلَيْكُمْ وَجِئْتُكُم بِآيَةٍ مِّن رَّبِّكُمْ فَاتَّقُواْ اللّهَ وَأَطِيعُونِ

എന്റ് മുമ്പിലുള്ള തൌറാത്തിനെ സത്യപ്പെടുത്തുന്നവനായിക്കൊണ്ടും നിങ്ങളുടെ മേൽ നിശിദ്ധമാക്കപ്പെട്ട കാര്യങ്ങളിൽ ചിലത് നിങ്ങൾക്ക് അനുവദിച്ചു തരുവാൻ വേണ്ടിയുകാകുന്നു(ഞാൻ നിയോഗിക്കപ്പെട്ടിട്ടുള്ളത്)നിങ്ങളുടെ രക്ഷിതാവിങ്കൽ നിന്നുള്ള ദ്ര്‌ഷ്ടാന്തവും നിങ്ങൾക്ക് ഞാൻ കൊണ്ടുവന്നിരിക്കുന്നു ആകയാൽ നിങ്ങൾ അള്ളാഹുവെ സൂക്ഷിക്കുകയും എന്നെ അനുസരിക്കുകയും ചെയ്യുവീൻ (ആലു ഇംറാൻ 50)

എന്ന സൂക്തം ഈ വസ്തുത ശരിവെക്കുന്നു.

തന്റെ വരവിന്റെ ലക്ഷ്യങ്ങളിൽ അഹ്‌മദ് എന്ന് പേരുള്ള ഒരു പ്രവാചകന്റെ ആഗമനത്തെക്കുറിച്ച് സന്തോഷവാർത്ത അറിയിക്കൽ കൂടി ലക്ഷ്യമാണെന്നും എന്റെ ശേഷമാണ് ആ പ്രവാചകൻ വരികയെന്നും ഈസാ(അ)സൂചിപ്പിച്ചിരിക്കുകയാണ്. അന്ത്യപ്രവാചകരായ മുഹമ്മദ് നബി(സ)യെക്കുരിച്ചുള്ള വ്യക്തമായ പ്രസ്താവനയാണിതെന്നിരിക്കെ ഖുർആനിൽ മുഹമ്മദ് നബി(സ)യേക്കാൾ പ്രാധാന്യം ഈസാ(അ)ക്കാണെന്ന് ധരിക്കുന്നവരെക്കുറിച്ച് എന്ത് പറയാൻ.എന്നാൽ ഈസാ(അ) ഈ സത്യവുമായി വന്നപ്പോൾ ജാലവിദ്യയെന്ന് പറഞ്ഞ് പരിഹസിക്കാനായിരുന്നു ശത്രുക്കൾക്ക് താല്പര്യം

(അപ്പോൾ തൌറാത്തിലൂടെ നിശിദ്ധമാക്കപ്പെട്ടിരുന്ന ചില കാര്യങ്ങൾ ഇഞ്ചീലിലൂടെ അനുവദിക്കുമെന്ന് ഇതിൽ നിന്ന് മനസിലായി. കാലികമായ ചില വ്യത്യാസങ്ങൾ ഉണ്ടാകുമെന്ന് തന്നെയാണ് ഇത് വ്യക്തമാക്കുന്നത്)

وَمَنْ أَظْلَمُ مِمَّنِ افْتَرَى عَلَى اللَّهِ الْكَذِبَ وَهُوَ يُدْعَى إِلَى الْإِسْلَامِ وَاللَّهُ لَا يَهْدِي الْقَوْمَ الظَّالِمِينَ (7

അള്ളാഹുവിന്റെ മേൽ കള്ളം കെട്ടിച്ചമക്കുന്നവനേക്കാൾ അക്രമി ആരുണ്ട്? അവനാകട്ടെ ഇസ്ലാമിലേക്ക് ക്ഷണിക്കപ്പെടുന്നു (എന്നിട്ടും!) .അക്രമികളായ ജനതയെ അള്ളാഹു സന്മാർഗത്തിലാക്കുകയില്ല

ഇസ്‌ലാമിലേക്ക് ക്ഷണിക്കപ്പെടുമ്പോൾ അത് സ്വീകരിക്കുന്നില്ലെന്ന് മാത്രമല്ല അള്ളാഹുവിനു സന്താനങ്ങളുണ്ടെന്നും പങ്കുകാരുണ്ടെന്നും മറ്റും തനി കള്ളം കെട്ടിപ്പറയുന്നവർ വലിയ അക്രമികളാണ്.ഈ അക്രമസ്വഭാവികൾ ഒരിക്കലും സത്യം മനസ്സിലാക്കി സന്മാർഗം സ്വീകരിക്കില്ല

(8) يُرِيدُونَ لِيُطْفِؤُوا نُورَ اللَّهِ بِأَفْوَاهِهِمْ وَاللَّهُ مُتِمُّ نُورِهِ وَلَوْ كَرِهَ الْكَافِرُونَ

അള്ളാഹുവിന്റെ പ്രകാശത്തെ അവരുടെ വായ കൊണ്ട് കെടുത്തിക്കളയുവാൻ അവർ ഉദ്ദേശിക്കുന്നു അള്ളാഹുവാകട്ടെ –സത്യനിഷേധികൾ വെറുത്താലും ശരി-തന്റെ പ്രകാശത്തെ പൂർത്തിയാക്കുന്നവനാകുന്നു

അപവാദ പ്രചരണത്തിലൂടെ അള്ളാഹുവിന്റെ മതമാകുന്ന പ്രകാശത്തെ ഊതിക്കെടുത്താമെന്നാണിവരുടെ ധാരണ.എന്നാൽ അള്ളാഹു ഈ മതത്തെ പൂർത്തിയാക്കുകതന്നെ ചെയ്യും സത്യനിഷേധികൾ എത്ര വെറുത്താലും.

ഇവിടെ പറഞ്ഞ പ്രകാശം കൊണ്ടുള്ള വിവക്ഷ ഖുർആൻ ആണെന്നും ഇസ്‌ലാം ആണെന്നും നബി(സ) തങ്ങളാണെന്നും അള്ളാഹുവിന്റെ തെളിവുകളും ലക്ഷ്യങ്ങളുമാണെന്നും അഭിപ്രായമുണ്ട്.ഇത് ഒരു ഉപമയാണെന്നും സൂര്യപ്രകാശത്തെ വായകൊണ്ട് ഊതിക്കെടുത്താൻ കഴിയാത്തത് പോലെ സത്യത്തെ തമസ്ക്കരിക്കാൻ ആരെങ്കിലും കരുതുന്നുവെങ്കിൽ അത് നടക്കില്ലെന്ന് ഉദാഹരണ സഹിതം ഉണർത്തുകയാണുദ്ദേശ്യമെന്നും അഭിപ്രായമുണ്ട്(ഖുർത്വുബി)

നബി(സ)ക്ക് കുറേദിവസങ്ങൾ (40 ദിവസം) വഹ്‌യ് (ദ്യവ്യസന്ദേശം) വരാതായ ഘട്ടത്തിൽ കഅബുബ്നുൽ അശ് റഫ് എന്ന ജൂതൻ അവന്റെ ആളുകളെ വിളിച്ച് പറഞ്ഞു ഓ ജൂത സമൂഹമേ! നിങ്ങൾ സന്തോഷിക്കുക.മുഹമ്മദി(സ)നു ലഭിച്ചിരുന്ന പ്രകാശം അള്ളാഹു കെടുത്തിയിരിക്കുന്നു ഒരിക്കലും ഇസ്‌ലാമിനെ അള്ളാഹു പൂർത്തിയാക്കുകയില്ല എന്ന് അവൻ പറഞ്ഞു അപ്പോൾ നബി(സ)ക്ക് ശരിക്കും വിഷമം വന്നു.അപ്പോഴാണു ജൂതന്റെ വാദഗതിയെ തകർത്തു കൊണ്ട് ഈ സൂക്തം അവതരിച്ചത്(ഖുർത്വുബി)

هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَلَوْ كَرِهَ الْمُشْرِكُونَ (09)

അവൻ തന്റെ റസൂലിനെ സന്മാർഗത്തോടും സത്യമതത്തോടും കൂടി അയച്ചിട്ടുള്ളവനാണ് (ലോകത്തുള്ള) എല്ലാമതത്തേക്കാളും അതിനെ (വിജയിപ്പിച്ചു)പ്രത്യക്ഷപ്പെടുത്തുവാൻ വേണ്ടി –ബഹുദൈവ വിശ്വാസികൾ അത് വെറുത്താലും ശരി

ലക്ഷ്യങ്ങളുടെ ദൃഢത, ഖുർആനിന്റെ സുരക്ഷ, അതിന്റെ ന്യായത എന്നിവ മൂലവും മറ്റും ഏതുമതത്തേക്കാളും അത് മികച്ചു തന്നെയിരിക്കും മറ്റുള്ളവരുടെ അമർഷമോ പ്രതിഷേധമോ അതിനൊരു പോറലുമേൽപ്പിക്കില്ല

(10) يَا أَيُّهَا الَّذِينَ آَمَنُوا هَلْ أَدُلُّكُمْ عَلَى تِجَارَةٍ تُنجِيكُم مِّنْ عَذَابٍ أَلِيمٍ

സത്യവിശ്വാസികളേ. വേദനാജനകമായ ശിക്ഷയിൽ നിന്ന് നിങ്ങൾക്ക് രക്ഷ നൽകുന്ന ഒരു കച്ചവടത്തെ പറ്റി ഞാൻ അറിയിച്ചു തരട്ടെയോ?

ഉസ്മാനുബ്നു മള്ഊൻ(റ)ന്റെ വിഷയത്തിലാണീ സൂക്തം അവതരിച്ചത്.അതായത് ഒരിക്കൽ താൻ നബി(സ)യോട് പറഞ്ഞു.നബിയേ!അവിടുന്ന് എനിക്ക് അനുവാദം തന്നാൽ ഞാൻ എന്റെ ഭാര്യയെ വിവാഹ മോചനം നടത്തുകയും മാംസം കഴിക്കാതെ.രാത്രി ഉറങ്ങാതെ പകൽ മുഴുവൻ നോമ്പ് എടുത്ത് ആരാധനയിൽ മുഴുകി ജീവിക്കാമായിരുന്നു .അപ്പോൾ നബി(സ) എന്റെ ചര്യയാണ് വിവാഹമെന്നും ആത്മീയമായി നന്നാവാൻ അള്ളാഹുവിന്റെ മാർഗത്തിൽ ധർമ്മ സമരം ചെയ്യലും അള്ളാഹു വിലക്കാത്തവയെ ഹറാമാക്കാതിരിക്കലും ഉറക്കം.നോമ്പ് മുറിക്കൽ ഇടക്ക് നോമ്പ് നോൽക്കൽ എന്നിവയൊക്കെനടപ്പാക്കുന്നത് എന്റെ ചര്യയാണെന്നും അത് വിട്ട് പോകുന്നവൻ എന്റെ മാർഗം അവലംഭിച്ചവനല്ല എന്നും നബി(സ)പറഞ്ഞു.അപ്പോൾ ഉസ്മാനുബ്നു മള്ഊൻ(റ)പറഞ്ഞു.നബിയേ!അള്ളാഹുവാണെ സത്യം.അള്ളാഹു ഏറ്റവും ഇഷ്ടപ്പെടുന്ന കച്ചവടം ഏതാണെന്നറിഞ്ഞാൽ എനിക്ക് ആ കച്ചവടം ചെയ്യാമായിരുന്നു എന്ന്.അപ്പോഴാണീ സൂക്തം അവതരിച്ചത്(ഖുർത്വുബി)

കച്ചവടത്തിൽ ലാഭവും നഷ്ടവും ഉണ്ടാവാം.മനുഷ്യ ജീവിതവും അത് പോലെയാണ്. സത്യ വിശ്വാസവും സൽക്കർമ്മങ്ങളും കൊണ്ട് ജീവിതത്തെ ധന്യമാക്കിയാൽ അവനു പ്രതിഫലം ലഭിക്കും.തന്റെ ജീവിതമെന്ന കച്ചവടം ലാഭകരമാവുംയും ചെയ്യും അത് ഉപേക്ഷിച്ചാൽ ജീവിതാന്ത്യം നഷ്ടത്തിൽ കലാശിക്കുകയാവും ചെയ്യുക(റാസി)

تُؤْمِنُونَ بِاللَّهِ وَرَسُولِهِ وَتُجَاهِدُونَ فِي سَبِيلِ اللَّهِ بِأَمْوَالِكُمْ وَأَنفُسِكُمْ ذَلِكُمْ خَيْرٌ لَّكُمْ إِن كُنتُمْ تَعْلَمُونَ (11

നിങ്ങൾ അള്ളാഹുവിലും അവന്റെ റസൂലിലും വിശ്വസിക്കണം സ്വന്തം സ്വത്തുക്കൾ കൊണ്ടും ദേഹങ്ങൾകൊണ്ടും അള്ളാഹുവിന്റെ മാർഗത്തിൽ നിങ്ങൾ യുദ്ധം ചെയ്യണം അത് നിങ്ങൾക്ക് ഉത്തമമാകുന്നു നിങ്ങൾ അറിയുന്നവരാണെങ്കിൽ

ഈ കച്ചവടത്തിനു വേണ്ട മുടക്കുമുതൽ സത്യവിശ്വാസവും ധനം ദേഹം എന്നിവ കൊണ്ടുള്ള പോരാട്ടവുമാണ്.ഇവിടെ പറഞ്ഞ പോരാട്ടത്തിനു വിവിധ അർത്ഥ തലങ്ങളുണ്ട്.തന്നെ തെറ്റിനു പ്രേരിപ്പിക്കുന്ന ശരീരത്തോടും തന്നെ വഴിതെറ്റിക്കാനുള്ള ദുർബോധനം നൽകുന്ന പിശാചിനോടും തന്നെ തിന്മയിലേക്ക് മാടി വിളിക്കുന്ന ജനങ്ങളോടും അഹങ്കാരത്തിലും ധൂർത്തിലും തന്നെ മതിമറന്ന് ആഹ്ലാദിക്കാൻ കാരണമാകാവുന്ന ധനത്തോടും സത്യത്തിൽ നിന്ന് പുറത്ത് വരാൻ തന്നെ നിർബന്ധിക്കുന്ന സത്യനിഷേധിയോടും ഈ പോരാട്ടം നടത്തണം.ധർമ്മ സമരമെന്നത് സായുധ പോരാട്ടത്തിൽ തളച്ചിടേണ്ടതല്ലെന്നും സ്വ ശരീരവും നന്മയിൽ നിന്നു നമ്മെ തടയുന്ന ചുറ്റുപാടുകളുമൊക്കെ ശ്രദ്ധിച്ച് അതിനെ പ്രതിരോധിക്കുന്ന നിലപാടാണ് ഈ പോരാട്ടത്തിന്റെ കാതലെന്നും നാം മനസിലാക്കുകയും അതിനനുസ്ര്‌തമായി പ്രവർത്തിക്കുകയും ചെയ്യലാണ് ധർമ്മ സമരം.ഈ നിലപാടാണ് നിങ്ങൾക്ക് ഗുണകരം എന്ന് കാര്യങ്ങൾ നേരാം വണ്ണം മനസിലാക്കുന്നുവെങ്കിൽ നിങ്ങൾക്ക് അറിയാനാവും എന്നാണ് അള്ളാഹു പറയുന്നത്

يَغْفِرْ لَكُمْ ذُنُوبَكُمْ وَيُدْخِلْكُمْ جَنَّاتٍ تَجْرِي مِن تَحْتِهَا الْأَنْهَارُ وَمَسَاكِنَ طَيِّبَةً فِي جَنَّاتِ عَدْنٍ ذَلِكَ الْفَوْزُ الْعَظِيمُ (12

എന്നാൽ നിങ്ങളുടെ പാപങ്ങൾ അവൻ നിങ്ങൾക്ക് പൊറുത്തുതരും താഴ്ഭാഗങ്ങളിൽ കൂടി അരുവികൾ ഒഴുകിക്കൊണ്ടിരിക്കുന്ന സ്വർഗങ്ങളിലും സ്ഥിരവാസത്തിന്റെ സ്വർഗങ്ങളിലുള്ള വിശിഷ്ട വാസ സ്ഥലങ്ങളിലും നിങ്ങളെ അവൻ പ്രവേശിപ്പിക്കുകയും ചെയ്യും അത് മഹത്തായ വിജയം തന്നെയാണ്

അള്ളാഹുവിലും റസൂലിലും വിശ്വസിക്കുകയും ആ വിശ്വാസം അനുസരിച്ച് പ്രവർത്തിക്കുകയും അള്ളാഹുവിന്റെ മാർഗത്തിൽ ദേഹധനാദികളാൽ സമരം ചെയ്യുകയും ചെയ്താലുള്ള നേട്ടങ്ങൾ അതിമഹത്തായിരിക്കും.പരലോകത്ത് പാപപരിഹാരവും ശാശ്വതമായ സ്വർഗജീവിതവുമാണതിനു ലഭിക്കുക ഒരിക്കലും നഷ്ടപ്പെടാത്ത ഈ വിജയം തന്നെയത്രെ യഥാർത്ഥ വിജയം!

(13) وَأُخْرَى تُحِبُّونَهَا نَصْرٌ مِّنَ اللَّهِ وَفَتْحٌ قَرِيبٌ وَبَشِّرِ الْمُؤْمِنِينَ

നിങ്ങൾ ഇഷ്ടപ്പെടുന്ന മറ്റൊരു അനുഗ്രഹവും (അവൻ നിങ്ങൾക്ക് നൽകും)അത് അള്ളാഹുവിൽ നിന്നുള്ള സഹായവും ആസന്ന വിജയവുമാണ് (നബിയേ)സത്യവിശ്വാസികൾക്ക് അങ്ങ് സന്തോഷവാർത്ത അറിയിക്കുക

ഈ കച്ചവടത്തിലേർപ്പെട്ടവർക്ക് പരലോകത്ത് മാത്രമല്ല പ്രതിഫലം ഇഹലോകത്ത് അള്ളാഹുവിന്റെ സഹായവും ശത്രുക്കൾക്കെതിരിൽ കൈവരുന്ന വിജയവും ലഭിക്കും ഇത് എത്ര മഹത്തായ പ്രതിഫലം!ഇത് എക്കാലത്തുമുള്ള സത്യവിശ്വാസികൾക്ക് ലഭിക്കാവുന്ന നേട്ടങ്ങളത്രെ

ياأيُّهَا الَّذِينَ آَمَنُوا كُونوا أَنصَارَ اللَّهِ كَمَا قَالَ عِيسَى ابْنُ مَرْيَمَ لِلْحَوَارِيِّينَ مَنْ أَنصَارِي إِلَى اللَّهِ قَالَ الْحَوَارِيُّونَ نَحْنُ أَنصَارُ اللَّهِ فَآَمَنَت طَّائِفَةٌ مِّن بَنِي إِسْرَائِيلَ وَكَفَرَت طَّائِفَةٌ فَأَيَّدْنَا الَّذِينَ آَمَنُوا عَلَى عَدُوِّهِمْ فَأَصْبَحُوا ظَاهِرِينَ (14

സത്യവിശ്വാസികളേ.നിങ്ങൾ അള്ളാഹുവിന്റെ സഹായികളായിത്തീരുക മർയമിന്റെ പുത്രൻ ഈസാ(അ) ഹവാരിയ്യുകളോട് അള്ളാഹുവിലേക്കു(ള്ള മാർഗത്തിൽ )എന്നെ സഹായിക്കുന്നവർ ആരാണ് എന്ന് പറഞ്ഞത് പോലെ.(അപ്പോൾ)ഹവാരിയ്യുകൾ പറഞ്ഞു.ഞങ്ങൾ അള്ളാഹുവിന്റെ സഹായികളാണ് (ഇത് പോലെ നിങ്ങളും ആയിത്തീരുക)എന്നിട്ട് ഇസ്രാഈല്യർ ഒരു വിഭാഗം വിശ്വസിക്കുകയും ഒരു വിഭാഗം നിഷേധിക്കുകയും ചെയ്തു അപ്പോൾ വിശ്വസിച്ചവർക്ക് അവരുടെ ശത്രുവിനെതിരിൽ നാം ശക്തിനൽകി അങ്ങനെ അവർ വിജയം നേടിയവരായിത്തീർന്നു

ഹവാരിയ്യ് എന്ന് പറഞ്ഞാൽ ഒരാളുടെ വളരെ അടുത്ത ഇഷ്ടക്കാരും പ്രത്യേകം തിരഞ്ഞെടുക്കപ്പെട്ടവരുമാണ് ഈസാ(അ)ന്റെ സഹായികളായശിഷ്യന്മാരാണിവിടെ ഹവാരിയ്യുകൾ എന്നതിന്റെ താല്പര്യം.അപ്പോസ്തലന്മാർ എന്നാണവർ അറിയപ്പെടുന്നത്.ഈസാ(അ)നെ ഒരുകൂട്ടർ നിഷേധിക്കുകയും അപായപ്പെടുത്താൻ ശ്രമിക്കുകയും ചെയ്തപ്പോൾ അള്ളാഹുവിന്റെ മതപ്രബോധനത്തിൽ എന്നെ സഹായിക്കനാരുണ്ടെന്ന് ഈസാ(അ)ചോദിച്ചപ്പോൾ ശിഷ്യന്മാരും സഹായികളുമായ ആളുകൾ ഞങ്ങൾ സഹായത്തിനുണ്ടെന്ന് പറയുകയും അള്ളാഹു അവർക്ക് ശക്തി പകരുകയും ചെയ്തു.അവർക്ക് അള്ളാഹുവിൽ നിന്നുള്ള വിജയത്തിനു അത് കാരണമാവുകയും ചെയ്തു(ഈസാ(അ)ന്റെ ഈ ശിഷ്യന്മാർ പന്ത്രണ്ട് പേരായിരുന്നു)

ഇത് പോലെ നിങ്ങളും അള്ളാഹുവിന്റെ മതത്തിന്റെ സഹായികളാവുക എന്നാണ് സത്യവിശ്വാസികളോട് അള്ളാഹു കല്പിക്കുന്നത് നബി(സ)യുടെ സഹായികളാവാൻ എല്ലാ വിശ്വാസികൾക്കും കടമയുണ്ടെങ്കിലും നബി(സ) യുടെ പ്രത്യേകക്കാരായ അൻ സാറുകൾ മുഴുവൻ ഖുറൈശികളിൽ പെട്ടവരായിരുന്നുവെന്നും , അബൂബക്കർ, ഉമർ, ഉസ്മാൻ, അലി,ഹംസ, ജഅ്ഫറുബിൻ അബീഥാലിബ്, അബൂ‍ ഉബൈദ:ബിൻ ജർറാഹ്,ഉസ്മാൻ ബിൻ മള് ഊൻ, അബ്ദു റഹ്മാൻ ബിൻ ഔഫ്, സഅദു ബിൻ അബീ വഖാസ്, ഉസ്മാൻ ബിൻ ഔഫ്,ഥൽഹത് ബിൻ ഉബൈദില്ലാഹ്, സുബൈർ ബിൻ അവ്വാം എന്നിവരായിരുന്നു ഈ പ്രത്യേകക്കാർ(റാ‍സി)

ബനൂഇസ്റാഈല്യരിലെ ഒരു വിഭാഗം വിശ്വസിക്കുകയും മറ്റൊരു ഭാഗം നിഷേധിക്കുകയും ചെയ്തു എന്ന ഭാഗം വിശദീകരിച്ചു കൊണ്ട് ഇമാം റാസി(റ)എഴുതുന്നു.ഈസാ(അ) ആകാശത്തേക്കുയർത്തപ്പെട്ടപ്പോൾ ബനൂ ഇസ്രാഈല്യർ മൂന്ന് വിഭാഗമായി.ഒരു കൂട്ടർ പറഞ്ഞത് ഈസാ(അ)അള്ളാഹു തന്നെയായിരുന്നു.അത് കൊണ്ട് ആകാശത്തേക്ക് സ്വയം ഉയർന്നു പോയതാണെന്നായിരുന്നു മറ്റൊരു കൂട്ടരുടെ കണ്ടെത്തൽ അള്ളാഹുവിന്റെ മകനായത് കൊണ്ട് അള്ളാഹു തന്നിലേക്ക് ഈസായെ ഉയർത്തി എന്നായിരുന്നു ഇത് രണ്ടും അവിശ്വാസത്തിന്റെ രണ്ട് ശൈലിയാണ് ഇവരാണ് കാഫിറായി എന്ന് പറഞ്ഞത്.എന്നാൽ ഇസ്രയേല്യരിലെ ഒരു വിഭാഗമാളുകൾ പറഞ്ഞു.ഈസാ(അ)അള്ളാഹുവിന്റെ അടിമയും റസൂലുമാണ് ആ ദൂതനെ അള്ളാഹു ആകാശത്തേക്കുയർത്തുകയാണ് ചെയ്തത് ഇവരാണ് അന്നത്തെ സത്യവിശ്വാസികൾ.അങ്ങനെ സത്യവിശ്വാസികളായ ഈ വിഭാഗത്തോട് അവിശ്വാസികളായ മറ്റെ രണ്ട് കൂട്ടരും കൂടി യുദ്ധം, ചെയ്തു.ആ യുദ്ധത്തിൽ സത്യ വിശ്വാസികൾക്ക് അള്ളാഹു വിജയം നൽകി.നബി(സ)യുടെ നിയോഗം വരെ ഇ അവസ്ഥ തുടർന്നു (റാസി)

അള്ളാഹുവിന്റെ ദീനിന്റെ ശരിയായ ആശയം നിലനിർത്താൻ സഹായികളായി നില കൊള്ളാൻ നമുക്കെല്ലാം ബാധ്യതയുണ്ട്.അള്ളാഹു നമ്മെ സത്യ ദീനിന്റെ ശരിയാ‍യ സഹായികളിലുൾപ്പെടുത്തട്ടെ ആമീൻ

അദ്ധ്യായം 60 -സൂറത്തുല്‍ മുംതഹന-ഭാഗം-02

2011-11-26T16:37:00.000+04:00

മദീനയിൽ അവതരിച്ചു : സൂക്തങ്ങൾ 13

بسم الله الرحمن الرحيم

പരമ കാരുണികനും കരുണാനിധിയുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

ഭാഗം-01 സൂക്തം 1 - 9 ഇവിടെ ക്ലിക് ചെയ്ത് വായിക്കുക

يَا أَيُّهَا الَّذِينَ آمَنُوا إِذَا جَاءكُمُ الْمُؤْمِنَاتُ مُهَاجِرَاتٍ فَامْتَحِنُوهُنَّ اللَّهُ أَعْلَمُ بِإِيمَانِهِنَّ فَإِنْ عَلِمْتُمُوهُنَّ مُؤْمِنَاتٍ فَلَا تَرْجِعُوهُنَّ إِلَى الْكُفَّارِ لَا هُنَّ حِلٌّ لَّهُمْ وَلَا هُمْ يَحِلُّونَ لَهُنَّ وَآتُوهُم مَّا أَنفَقُوا وَلَا جُنَاحَ عَلَيْكُمْ أَن تَنكِحُوهُنَّ إِذَا آتَيْتُمُوهُنَّ أُجُورَهُنَّ وَلَا تُمْسِكُوا بِعِصَمِ الْكَوَافِرِ وَاسْأَلُوا مَا أَنفَقْتُمْ وَلْيَسْأَلُوا مَا أَنفَقُوا ذَلِكُمْ حُكْمُ اللَّهِ يَحْكُمُ بَيْنَكُمْ وَاللَّهُ عَلِيمٌ حَكِيمٌ (10

സത്യവിശ്വാസികളേ.സത്യവിശ്വാസിനികളായ സ്ത്രീകൾ സ്വദേശം വിട്ടവരായി നിങ്ങളുടെ അടുത്ത് വന്നാൽ അവരെ നിങ്ങൾ പരീക്ഷിക്കണം.അവരുടെ വിശ്വാസത്തെക്കുറിച്ച് അള്ളാഹു ഏറ്റവും അറിയുന്നവനാണ് എന്നിട്ട് സത്യവിശ്വാസികളാണെന്ന് അവരെക്കുറിച്ച് നിങ്ങൾ മനസ്സിലാക്കിയാൽ അവരെ സത്യനിഷേധികളിലേക്ക് നിങ്ങൾ മടക്കി അയക്കരുത്,ആ സ്ത്രീകൾ അവർക്കും അവർ ആസ്ത്രീകൾക്കും അനുവദനീയമാവുകയില്ല സത്യ നിഷേധികൾ ചിലവഴിച്ചത് അവർക്ക് നിങ്ങൾ കൊടുക്കുകയും വേണം.ആ സ്ത്രീകൾക്ക് അവരുടെ മഹ്റ് കൊടുക്കുന്നതായാൽ അവരെ വിവാഹം ചെയ്യുന്നതിനു നിങ്ങൾക്ക് തെറ്റില്ല അവിശ്വാസികളുടെ വിവാഹ ബന്ധത്തിനുമേൽ നിങ്ങൾ പിടിച്ചു നിൽക്കരുത് നിങ്ങൾ ചിലവഴിച്ചത് നിങ്ങൾ ചോദിച്ചു വാങ്ങിക്കൊള്ളുക .അവർ ചിലവഴിച്ചത് അവരും ചോദിച്ചുവാങ്ങിക്കൊള്ളട്ടെ ഇതെല്ലാം അള്ളാഹുവിന്റെ നിയമമാകുന്നു അവൻ നിങ്ങൾക്കിടയിൽ വിധിനൽകുന്നു അള്ളാഹു സർവജ്ഞനും അഗാധജ്ഞനുമാണ്

സത്യനിഷേധികളിൽ നിന്ന് മൈത്രീബന്ധം സ്ഥാപിക്കാൻ പാടുള്ളവരെയും അല്ലാത്തവരെയും വിവരിച്ച ശേഷം സത്യനിഷേധികളുമായി മുസ്ലിംകൾ പാലിക്കേണ്ട ചില കാര്യങ്ങൾ അള്ളാഹു വിവരിക്കുകയാണ് ഹുദൈബിയ്യാ സന്ധിയിൽ ഉണ്ടാക്കിയ വ്യവസ്ഥയനുസരിച്ച് മുശ് രിക്കുകളുടെ പക്ഷത്ത് നിന്ന് മുസ്_ലിം പക്ഷത്തേക്ക് വരുന്നവരെ തിരിച്ചയക്കണം ഈ സന്ധി ഒപ്പിട്ട ശേഷം മക്കയിൽ നിന്ന് മുസ് ലിമായി മദീനയിലേക്ക് വന്ന ചിലരെ നബി(സ) തിരിച്ചയക്കുകയും ചെയ്തു എന്നാൽ ആ തിരിച്ചയക്കണമെന്ന വ്യവസ്ഥ സ്ത്രീകൾക്ക് ബാധകമല്ലെന്നാണിവിടെ ഉണർത്തുന്നത്

ഇബ്നു അബ്ബാസ്(റ)പറഞ്ഞതായി ഇമാം ഖുർത്വുബി(റ)ഉദ്ധരിക്കുന്നു.മക്കക്കാരാരെങ്കിലും നബി(സ)യുടെ അടുത്ത് വന്നാൽ അവരെ മക്കക്കാരിലേക്ക് തന്നെ മടക്കിഅയക്കണമെന്ന കരാർ ഒപ്പിട്ട സമയത്ത് സഈദ:ബിൻതുൽ ഹാരിസ് അൽ-അസ് ലമിയ്യ എന്നവർ നബി(സ)യുടെ അടുത്തെത്തി.(കരാർ ഒപ്പിട്ട് കഴിഞ്ഞു നബി(സ)ഹുദൈബിയ്യയിൽ നിന്ന് മടങ്ങുന്നതിനു മുമ്പായിരുന്നു അത്)പുറകെ അവരുടെ ഭർത്താവായ സൈഫിയ്യുബ്നു റാഹിബ് എന്ന അവിശ്വാസിയും അവിടെയെത്തി.എന്നിട്ട് അയാൾ പറഞ്ഞു. മുഹമ്മദ്!(സ) ,എന്റെ ഭാര്യയെ എനിക്ക് തിരിച്ചു നൽകണം കാരണം നിങ്ങളുണ്ടാക്കിയ കരാരിൽ അത് വ്യവസ്ഥ ചെയ്തിട്ടുണ്ട്.താങ്കൾ ഒപ്പിട്ട കരാറിലെ മഷിയുണങ്ങും മുമ്പെ ഈ കരാർ ലംഘിക്കരുത് .അപ്പോൾ അള്ളാഹു ഈ സൂക്തം അവതരിപ്പിച്ചു.സമാനമായ വെറെയും സംഭവങ്ങൾ റിപ്പോർട്ട് ചെയ്യപ്പെട്ടിണ്ട് വിശ്വാസികളായി തങ്ങളെ സമീപിക്കുന്ന മക്കക്കാരെ മടക്കി അയക്കണമെന്ന കരാറിൽ ആദ്യമേ സ്ത്രീകളെ വാക്കാൽ തന്നെ ഉൾപ്പെടുത്തിയിരുന്നുവെന്നും.പൊതു പ്രയോഗത്തിൽ അവർ കൂടി ഉൾ‌പ്പെട്ടതാണെന്നും ഭിന്നാഭിപ്രായമുണ്ട് രണ്ടായാലും സ്ത്രീകൾക്കീ നിയമം ബാധകമാക്കരുതെന്ന് അള്ളാഹു വ്യക്തമാക്കിയിരിക്കുകയാണീ സൂക്തത്തിലൂടെ.(ഖുർത്വുബി)

സ്ത്രീ, പുരുഷനേക്കാൾ ലോല ഹൃദയമുള്ളവളായതിനാലും സത്യ വിശ്വാസത്തിന്റെ മേന്മയുള്ള അവളെ സത്യനിഷേധി തന്റെ ശാരീരിക ബന്ധത്തിനുപയോഗിക്കുന്നതിലെ അനൌചിത്യം സൂക്ഷിച്ചുമാണ് സ്ത്രീകളെ മടക്കി അയക്കരുതെന്ന് ഇസ്ലാം വ്യവസ്ഥ ചെയ്തത്(ഖുർത്വുബി). മക്കയിലുള്ള സ്ത്രീകൾ പലപ്പോഴും ഭർത്താവിനോട് വല്ല പിണക്കവുമുണ്ടായാൽ ഞാൻ മദീനയിലേക്ക് ഹിജ്റ പോകുമെന്ന് ഭീഷണിപ്പെടുത്തിയിരുന്നു അതിനാൽ ശരിക്കും സത്യവിശ്വാസ സംരക്ഷണത്തിനു തന്നെയാണോ അവർ വന്നത് എന്ന് പരീക്ഷിച്ച് മാത്രമേ അവരെ സ്വീകരിക്കാവൂ എന്ന് ഇസ്ലാം പറഞ്ഞു

അവരുടെ വിഷയത്തിൽ സ്വീകരിക്കേണ്ട നടപടി ഇനി പറയുന്നവയാണ്

(1)സത്യ നിഷേധികളുടെ പക്ഷത്ത് നിന്ന് മുസ്ലിം പക്ഷത്തേക്ക് സത്യവിശ്വാസം ഉൾക്കൊണ്ടു എന്ന് പറഞ്ഞു വരുന്ന സ്ത്രീകളെ അവരുടെ വാദം ശരിയാണോ എന്ന് ഉറപ്പ് വരുത്താനായി ഒന്ന് പരീക്ഷിക്കണം അവരുടെ യഥാർത്ഥനിലയെന്താണെന്ന് അള്ളാഹുവിനു നന്നായി അറിയാം പക്ഷെ ബാഹ്യ നില നോക്കിയാണല്ലോ ഈ ലോകത്ത് നടപടികൾ സ്വീകരിക്കേണ്ടത് അത് കൊണ്ട് മുസ് ലിംകൾക്ക് അവരുടെ നില വ്യക്തമാവേണ്ടതുണ്ട് ഈ കല്പന പ്രകാരം നബി(സ)യുടെ അടുത്ത് വന്ന സ്ത്രീകളെ മുസ്ലിംകൾ പരീക്ഷിച്ചു താൻ മദീനയിലേക്ക് വന്നത് ഭർത്താവിനോടുള്ള വിരോധം കൊണ്ടല്ലെന്നും മറുനാട്ടിലേക്ക് യാത്ര ചെയ്യാനുള്ള ആഗ്രഹം കൊണ്ടല്ലെന്നും ഭൌതിക നേട്ടം ലക്ഷ്യമാക്കിയല്ലെന്നും മദീനയിലുള്ള ഏതെങ്കിലും പുരുഷനെ മോഹിച്ചല്ലെന്നും പ്രത്യുത അള്ളാഹുവോടും റസൂലിനോടുമുള്ള സ്നേഹം കൊണ്ട് മാത്രമാണെന്നും അള്ളാഹു മാത്രമെ ആരാധ്യനുള്ളൂ എന്ന് ഞാൻ സത്യം ചെയ്യുന്നു എന്നും ഓരോ സ്ത്രീയിൽ നിന്നും സത്യവാങ്മൂലം ലഭിച്ച ശേഷമേ നബി(സ) അവരെ സ്വീകരിച്ചുള്ളൂ

(2)പരീക്ഷണത്തിൽ അവർ സത്യവിശ്വാസിനികളായിത്തന്നെയാണ് വന്നതെന്ന് തെളിഞ്ഞാൽ പിന്നെ അവരെ സത്യനിഷേധികളായ ഭർത്താക്കളുടെയോ നാട്ടുകാരുടെയോ അടുക്കലേക്ക് തിരിച്ചയക്കരുത്

(3‌)സത്യവിശ്വാസിനികളായ സ്ത്രീകളും സത്യനിഷേധികളായ പുരുഷന്മാരും തമ്മിൽ വിവാഹ ബന്ധം, പാടില്ല മതപരമായി ഇരു ദ്രുവങ്ങളിലായതാണ് അവരെ പിരിക്കാൻ കാരണം അല്ലാതെ രണ്ട് നാട്ടിലായി എന്നതല്ല.(മതപരമായ വിശുദ്ധിക്ക് കളങ്കം വരുത്തുന്ന വ്യത്യസ്ഥ ആശയക്കാർ തമ്മിലുള്ള വിവാഹത്തിന്റെ അപകടം ഇവിടെ നമുക്ക് മനസിലാക്കാം)

(4)സ്ത്രീ ഇസ്ലാം സ്വീകരിക്കുകയും ഭർത്താവ് സത്യനിഷേധത്തിൽ തുടരുകയും ചെയ്താൽ അവർ തമ്മിലുള്ള വിവാഹ ബന്ധം വെർപ്പെടുന്നതാണ്പക്ഷെ ആ ഭാര്യാഭർത്താക്കൾ തമ്മിൽ സംയോഗം നടന്നിട്ടുണ്ടെങ്കിൽ അവളുടെ ഇദ്ദ: കഴിയുന്നതിനു മുമ്പ് അവനും ഇസ് ലാമിലേക്ക് വന്നാൽ വിവാഹ ബന്ധം വേർപെടുന്നതല്ല ആദ്യ വിവാഹത്തിന്മേൽ തന്നെ അവർക്ക് ഭാര്യാ ഭർത്താക്കളായി തുടരാം

(5)ഭർത്താവ് മുസ്ലിമാവുകയും ഭാര്യ സത്യ നിഷേധത്തിൽ തുടർന്നാലും വിവാഹ ബന്ധം മുറിയുന്നതാണ്

(6)സ്ത്രീ മുസ്ലിമായതിനെത്തുടർന്ന് വിവാഹ ബന്ധം വേർപെട്ടുപോകുന്ന സ്ത്രീകളെ നിബന്ധനകൾ അനുസരിച്ച് മുസ്ലിംകൾക്ക് വിവാഹം ചെയ്യാവുന്നതാണ് ഈ ആയത്തിന്റെ അവതരണത്തോടെ ഇത് ഇസ്ലാമിലെ സ്ഥിര നിയമമായി .ഇതിനു മുമ്പ് ഇവയെക്കുറിച്ച് പ്രത്യേകനിയമങ്ങളൊന്നും വന്നിട്ടില്ലായിരുന്നു അത് കൊണ്ടായിരുന്നു നബി(സ)യുടെ പുത്രി സൈനബ്(റ)യെ വിവാഹം ചെയ്ത അബുൽ ആസി അവിശ്വാസത്തിൽ തുടർന്നിട്ടും അദ്ദേഹത്തോടൊപ്പം താമസിക്കാൻ മകൾക്ക് നബി(സ)അനുവാദം നൽകിയത്.പിന്നീട് സൈനബ്(റ)യെ മദീനയിലെത്തിക്കാൻ നിർബന്ധിക്കപ്പെടുകയും ഭർത്താവിനെ വിട്ട് അവർ മദീനയിലെത്തുകയും ചെയ്തു.പിന്നീട് അബുൽ ആസ്വി മുസ് ലിമായതിനു ശേഷമാണ് ഒന്നിക്കാൻ നബി(സ)അനുവദിച്ചത്

(7) മേൽ പ്രകാരം വിവാഹ ബന്ധം മുറിഞ്ഞ സ്ത്രീകളെ മുസ്ലിംകൾ വിവാഹം ചെയ്യുമ്പോൾ അവർക്ക് മര്യാദയനുസരിച്ച് മഹ് റ് നൽകണം അവർ ചിലവഴിച്ചത് എന്നതിന്റെ വിവക്ഷ മഹ്ർ ആണ്

(8)മുൻ വിവാഹങ്ങളിൽ അവർക്ക് ഭർത്താക്കൾ നൽകിയിരുന്ന മഹ് റുകൾ മുസ്ലിംകൾക്ക് സത്യ നിഷേധികളുടെ ഭാഗത്ത് നിന്നും സത്യ നിഷേധികൾക്ക് മുസ്ലിംകളുടെ ഭാഗത്ത് നിന്നും തിരിച്ചു വാങ്ങാവുന്നതാണ് ഈ ഇനത്തിൽ മുസ്ലിംകൾ നൽകേണ്ട സംഖ്യ ഗനീമത്ത് തുടങ്ങിയ പൊതു ഭണ്ഡാരത്തിൽ നിന്ന് ഭരണാധികാരി നൽകേണ്ടതാണ്

ഇമാം റാസി(റ)എഴുതുന്നു.ഈ സൂക്തത്തിന്റെ ഘടനയിൽ ഒരു വലിയ സൌന്ദര്യം ഉണ്ട്.അതായത് സത്യ നിഷേധികൾ മൂന്ന് വിഭാഗമാണ്

(1)സത്യനിഷേധത്തിൽ തന്നെ മാറ്റമില്ലാതെ തുടരുന്നവർ അവരോട് സ്വീകരിക്കേണ്ട സമീപമനമാണ് ഈ അദ്ധ്യായത്തിലെ നാലാം സൂക്തത്തിൽ

ഇബ് റാഹീമി(അ)ലും അവരോടൊന്നിച്ചുള്ളവരിലും നിങ്ങൾക്ക് മാത്ര്‌കയുണ്ടായിട്ടുണ്ട്.അവർ തങ്ങളുടെ ജനതയോട് പറഞ്ഞ സന്ദർഭം.നിശ്ചയമായും ഞങ്ങൾ നിങ്ങളിൽ നിന്നും അള്ളാഹുവെക്കൂടാതെ നിങ്ങൾ ആരാധിക്കുന്നവയിൽ നിന്നും ഒഴിവായവരാകുന്നു അള്ളാഹു ഒരുവൻ എന്ന നിലക്ക് നിങ്ങൾ അവനിൽ വിശ്വസിക്കുന്നത് വരെ എക്കാലത്തും ഞങ്ങൾ നിങ്ങളെ നിഷേധിക്കുകയും ഞങ്ങൾക്കും നിങ്ങൾക്കുമിടയിൽ ശത്രുതയും അമർഷവും വെളിപ്പെടുകയും ചെയ്തിരിക്കുന്നു)

വിവരിച്ചത്

(2)ഇപ്പോൾ ശത്രുക്കളാണെങ്കിലും ആ ശാത്രവം അവരിൽ നിന്ന് നീങ്ങുമെന്ന് പ്രതീക്ഷിക്കാവുന്നവർ.ഈ അദ്ധ്യായത്തിലെ ഏഴാം സൂക്തം(

عَسَى اللَّهُ أَن يَجْعَلَ بَيْنَكُمْ وَبَيْنَ الَّذِينَ عَادَيْتُم مِّنْهُم مَّوَدَّةً وَاللَّهُ قَدِيرٌ وَاللَّهُ غَفُورٌ رَّحِيمٌ

നിങ്ങൾക്കും അവരിൽ നിന്ന് നിങ്ങൾ ശത്രുതവെച്ചവർക്കുമിടയിൽ അള്ളാഹു സ്നേഹബന്ധം ഉണ്ടാക്കിയേക്കാം അള്ളാഹു സർവശക്തനാണ് വളരെ പൊറുക്കുന്നവനും പരമ കാരുണികനുമാണ്)

ഇതിലേക്ക് സൂചനയാണ്

(3)ശത്രുത ഒഴിവാക്കി സത്യത്തിലേക്ക് വരുന്നവർ. ഈ അവസ്ഥയിലേക്കാണ് ഈ സൂക്തം വിരൽ ചൂണ്ടുന്നത്,ഓരോഘട്ടത്തിലും അവർക്ക് അർഹതപ്പെട്ട സമീപനം അവരോട് സ്വീകരിക്കണമെന്ന് അള്ളാഹു കൽ‌പ്പിച്ചതിലൂടെ സത്സ്വഭാവത്തിന്റെ എല്ലാ വഴികളും അള്ളാഹു അറിയിച്ചിരിക്കുകയാണ്(റാസി)

وَإِن فَاتَكُمْ شَيْءٌ مِّنْ أَزْوَاجِكُمْ إِلَى الْكُفَّارِ فَعَاقَبْتُمْ فَآتُوا الَّذِينَ ذَهَبَتْ أَزْوَاجُهُم مِّثْلَ مَا أَنفَقُوا وَاتَّقُوا اللَّهَ الَّذِي أَنتُم بِهِ مُؤْمِنُونَ(11

നിങ്ങളുടെ ഭാര്യമാരിൽ നിന്ന് ആരെങ്കിലും അവിശ്വാസികളുടെ കൂട്ടത്തിലേക്ക്(പോയിട്ട് നിങ്ങൾക്ക്) നഷ്ടപ്പെടുകയും എന്നിട്ട് നിങ്ങൾ അനന്തര നടപടി എടുക്കുകയും ചെയ്യുകയാണെങ്കിൽ ആരുടെ ഭാര്യമാർ വിട്ടുപോയിട്ടുണ്ടോ അവർ ചിലവ് ചെയ്തത് പോലെയുള്ളത് നിങ്ങൾ അവർക്ക് കൊടുത്തുകൊള്ളുക നിങ്ങൾ യാതൊരുവനിൽ വിശ്വസിക്കുന്നവരാണോ ആ അള്ളാഹുവിനെ സൂക്ഷിക്കുക

മുസ്ലിംകളുടെ ഭാര്യമാരിൽ ആരെങ്കിലും ശത്രുപക്ഷത്തേക്ക് പോവുകയും അവരിൽ നിന്ന് മഹ്ർ തിരിച്ചു കിട്ടാൻ മാർഗമില്ലാതാവുകയും ചെയ്താൽ അതിനുള്ള നിവാരണമാണിവിടെ പറയുന്നത് അതായത് അമുസ്ലിംകളുമായി അതിനു ശേഷം അനന്തരനടപടിയെടുക്കുവാൻ അവസരം ലഭിക്കുമ്പോൾ ആ നഷ്ട സംഘ്യ കൊടുക്കണം യുദ്ധത്തിൽ ഗനീമത്ത് ലഭിക്കുമ്പോൾ അതിൽ നിന്നോ മുസ്ലിംകളുടെ ഭാഗത്ത് നിന്ന് അവർക്ക് നൽകേണ്ട മഹ് റുകളിൽ നിന്നോ ഇത് കൊടുക്കേണ്ടതാണ് ഗനീമത്തിൽ നിന്ന് ഇത് കഴിച്ചു ബാക്കിയുള്ളതെ ഓഹരി ചെയ്യേണ്ടതുള്ളൂ

يَا أَيُّهَا النَّبِيُّ إِذَا جَاءكَ الْمُؤْمِنَاتُ يُبَايِعْنَكَ عَلَى أَن لَّا يُشْرِكْنَ بِاللَّهِ شَيْئًا وَلَا يَسْرِقْنَ وَلَا يَزْنِينَ وَلَا يَقْتُلْنَ أَوْلَادَهُنَّ وَلَا يَأْتِينَ بِبُهْتَانٍ يَفْتَرِينَهُ بَيْنَ أَيْدِيهِنَّ وَأَرْجُلِهِنَّ وَلَا يَعْصِينَكَ فِي مَعْرُوفٍ فَبَايِعْهُنَّ وَاسْتَغْفِرْ لَهُنَّ اللَّهَ إِنَّ اللَّهَ غَفُورٌ رَّحِيمٌ(12

നബിയേ.സത്യവിശ്വാസിനികളായ സ്ത്രീകൾ തങ്ങൾ അള്ളാഹുവിനോട് യാതൊന്നിനെയും പങ്കു ചേർക്കുകയില്ലെന്നും മോഷ്ടിക്കുകയില്ലെന്നും വ്യഭിചരിക്കുകയില്ലെന്നും തങ്ങളുടെ സന്താനങ്ങളെ കൊന്നുകളയുകയില്ലെന്നും മന:പൂർവം കെട്ടിച്ചമക്കുന്ന യാതൊരു കള്ളവാദവും കൊണ്ട് വരികയില്ലെന്നും ഒരു നല്ല കാര്യത്തിലും തങ്ങളോട് അനുസരണക്കേട് കാണിക്കുകയില്ലെന്നും ബൈഅത്ത്(പ്രതിജ്ഞ) ചെയ്യുവാനായി തങ്ങളുടെ അടുക്കൽ വന്നാൽ അവരോട് പ്രതിജ്ഞ വാങ്ങുകയും അവർക്ക് വേണ്ടി അള്ളാഹുവിനോട് പൊറുക്കലിനെ തേടുകയും ചെയ്യുക നിശ്ചയമായും അള്ളാഹു വളരെ പൊറുക്കുന്നവനും പരമ കാരുണികനുമാകുന്നു

മക്കാ വിജയത്തെതുടർന്ന് മക്കക്കാരായ പലരും സത്യ വിശ്വാസം സ്വീകരിക്കുകയും തങ്ങൾ ഭാവിയിൽ ഇസ്ലാമിക നിയമമനുസരിച്ച് ജീവിക്കാമെന്ന് നബി(സ)യോട് ഉടമ്പടി ചെയ്യുകയുമുണ്ടായി കൂട്ടത്തിൽ മക്കയിലെ സ്ത്രീകളും ബൈഅത്തിനു വന്നിരുന്നു അവരിൽ നിന്നു വാങ്ങേണ്ട ഉടമ്പടിയുടെ രൂപമാണ് ഈ വാക്യത്തിൽ പരാമർശിക്കുന്നത്.കണ്ണിൽ കാണുന്നതിനെയെല്ലാം പൂജിച്ചിരുന്ന അവരോട് ഇനി ഒരിക്കലും അള്ളാഹു അല്ലാത്ത ഒന്നിനും നിങ്ങൾ ആരാധിക്കരുതെന്നും കളവ് നടത്തരുതെന്നും വ്യഭിചരിക്കരുതെന്നും പ്രതിജ്ഞ ചെയ്യണം. പെൺകുഞ്ഞ് ജനിച്ചാലുടൻ കുഴിച്ചു മൂടുന്ന പതിവ് ജാഹിലിയ്യ അറബികൾക്കുണ്ടായിരുന്നല്ലോ!അതിനെ സൂചിപ്പിച്ചാണ് സന്താനങ്ങളെ കൊന്നുകളയില്ലെന്ന കാര്യം പറഞ്ഞത് ഈ കൊല ചിലപ്പോൾ സ്ത്രീകളും ചിലപ്പോൾ പുരുഷന്മാരും ചെയ്തിരുന്നു മറ്റു നിലക്കുള്ള കൊലകളും നടന്നിരുന്നു അതൊന്നും ഇനി ഉണ്ടാവരുതെന്നാണ് ഉടമ്പടിയുടെ സാരം,ഭർത്താവിന്റേതല്ലാത്ത സന്താനത്തെ ഭർത്താവിലേക്ക് ചേർത്ത് പറയുന്നതിനെ സൂചിപ്പിച്ചാണ് കെട്ടിച്ചമക്കുന്ന കള്ളവാദം എന്ന് പറഞ്ഞത് പരപുരുഷ ബന്ധങ്ങളും അസാന്മാർഗിക ജീവിതരീതിയും ഏഷണി പോലുള്ള തിന്മകളും ഇതിന്റെ പരിധിയിൽ വരുന്നതാണ്. നബി(സ) എന്ത് കൽ‌പ്പിച്ചാലും അനുസരിക്കണമെന്നാണ് ഒരു നല്ല കാര്യത്തിലും തങ്ങളോട് അനുസരണക്കേട് കാണിക്കുകയില്ലെന്നു പറഞ്ഞത്.വേണ്ടപ്പെട്ടവർ മരണപ്പെട്ടാൽ അട്ടഹസിക്കലും കിടന്നുരുണ്ടും മുടി പിടിച്ചു വലിച്ചും വസ്ത്രം കിറിപ്പറിച്ചും പൊറുതികേട് കാണിക്കരുതെന്നും അന്യ പുരുഷന്മ്രുമായി ഒറ്റക്ക് ഒരു സ്ത്രീയും കൂടരുതെന്നും അനിയന്ത്രിതമായ സ്ത്രീ പുരുഷ സങ്കലനം നടക്കരുതെന്നുമെല്ലാം ഈ കല്പനയുടെ പരിധിയിൽ വരുന്നുണ്ട്. ബൈഅത്തിന്റെ സമയത്ത് വർജ്ജിക്കേണ്ട കാര്യങ്ങൾ മാത്രമാണിവിടെ സൂചിപ്പിച്ചത്. പ്രവർത്തിക്കേണ്ട ശഹാദത്ത് ചൊല്ലൽ, നിസ്ക്കരിക്കൽ,സക്കാത്ത് കൊടുക്കൽ, നോമ്പ് നോൽക്കൽ, ഹജ്ജ് ചെയ്യൽ, വലിയ അശുദ്ധിയുണ്ടായാൽ കുളിച്ച് ശുദ്ധിയാവൽ എന്നിവയൊന്നും പറഞ്ഞില്ലല്ലോ എന്ന ചോദ്യത്തിനു വിരോധങ്ങൾ എല്ലാ കാലത്തും വിരോധമായി തന്നെ നില നിൽക്കുന്നതാണ്. പ്രവർത്തിക്കെണ്ടവ ചിലപ്പോഴെങ്കിലും ചെയ്യേണ്ടതില്ലാത്ത അവസ്ഥയുണ്ടാവാം.അത് കൊണ്ട് വർജ്ജിക്കേണ്ടതിന്റെ ഗൌരവം ചൂണ്ടിക്കാണിച്ചതാണ് എന്നാണ് ഉത്തരം. നബി(സ)അവരോട് ബൈഅത്ത് ചെയ്തത് സംസാരത്തിലൂടെ മാത്രമായിരുന്നു പരസ്ത്രീ സ്പർശനം ഉണ്ടായിരുന്നില്ല.എന്താണ് കൈതരാത്തതെന്ന് ചോദിച്ച സ്ത്രീയോട് ഞാൻ സ്ത്രീകൾക്ക് കൈകൊടുക്കുന്നതല്ല എന്ന് നബി(സ)പറഞ്ഞു (ഖുർത്വുബി)

يَا أَيُّهَا الَّذِينَ آمَنُوا لَا تَتَوَلَّوْا قَوْمًا غَضِبَ اللَّهُ عَلَيْهِمْ قَدْ يَئِسُوا مِنَ الْآخِرَةِ كَمَا يَئِسَ الْكُفَّارُ مِنْ أَصْحَابِ الْقُبُورِ(13

സത്യ വിശ്വാസികളേ.അള്ളാഹു കോപിച്ച ഒരു ജനതയോട് നിങ്ങൾ മൈത്രീബന്ധം സ്ഥാപിക്കരുത് ഖബ് റുകളിൽ ഉള്ളവരെ പറ്റി സത്യനിഷേധികൾ നിരാശപ്പെട്ടത് പോലെ അവർ പരലോകത്തെ സംബന്ധിച്ച് നിരാശപ്പെടുക തന്നെ ചെയ്തിരിക്കുന്നു

അദ്ധ്യായത്തിന്റെ തുടക്കത്തിൽ പറഞ്ഞ കാര്യം ഒന്നു കൂടി സൂചിപ്പിക്കുകയാണിവിടെ. അള്ളാഹു കോപിച്ച ജനത എന്ന് പറഞ്ഞതിൽ അള്ളാഹുവിന്റെ ശാപ/കോപത്തിനിരയായ എല്ലാവരും പെടും പരലോകത്തെ സംബന്ധിച്ച് നിരാശപ്പെട്ടു എന്ന് പറഞ്ഞത് പരലോക നന്മയെതൊട്ട് നിരാശരായി എന്നത്രെ. ഖബ് റുകളിൽ ഉള്ളവരെ പറ്റി സത്യനിഷേധികൾ നിരാശപ്പെട്ടത് പോലെ എന്നാൽ മരിച്ചു മണ്ണടിഞ്ഞവർ ഇനി തിരിച്ചു വരുമെന്ന് അവർ പ്രതീക്ഷിക്കാത്തത് പോലെ പരലോക നമയെ തൊട്ടും അവർ നിരാശരാണെന്ന് സാരം ഖബ് റിലുള്ളവർ എല്ലാ നന്മയെ തൊട്ടും നിരാശരായത് പോലെ എന്നും വ്യഖ്യാനമുണ്ട്

അള്ളാഹു നമ്മെ ഇരുലോകത്തെയും നന്മപ്രതീക്ഷയുള്ളവരിൽ ഉൾപ്പെടുത്തട്ടെ ആമീൻ

അദ്ധ്യായം 60 -സൂറത്തുൽ മുംതഹന:(ഭാഗം-01)

2011-11-14T16:46:00.001+04:00

سورة الممتحنة

മദീനയിൽ അവതരിച്ചു : സൂക്തങ്ങൾ 13

മുംതഹന എന്നാൽ പരീക്ഷിക്കപ്പെടുന്നവൾ എന്നാണ് അർത്ഥം. ഈ അദ്ധ്യായത്തിന്റെ പത്താം വാക്യത്തിൽ വരുന്ന വിഷയവുമായി ബന്ധപ്പെടുത്തിയാണ് ഈ അദ്ധ്യായത്തിനു ഈ നാമം നൽകിയിട്ടുള്ളത്

بسم الله الرحمن الرحيم

പരമ കാരുണികനും കരുണാനിധിയുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

يَا أَيُّهَا الَّذِينَ آمَنُوا لَا تَتَّخِذُوا عَدُوِّي وَعَدُوَّكُمْ أَوْلِيَاء تُلْقُونَ إِلَيْهِم بِالْمَوَدَّةِ وَقَدْ كَفَرُوا بِمَا جَاءكُم مِّنَ الْحَقِّ يُخْرِجُونَ الرَّسُولَ وَإِيَّاكُمْ أَن تُؤْمِنُوا بِاللَّهِ رَبِّكُمْ إِن كُنتُمْ خَرَجْتُمْ جِهَادًا فِي سَبِيلِي وَابْتِغَاء مَرْضَاتِي تُسِرُّونَ إِلَيْهِم بِالْمَوَدَّةِ وَأَنَا أَعْلَمُ بِمَا أَخْفَيْتُمْ وَمَا أَعْلَنتُمْ وَمَن يَفْعَلْهُ مِنكُمْ فَقَدْ ضَلَّ سَوَاء السَّبِيلِ (1

സത്യ വിശ്വാസികളേ എന്റെയും നിങ്ങളുടെയും ശത്രുവായവരോട് സ്നേഹ ബന്ധം കാണിച്ചുകൊണ്ട് അവരെ നിങ്ങൾ മിത്രങ്ങളാക്കി വെക്കരുത് നിങ്ങൾക്ക് വന്നുകിട്ടിയ സത്യത്തെ അവർ നിഷേധിച്ചിരിക്കെ, സൂലിനെയും നിങ്ങളെയും രക്ഷിതാവായ അള്ളാഹുവിൽ നിങ്ങൾ വിശ്വസിച്ചു എന്ന കാരണത്താൽ അവർ പുറത്താക്കുന്നു.നിങ്ങൾ എന്റെ മാർഗത്തിൽ യുദ്ധം ചെയ്യുന്നതിനും എന്റെ തൃപ്തിനേടുന്നതിനും പുറപ്പെട്ടിരിക്കുകയാണെങ്കിൽ (നിങ്ങൾ അവരെ മിത്രങ്ങളാക്കരുത്)നിങ്ങൾ അവരോട് രഹസ്യമായി സ്നേഹബന്ധം നടത്തുന്നു ഞാനാവട്ടെ നിങ്ങൾ മറച്ചുവെച്ചതും വെളിപ്പെടുത്തിയതും അറിയുന്നുണ്ട് നിങ്ങളിൽ നിന്ന് ആരെങ്കിലും അത് ചെയ്യുന്നതായാൽ അവർ നേർമാർഗം തെറ്റിപ്പോയതുതന്നെ

ശത്രുവിനോട് സ്നേഹബന്ധം പാടില്ലെന്ന് വിലക്കാനുണ്ടായ കാരണത്തെ ഇങ്ങനെയാണ് വിവരിക്കപ്പെട്ടത്. നബി(സ)മക്കാവിജയ യാത്രക്ക് തയാറായിക്കൊണ്ടിരിക്കുന്നു. ആ സമയത്ത് ഹാഥിബു ബിൻ അബീ ബൽത അ(റ)എന്ന സഹാബി മക്കയിലേക്ക് പോകുന്ന ഒരു സ്ത്രീവശം

(സാറ:എന്നായിരുന്നു അവരുടെ പേര്. മക്കയിലെ ബനൂഹാശിമിന്റെ ദാസിയായിരുന്നു അവർ.ഒരിക്കൽ അവർ മദീനയിൽ വന്ന് നബി(സ)യെക്കണ്ടു. മുസ്ലിമത്തായാണോ നിങ്ങൾ വന്നത് എന്ന് നബി(സ) ചോദിച്ചു അല്ലെന്ന് അവർ പറഞ്ഞു. മദീനയിലേക്ക് ഹിജ്റയായി വന്നതാണോ എന്ന് നബി(സ) ചോദിച്ചു.അല്ലെന്ന് അവർ പറഞ്ഞു.പിന്നെ എന്താണ് വരവിന്റെ ഉദ്ദേശ്യം എന്ന് നബി(സ)ചോദിച്ചു , എന്റെ യജമാനന്മാരൊക്കെ ബദ്_റിലും മറ്റും കൊല്ലപ്പെട്ടു ഇപ്പോൾ ഞാൻ സാമ്പത്തികമായി വലിയ കഷ്ടത്തിലാണെന്നും സഹായം പ്രതീക്ഷിച്ചു വന്നതാണെന്നും പറഞ്ഞു. അവർക്ക്ധാരാളം സമ്പത്തും, വസ്ത്രങ്ങളുമെല്ലാം നൽകി മക്കയിലേക്ക് അവരെ യാത്രയാക്കി.അപ്പോഴാണ് പത്ത് ദീനാർ നൽകി ഹാഥിബ്(റ)ഈ സ്ത്രീയെ സമീപിച്ച് എഴുത്ത് കൊണ്ടു പോകാൻ ഏർപ്പാടാക്കിയത്)

ഖുറൈശികൾക്ക് ഒരു എഴുത്ത് കൊടുത്തയച്ചു .റസൂൽ(സ)യും അനുയായികളും അങ്ങോട്ട് വരുന്നുണ്ടെന്നും സുക്ഷിക്കണമെന്നുമായിരുന്നു അതിലുണ്ടായിരുന്നത് ഈ വിവരം നബി(സ)യെ അള്ളാഹു അറിയിച്ചു.നബി(സ)അലി(റ)ന്റെ നേത്ര്വത്തിൽ സുബൈർ(റ) മിഖ്ദാദ്(റ)എന്നിവരെ(ആ സംഘത്തിൽ മറ്റു ചില സഹാബികളുടെ പേരും രേഖപ്പെടുത്തപ്പെട്ടിട്ടുണ്ട്) ആ സ്ത്രീയെ പിടി കൂടാനായി നിയോഗിച്ചു റൌളത്തു ഖാഖ് روضة خاخ എന്ന സ്ഥലത്ത് ആ സ്ത്രീഉണ്ടാവുമെന്നും അവളിൽ നിന്ന് ആ കത്ത് തിരിച്ചുവാങ്ങണമെന്നും നബി(സ) അറിയിച്ചു അവർ താമസം വിനാ അവിടെയെത്തി സ്ത്രീയെ കണ്ടെത്തി കത്തിന്റെ കാര്യം ആദ്യം നിഷേധിച്ചെങ്കിലും നബി(സ)സത്യമേ പറയൂ എന്നും സ്വമേഥയാ നിങ്ങൾ കത്ത് നൽകിയില്ലെങ്കിൽ വസ്ത്രം അഴിച്ച് പരിശോധിച്ചിട്ടാണെങ്കിൽ പോലും ഞങ്ങൾ കത്ത് കണ്ടെത്തുമെന്നും അലി(റ)പറഞ്ഞു. പിടിക്കപ്പെട്ടെന്നുറപ്പായപ്പോൾ മുടിക്കെട്ടിൽ സൂക്ഷിച്ചു വച്ചിരുന്ന കത്തെടുത്ത് സഹാബികളെ ഏൽ‌പ്പിച്ചു .അവർ കത്ത് നബി(സ)ക്ക് കൈമാറുകയും ഈ കത്തിനെ പറ്റി ഹാഥിബ്(റ)നോട് നബി(സ) അന്വേഷിക്കുകയും ചെയ്തു.അള്ളാഹുവിന്റെ ദൂതരേ! ഇസ് ലാമിൽ വന്ന ശേഷം ഞാൻ സത്യ നിഷേധിയായിട്ടില്ല. അങ്ങയെ വഞ്ചിട്ടുമില്ല ഖുറൈശിനെ വിട്ട് പോന്ന ശേഷം അവരെ ഞാൻ സ്നേഹിച്ചിട്ടുമില്ല എന്നാൽ ഞാൻ ഖുറൈശിൽ പെട്ടവനല്ല അവരുമായി ഒരു കെട്ടുപാട് മാത്രമാണ് എനിക്കുള്ളത് അങ്ങയുടെ കൂടെയുള്ള എല്ലാ മുഹാജിറുകൾക്കും തങ്ങളുടെ കുടുംബങ്ങളെയും സമ്പത്തും സംരക്ഷിക്കാൻ മക്കയിൽ ആളുണ്ട് എനിക്ക് അവരുമായി കുടുംബ ബന്ധമില്ലാത്തതിനാൽ എന്റെ കുടുംബത്തെ അവർ ഉപദ്രവിക്കാതിരിക്കാനായി ഒരു സഹായം അവർക്ക് നൽകാൻ ഞാൻ ആലോചിച്ചതാണ് ഒരിക്കലും സത്യ നിഷേധത്താൽ ചെയ്തതല്ല എന്ന് ഹാഥിബ്(റ)പറഞ്ഞു.നബി(സ) അത് സ്വീകരിച്ചു ഹാഥിബ്(റ) സത്യവാൻ തന്നെ എന്ന് നബി(സ)പ്രഖ്യാപിച്ചു അപ്പോൾ ഉമർ(റ) നബിയേ ഈ കപടന്റെ തലയെടുക്കാൻ അനുവാദം നൽകിയാലും എന്ന് ആവശ്യപ്പെട്ടു.അദ്ദേഹം ബദ് റിൽ പങ്കെടുത്ത ആളാണെന്നും അവർ എന്തെങ്കിലും അബദ്ധം ചെയ്തിട്ടുണ്ടെങ്കിൽ പോലും അത് അള്ളാഹു പൊറുത്ത് കൊടുക്കുമെന്ന് അള്ളാഹു ബദ് രീങ്ങളോട് പറഞ്ഞിട്ടുണ്ടെന്നും നിങ്ങൾക്ക് അറിയില്ലേ എന്ന് നബി(സ)ഉമർ(റ)നോട് ചോദിച്ചു കാര്യങ്ങൾ ശരിയാം വിധം അള്ളാഹുവിനും റസൂലിനുമാണല്ലൊ അറിയുക എന്ന് പറഞ്ഞ് കരഞ്ഞ് കൊണ്ട് ഉമർ (റ)പിൻ വാങ്ങി.(റാസി/ഖുർത്വുബി) .അതുമായി ബന്ധപ്പെടുത്തി അള്ളാഹു നൽകിയ ഉപദേശമാണിത്. സന്ദർഭം ഇതാണെങ്കിലും ഇതിലടങ്ങിയ സന്ദേശം എല്ലാ സന്ദർഭങ്ങൾക്കും ബാധകമാണ്

അവരെ മിത്രങ്ങളാക്കി വെക്കുക എന്നാൽ അവർക്ക് മുസ് ലിംകളുടെ രഹസ്യങ്ങൾ വെളിപ്പെടുത്തിക്കൊടുക്കുക എന്നതാണ് പ്രധാനമായും ഉദ്ദേശിക്കുന്നത്

അവർക്കുള്ള കുറ്റം സത്യം നിഷേധിച്ചു എന്നതും മുസ്ലിംകളെ പുറത്താക്കാൻ ശ്രമിച്ചു എന്നതുമാണ്

ഈ സൂക്തത്തിന്റെ ആദ്യത്തിൽ സത്യവിശ്വാസികളേ എന്ന് വിളിച്ചതിൽ സന്തോഷം കൊണ്ട്(ഈ തെറ്റ് ചെയ്ത എന്നെ അള്ളാഹു ഈമാൻ നഷ്ടപ്പെട്ടവൻ എന്ന് പറഞ്ഞില്ല.മറിച്ച് ഞാനും വിശ്വാസി തന്നെ എന്ന് അള്ളാഹു സ്ഥിരീകരിച്ചല്ലൊ എന്ന് ചിന്ത്ച്ച്) ഹാഥിബ്(റ) ബോധം കെട്ട് പോയി എന്ന് ഇമാം ഖുർത്വുബി(റ)എഴുതുന്നു

إِن يَثْقَفُوكُمْ يَكُونُوا لَكُمْ أَعْدَاء وَيَبْسُطُوا إِلَيْكُمْ أَيْدِيَهُمْ وَأَلْسِنَتَهُم بِالسُّوءِ وَوَدُّوا لَوْ تَكْفُرُون 2

നിങ്ങളെ അവർക്ക് പിടികിട്ടിയാൽ അവർ നിങ്ങളുടെ ശത്രുക്കളായിത്തീരുകയും തിന്മയുമായി നിങ്ങൾക്കുനേരെ അവർ തങ്ങളുടെ കൈകളും നാവുകളും നീട്ടുകയും ചെയ്യും നിങ്ങൾ സത്യനിഷേധികളായെങ്കിൽ(കൊള്ളാമായിരുന്നു)എന്നവർ ആഗ്രഹിക്കുകയും ചെയ്യുന്നു

അവരോട് സ്നേഹം കാണിച്ചാലും അവർക്ക് നിങ്ങളെ സൌകര്യത്തിൽ കിട്ടിയാൽ അവർ എന്ത് ചെയ്യുമെന്ന് ഉണർത്തിയിരിക്കുകയാണ്

അവരുടെ കൈകൾ നീട്ടുമെന്നാൽ നിങ്ങളെ അക്രമിക്കുകയും കൊല്ലുകയും ചെയ്യുമെന്നും നാവു നീട്ടുമെന്നാൽ നിങ്ങളെ ചീത്ത പറയുമെന്നും അർത്ഥം.നിങ്ങൾ നബി(സ)യെ നിഷേധിക്കണമെന്നാണവർ ആഗ്രഹിക്കുന്നത് അതിനാൽ നിങ്ങൾ അവരോട് ഗുണകാംക്ഷ കാണിച്ചിട്ട് കാര്യമില്ലകാരണം അവർക്ക് തിരിച്ച് ഗുണാകാംക്ഷ ഒരിക്കലുമുണ്ടാവില്ലെന്നും സാരം

لَن تَنفَعَكُمْ أَرْحَامُكُمْ وَلَا أَوْلَادُكُمْ يَوْمَ الْقِيَامَةِ يَفْصِلُ بَيْنَكُمْ وَاللَّهُ بِمَا تَعْمَلُونَ بَصِيرٌ 3

നിങ്ങളുടെ രക്തബന്ധങ്ങളോ സന്താനങ്ങളോ ഖിയാമ:നാളിൽ നിങ്ങൾക്ക് ഉപകരിക്കയില്ല തന്നെ (അന്ന്)അവൻ നിങ്ങൾക്കിടയിൽ വിധികൽ‌പ്പിക്കും നിങ്ങൾ പ്രവർത്തിക്കുന്നതിനെ പറ്റി അള്ളാഹു കണ്ടറിയുന്നവനാകുന്നു

കുടുംബത്തോടുള്ള സ്നേഹം കൊണ്ടാണല്ലോ ഹാഥിബ്(റ)മക്കയിലേക്ക് കത്തയച്ചത് .നബി(സ)ക്കെതിരിൽ ആ സ്നേഹം നമുക്ക് പരലോകത്ത് ഉപകരിക്കില്ലെന്നും പ്രത്യുത നമ്മുടെ പരലോകനഷ്ടത്തിനു കാരണമാവുകയും ചെയ്യുമെന്ന് സാരം

قَدْ كَانَتْ لَكُمْ أُسْوَةٌ حَسَنَةٌ فِي إِبْرَاهِيمَ وَالَّذِينَ مَعَهُ إِذْ قَالُوا لِقَوْمِهِمْ إِنَّا بُرَاء مِنكُمْ وَمِمَّا تَعْبُدُونَ مِن دُونِ اللَّهِ كَفَرْنَا بِكُمْ وَبَدَا بَيْنَنَا وَبَيْنَكُمُ الْعَدَاوَةُ وَالْبَغْضَاء أَبَدًا حَتَّى تُؤْمِنُوا بِاللَّهِ وَحْدَهُ إِلَّا قَوْلَ إِبْرَاهِيمَ لِأَبِيهِ لَأَسْتَغْفِرَنَّ لَكَ وَمَا أَمْلِكُ لَكَ مِنَ اللَّهِ مِن شَيْءٍ رَّبَّنَا عَلَيْكَ تَوَكَّلْنَا وَإِلَيْكَ أَنَبْنَا وَإِلَيْكَ الْمَصِيرُ 4

ഇബ്_റാഹീമി(അ)ലും അവരോടൊന്നിച്ചുള്ളവരിലും നിങ്ങൾക്ക് മാത്ര്‌കയുണ്ടായിട്ടുണ്ട്.അവർ തങ്ങളുടെ ജനതയോട് പറഞ്ഞ സന്ദർഭം.നിശ്ചയമായും ഞങ്ങൾ നിങ്ങളിൽ നിന്നും അള്ളാഹുവെക്കൂടാതെ നിങ്ങൾ ആരാധിക്കുന്നവയിൽ നിന്നും ഒഴിവായവരാകുന്നു അള്ളാഹു ഒരുവൻ എന്ന നിലക്ക് നിങ്ങൾ അവനിൽ വിശ്വസിക്കുന്നത് വരെ എക്കാലത്തും ഞങ്ങൾ നിങ്ങളെ നിഷേധിക്കുകയും ഞങ്ങൾക്കും നിങ്ങൾക്കുമിടയിൽ ശത്രുതയും അമർഷവും വെളിപ്പെടുകയും ചെയ്തിരിക്കുന്നു പക്ഷെ ഇബ് റാഹീം(അ) തന്റെ പ്രിത്ര്‌വ്യനോട് ഞാൻ താങ്കൾക്ക് വേണ്ടി (അള്ളാഹുവോട്)പാപമോചനം തേടുകതന്നെ ചെയ്യും.അള്ളാഹുവിൽ നിന്ന് താങ്കൾക്ക് യാതൊന്നും തന്നെ ഞാൻ അധീനമാക്കുന്നില്ല എന്ന് പറഞ്ഞതല്ലാതെ (ഇതിൽ നിങ്ങൾക്ക് മാത്ര്‌കയില്ല)ഞങ്ങളുടെ രക്ഷിതാവേ നിന്റെ മേൽ ഞങ്ങൾ ഭരമേൽ‌പ്പിച്ചു നിന്റെ അടുക്കലേക്ക് തന്നെ ഞങ്ങൾ മടങ്ങിയിരിക്കുന്നു നിന്റെ അടുക്കലേക്ക് തന്നെയാണ് തിരിച്ചെത്തലും (എന്നും അവർ പറഞ്ഞിരുന്നു)

പരിശുദ്ധ ദീനിന്റെയും നിങ്ങളുടെയും ശത്രുക്കളോട് യാതൊരു ബന്ധവും പാടില്ലെന്നതിനു ഇബ് റാഹീം(അ)യുടെയും അനുയായികളുടെയും ജീവിതത്തിൽ നമുക്ക് മാത്ര്‌കയുണ്ടെന്നാണ് അള്ളാഹു പറയുന്നത് നിങ്ങളും നിങ്ങളുടെ ആരാധ്യ വസ്തുക്കളുമായി ഞങ്ങൾക്ക് യാതൊരു ബന്ധവുമില്ലെന്നും നിങ്ങൾ അള്ളാഹുവിന്റെ ഏകത്വം വിശ്വസിക്കുന്നത് വരെ നാം തമ്മിൽ പ്രത്യക്ഷ ശത്രുക്കളാണെന്നും തങ്ങളുടെ ജനതയോട് അവർ ധൈര്യസമേതം തുറന്ന് പറഞ്ഞു എന്നാൽ ഇബ് റാഹീം(അ)തന്റെ പിത്ര്‌വനുവേണ്ടി നടത്തിയ പാപമോചന പ്രാർത്ഥന മാത്ര്‌കയാക്കാവതല്ല.ആ പ്രാർത്ഥനയുടെ കാരണം സൂറത്തുതൌബയിൽ വ്യക്തമാക്കിയിട്ടുണ്ട് അഥവാ ഇബ് റാഹീം (അ)തനിക്ക് വേണ്ടി പാപമോചനം തേടുമെന്ന് വാഗ്ദാനം ചെയ്തതിന്റെ പേരിലായിരുന്നു ആ പ്രാർത്ഥനയെന്നും എന്നാൽ ശിർക്കോട് കൂടി താൻ മരണപ്പെട്ടപ്പോൾ അള്ളാഹുവോടുള്ള വിരോധത്തിൽ തന്നെയാണ് അയാൾ നിലകൊണ്ടതെന്നും ബോദ്ധ്യമായി പിന്നീട് ഇബ് റാഹീം(അ) അയാൾക്ക് വേണ്ടി പൊറുക്കലിനെ തേടിയിട്ടുമില്ല.അതിനാൽ മുശ് രിക്കിനു വേണ്ടി പാപമോചനം തേടാൻ അതിൽ മാത്ര്‌കയില്ല എന്ന് അള്ളാഹു ഉണർത്തിയിരിക്കുകയാണ് ശിർക്കിന്റെയും കുഫ് റിന്റെയും ആളാണെന്ന് വ്യക്തമായ ആൾക്ക് വേണ്ടി പാപമോചനം തേടാവതല്ലെന്ന് ഖുർ ആൻ വ്യക്തമാക്കിയിട്ടുണ്ട്

رَبَّنَا لَا تَجْعَلْنَا فِتْنَةً لِّلَّذِينَ كَفَرُوا وَاغْفِرْ لَنَا رَبَّنَا إِنَّكَ أَنتَ الْعَزِيزُ الْحَكِيمُ 5

ഞങ്ങളുടെ രക്ഷിതാവേ സത്യനിഷേധികൾക്ക് ഞങ്ങളെ നീ ഒരു പരീക്ഷണപാത്രമാക്കരുതേ.ഞങ്ങൾക്ക് നീ പൊറുത്ത് തരികയും ചെയ്യേണമേ!ഞങ്ങളുടെ രക്ഷിതാവേ നിശ്ചയമായും നീ തന്നെയാണ് പ്രതാപശാലിയും അഗാധജ്ഞനും.

സത്യനിഷേധികൾക്ക് ഞങ്ങളെ നീ ഒരു പരീക്ഷണപാത്രമാക്കരുതേ. എന്ന് പറഞ്ഞതിന്റെ താല്പര്യം ഞങ്ങൾക്കെതിരിൽ അവർക്ക് നീ വിജയം നൽകരുതെന്നാണ് കാരണം അവരുമായുള്ള യുദ്ധത്തിലും മറ്റും അവർ വിജയിച്ചാൽ കാര്യം ഗുരുതരമാകും.അവർ സത്യത്തിലായത് കൊണ്ടാണ് അവർക്ക് വിജയമുണ്ടായതെന്ന് അവർ തെറ്റിദ്ധരിക്കാനും അങ്ങനെ അവർ പ്രചരിപ്പിക്കാനും അത് കാരണമാകും ബലഹീനരായ വിശ്വാസികൾക്ക് അത് സ്വീകാര്യമായി തോന്നുകയും അവർക്ക് മതഭ്ര്‌ഷ്ടിനു അത് കാരണമാകുകയും ചെയ്യും അതിനിട വരുത്തല്ലേ എന്നാണവരുടെ പ്രാർത്ഥന ഈ പ്രാർത്ഥന ഇബ് റാഹീം(അ)മും അനുയായികളും നടത്തിയതാണെന്നും നബി(സ)യുടെ സഹാബത്ത് നടത്തിയതാണെന്നും അഭിപ്രായമുണ്ട്

لَقَدْ كَانَ لَكُمْ فِيهِمْ أُسْوَةٌ حَسَنَةٌ لِمَن كَانَ يَرْجُو اللَّهَ وَالْيَوْمَ الْآخِرَ وَمَن يَتَوَلَّ فَإِنَّ اللَّهَ هُوَ الْغَنِيُّ الْحَمِيدُ 6

നിശ്ചയമായും അവരിൽ നിങ്ങൾക്ക് നല്ല മാത്ര്‌കയുണ്ട് അതായത് അള്ളാഹുവിനെയും അന്ത്യനാളിനെയും ഭയപ്പെടുന്നവർക്ക്.വല്ലവരും പിന്തിരിഞ്ഞുകളയുന്ന പക്ഷം അള്ളാഹു തന്നെയാണ് നിരാശ്രയനും സ്തുത്യർഹനും

ഇബ്_റാഹീം നബി(അ)ലും അനുയായികളിലും നിങ്ങൾക്ക് മാത്ര്‌കയുണ്ടെന്ന് ആവർത്തിച്ചു കൊണ്ട് അതിനെ ബലപ്പെടുത്തുകയാണ് അള്ളാഹു. അള്ളാഹുവിനെ അന്ത്യനാളിനെയും ഭയപ്പെടുന്നവർക്ക് അഥവാ അന്ന് അള്ളാഹു പ്രതിഫലം നൽകുമെന്ന് ആഗ്രഹിക്കുന്നവർക്കേ ആ മാത്ര്‌ക സ്വീകരിക്കാൻ കഴിയുകയുള്ളൂവെന്നും അത് അവഗണിച്ചവരുടെ നിഷേധം കൊണ്ട് അള്ളാഹുവിനു ഒരു ദോഷവും വരാനില്ലെന്നും ഉണർത്തിയിരിക്കുകയാണ്

عَسَى اللَّهُ أَن يَجْعَلَ بَيْنَكُمْ وَبَيْنَ الَّذِينَ عَادَيْتُم مِّنْهُم مَّوَدَّةً وَاللَّهُ قَدِيرٌ وَاللَّهُ غَفُورٌ رَّحِيمٌ 7

നിങ്ങൾക്കും അവരിൽ നിന്ന് നിങ്ങൾ ശത്രുതവെച്ചവർക്കുമിടയിൽ അള്ളാഹു സ്നേഹബന്ധം ഉണ്ടാക്കിയേക്കാം അള്ളാഹു സർവശക്തനാണ് വളരെ പൊറുക്കുന്നവനും പരമ കാരുണികനുമാണ്

മുകളിൽ പറഞ്ഞ ശത്രുക്കളുമായുള്ള സംഘർഷാവസ്ഥ അധികകാലം നീണ്ടു നിൽക്കില്ലെന്ന് അള്ളാഹു സത്യവിശ്വാസികളെ അശ്വസിപ്പിക്കുകയാണിവിടെ .ഉണ്ടാക്കിയേക്കാം എന്ന് ഖുർ ആൻ പറഞ്ഞാൽ അത് ഉറപ്പ് തന്നെയായിരിക്കും വെറും സാദ്ധ്യത മാത്രമല്ലെന്ന് ചുരുക്കം മക്കാ വിജയത്തോടെ അത് സാക്ഷാൽക്കരിക്കപ്പെട്ടു.അബൂസുഫ് യാനുബ്നു ഹർബ് ,സുഹൈലുബ്നു അം റ്‌, തുടങ്ങിയ നേതാക്കളുൾപ്പെടെ ഖുറൈശികൾ ഇസ് ലാം സ്വീകരിച്ചു.ജനങ്ങൾ കൂട്ടം കൂട്ടമായി ഇസ് ലാമിൽ പ്രവേശിച്ചു ശത്രുതയുടെയും അമർഷത്തിന്റെയും സ്ഥാനത്ത് സാഹോദര്യവും സ്നേഹവും കളിയാടി

8 يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَن تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ

മതകാര്യങ്ങളിൽ നിങ്ങളോട് യുദ്ധം ചെയ്യാതിരിക്കുകയും സ്വന്തം വീടുകളിൽ നിന്ന് നിങ്ങളെ പുറത്താക്കാതിരിക്കുകയും ചെയ്തവർക്ക് നിങ്ങൾ നന്മ ചെയ്യുന്നതും അവരോട് നീതിപാലിക്കുന്നതും അള്ളാഹു നിങ്ങളോട് വിരോധിക്കുന്നില്ല നീതിപാലിക്കുന്നവരെ അള്ളാഹു ഇഷ്ടപ്പെടുകതന്നെ ചെയ്യുന്നു

ഇങ്ങോട്ട് അക്രമത്തിനും കൈയേറ്റത്തിനും വരാത്തവരോട് നീതി പുലർത്തരുതെന്നോ അവർക്ക് നന്മ ചെയ്യരുതെന്നോ അള്ളാഹു വിരോധിക്കുന്നില്ല എന്ന് മാത്രമല്ല നീതികാണിക്കുന്നവരെയാണ് അള്ളാഹു സ്നേഹിക്കുക എന്നും അള്ളാഹു ഉണർത്തിയിരിക്കുകയാണ്

ഇവിടെ നന്മ ചെയ്യുന്നത് വിരോധിക്കാത്ത വിഭാഗം ആരാണെന്നതിൽ വിവിധ അഭിപ്രായമുണ്ട്.നബി(സ)യോട് യുദ്ധത്തിനു വരില്ലെന്നും നബി(സ)ക്കെതിരിൽ അവരെ മക്കയിൽ നിന്ന് പുറത്താക്കാൻ ശത്രുക്കളെ സഹായിക്കില്ലെന്നും കരാറ് ചെയ്തിരുന്ന ഖുസാഅ خزاعة ഗോത്രക്കാരെയാണിവിടെ ഉദ്ദേശ്യം എന്നത്രെ ഒരു അഭിപ്രായം. വരൊടുള്ള കരാർ കാലാവധി തീരും വരെ അവർക്ക് ഗുണം ചെയ്യാൻ നബി(സ)കൽ‌പ്പിച്ചു ഇബ്നു അബ്ബാസ്(റ)അടക്കമുള്ളവരുടെ അഭിപ്രായം ഇതാകുന്നു.മക്കയിൽ തന്നെ താമസിച്ച് ഇതു വരെയും ഹിജ് റ പോകാത്ത സത്യവിശ്വാസികളാണുദ്ദേശ്യമെന്നും സ്ത്രീകളും കുട്ടികളുമാണുദ്ദേശ്യമെന്നും അഭിപ്രായമുണ്ട്.അസ്മാ അ്(റ)യുടെ വിഷയത്തിലാണീ സൂക്തം അവതരിച്ചതെന്നും അഭിപ്രായമുണ്ട്.

അസ്മാ ബീവിയുടെ ഉമ്മ ഖാതില:മുസ്ലിമത്താവാതെ അസ്മാബീവിയെ കാണാനായി ധാരാളം സമ്മാനങ്ങളുമായി വന്നെങ്കിലും ഉമ്മയെ കാണാനോ വീട്ടിലേക്ക് പ്രവേശിപ്പിക്കാനോ സമ്മാനങ്ങൾ സ്വീകരിക്കാനോ അസ്മാബീവി വിസമ്മതിച്ചു.അപ്പോൾ അവരെ വീട്ടിൽ കയറ്റാനും സമ്മാനങ്ങൾ സ്വീകരിക്കാനും ഉമ്മയെന്ന നിലക്കുള്ള ആദരവുകൾ നൽകാനും നബി(സ)നിർദ്ദേശിച്ചു.അപ്പോഴാണീ സൂക്തം അവതരിച്ചത് എന്നാണ് അബ്ദുള്ളാഹിബ്നുസ്സുബൈർ(റ)ന്റെ പക്ഷം.ഇഷ്ടമില്ലാതെ ബദ്ർ യുദ്ധത്തിൽ ചേരാൻ നിർബന്ധിക്കപ്പെട്ടവരെക്കുറിച്ചാണെന്നും അഭിപ്രായമുണ്ട് .എന്തായാലും ഇങ്ങോട്ട് ഉപദ്രവത്തിനു വരാത്തവരെ അങ്ങോട്ട് പോയി ഉപദ്രവിക്കുന്നത് ശരിയല്ലെന്ന ഇസ്ലാമിന്റെ വിശാലമായ കാഴ്ചപ്പാട് എത്ര പരിപക്വം!

إِنَّمَا يَنْهَاكُمُ اللَّهُ عَنِ الَّذِينَ قَاتَلُوكُمْ فِي الدِّينِ وَأَخْرَجُوكُم مِّن دِيَارِكُمْ وَظَاهَرُوا عَلَى إِخْرَاجِكُمْ أَن تَوَلَّوْهُمْ وَمَن يَتَوَلَّهُمْ فَأُوْلَئِكَ هُمُ الظَّالِمُونَ 9

മതവിഷയങ്ങളിൽ നിങ്ങളോട് യുദ്ധം ചെയ്യുകയും സ്വന്തം വീടുകളിൽ നിന്ന് നിങ്ങളെ പുറത്താക്കുകയും നിങ്ങളെ പുറത്താക്കുവാൻ സഹായം നൽകുകയും ചെയ്തവരോട് മൈത്രീബന്ധം സ്ഥാപിക്കുന്നത് മാത്രമേ അള്ളാഹു നിങ്ങളോട് നിരോധിക്കുന്നുള്ളൂ ആരെങ്കിലും അവരോട് മൈത്രീബന്ധം സ്ഥാപിക്കുന്നുവെങ്കിൽ അക്കൂട്ടർ തന്നെയാണ് അക്രമികൾ

ഇങ്ങോട്ട് അക്രമത്തിനു മുതിരുന്നവരോട് മൈത്രീബന്ധം പുലർത്തരുതെന്നും അങ്ങനെ ചെയ്യുന്നത് കുറ്റകരവുമാണെന്നത്രെ അള്ളാഹു ഉണർത്തുന്നത്

അള്ളാഹുവിനു വേണ്ടി സ്നേഹിക്കുന്നതും അള്ളാഹുവിനു വേണ്ടി ദേഷ്യപ്പെടുന്നതുമാണ് ഏറ്റവും ശ്രേഷ്ടമായ കർമ്മം എന്ന നബി വചനം വളരെ പ്രസ്ക്തം തന്നെ

അള്ളാഹു അവന്റെ ഇഷ്ടജനങ്ങളിൽ നമ്മെയും ഉൾപ്പെടുത്തട്ടെ ആമീൻ ഈ അദ്ധ്യായത്തിന്റെ ബാക്കി സൂക്തങ്ങളുടെ വിവരണം അടുത്ത പോസ്റ്റില്‍ തുടരും ഇൻശാ അള്ളാഹ്

അദ്ധ്യായം 59 സൂറത്തുൽ ഹശ്‌ർ -ഭാഗം-02

2011-11-05T13:11:00.001+04:00

سورة الحشر

മദീനയിൽ അവതരിച്ചു :സൂക്തങ്ങൾ 24

بسم الله الرحمن الرحيم

പരമകാരുണികനും മഹാകാരുണ്യവാനുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

ഭാഗം-01 സൂക്തം 1 മുതൽ 10 വരെ ഇവിടെ വായിക്കുക

أَلَمْ تَر إِلَى الَّذِينَ نَافَقُوا يَقُولُونَ لِإِخْوَانِهِمُ الَّذِينَ كَفَرُوا مِنْ أَهْلِ الْكِتَابِ لَئِنْ أُخْرِجْتُمْ لَنَخْرُجَنَّ مَعَكُمْ وَلَا نُطِيعُ فِيكُمْ أَحَدًا أَبَدًا وَإِن قُوتِلْتُمْ لَنَنصُرَنَّكُمْ وَاللَّهُ يَشْهَدُ إِنَّهُمْ لَكَاذِبُونَ (11

(നബിയേ!)കാപട്യം കാണിച്ചവരെ തങ്ങൾ കണ്ടില്ലേ? വേദക്കാരിൽ നിന്നുള്ള സത്യനിഷേധികളായ തങ്ങളുടെ സഹോദരന്മാരോട് അവർ പറയുന്നു നിങ്ങൾ(നാട്ടിൽ നിന്ന്)പുറത്താക്ക പ്പെട്ടാൽ ഞങ്ങൾ നിങ്ങളോടൊന്നിച്ച് പുറപ്പെടുക തന്നെ ചെയ്യും നിങ്ങളുടെ കാര്യത്തിൽ ഒരാളെയും ഒരിക്കലും ഞങ്ങൾ അനുസരിക്കുന്നതല്ല.നിങ്ങളോട് യുദ്ധം ചെയ്യപ്പെട്ടാൽ ഞങ്ങൾ നിങ്ങളെ സഹായിക്കുക തന്നെ ചെയ്യും നിശ്ചയമായും അവർ കള്ളം പറയുന്നവരാണെന്ന് അള്ളാഹു സാക്ഷ്യം വഹിക്കുന്നു

മുഹാജിറുകൾ.അൻസാറുകൾ അവരെ പിന്തുടർന്ന പിൻഗാമികൾ എന്നിവരെക്കുറിച്ചാണല്ലോ കഴിഞ്ഞ സൂക്തങ്ങളിൽ പറഞ്ഞത്.ഇവരുടെ എതിരാളികളായ മദീനയിലെ മുനാഫിഖുകളെക്കുറിച്ചാണിവിടെ പറയുന്നത് അവരുടെ നേതാവ് അബ്ദുള്ളാഹിബ്നു ഇബയ്യ്, അബ്ദുള്ളാഹിബ്നു നബ്തൽ, രിഫാഅത്തുബ്നു സൈദ് തുടങ്ങിയവരാണിവിടെ ഉദ്ദേശ്യം അവർ (കുടുംബപരമായി) അൻസാരികളിൽപെട്ടവരായിരുന്നുവെങ്കിലും അവർ കാപട്യം കാണിച്ചു. കപടന്മാർ ബനൂനളീർ ഗോത്രക്കാർക്ക് നൽകിയ വാഗ്ദാനമാണിവിടെ കാണുന്നത് സത്യ നിഷേധത്തിലും നബി(സ)യെ വെറുക്കുന്നതിലും നബി(സ)ക്കെതിരിൽ പരസ്പരം സഹകരിക്കുന്നതിലും നബി(സ)യോട് ശാത്രവം പുലർത്തുന്നതിലും അവർക്ക് ഒരേ കാഴ്ച്ചപ്പാടായിരുന്നതിനാലാണ് കപടന്മാർ ജൂതന്മാരുടെ സഹോദരങ്ങളാണെന്ന് പറഞ്ഞത് .നിങ്ങളെ മദീനയിൽ നിന്ന് പുറത്താക്കപ്പെട്ടാൽ ഞങ്ങളും നിങ്ങൾക്കൊപ്പം മദീന വിടുമെന്നും നിങ്ങളെ ചതിക്കാനായി നിങ്ങൾക്കെതിരിൽ ആരെയും ഞങ്ങൾ ഒരു കാലത്തും അനുസരിക്കില്ലെന്നും നിങ്ങൾക്കെതിരിൽ യുദ്ധമുണ്ടായാൽ നിങ്ങളെ സഹായിക്കാൻ ഞങ്ങൾ പ്രതിജ്ഞാബദ്ധരാണെന്നും ആയിരുന്നു അവർ ജൂതർക്ക് നൽകിയ വാഗ്ദാനം എന്നാൽ ആ വാഗ്ദാനം തനി വ്യാജമാണെന്ന് അള്ളാഹു പറഞ്ഞിരിക്കുകയാണ് സംഭവിച്ചതും അങ്ങനെ തന്നെ (ആ ചരിത്രം കഴിഞ്ഞ ഭാഗത്ത് നാം പറഞ്ഞത് ഓർക്കുമല്ലോ)

لَئِنْ أُخْرِجُوا لَا يَخْرُجُونَ مَعَهُمْ وَلَئِن قُوتِلُوا لَا يَنصُرُونَهُمْ وَلَئِن نَّصَرُوهُمْ لَيُوَلُّنَّ الْأَدْبَارَ ثُمَّ لَا يُنصَرُونَ(12

അവർ പുറത്താക്കപ്പെട്ടാൽ ഇവർ അവരോടൊപ്പം പുറപ്പെടുകയില്ല അവരോട് യുദ്ധം ചെയ്യപ്പെട്ടാൽ ഇവർ അവരെ സഹായിക്കുകയുമില്ല അവരെ സഹായിച്ചാൽ തന്നെയും ഇവർ പിന്തിരിഞ്ഞോടുന്നതാണ് തീർച്ച.പിന്നീട് അവർക്ക് ഒരു സഹായവും ലഭിക്കുന്നതല്ല

അവർ ജൂതർക്ക് നൽകിയ വാഗ്ദാനങ്ങൾ കള്ളമാണെന്ന പൊതു പ്രസ്താവനയുടെ വിശദീകരണമാണീ സൂക്തം..അള്ളാഹു ത്രികാല ജ്ഞാനിയാണ് അഥവാ ഭൂതകാലത്ത് എന്ത് നടന്നു നടന്നില്ല വർത്തമാന കാലത്ത് എന്ത് നടക്കുന്നു നടക്കുന്നില്ല ഭാവിയിൽ എന്തൊക്കെ നടക്കും നടക്കില്ല എന്ന് വിശദമായി അവൻ അറിയുന്നവനാണ്.അതിനാൽ അള്ളാഹു അറിയിക്കുകയാണ്. ജൂതന്മാരെ പുറത്താക്കപ്പെട്ടാൽ കപടന്മാർ ഒപ്പമുണ്ടാവില്ല.യുദ്ധം വന്നാൽ സഹായിക്കാനും അവരെകിട്ടില്ല ജൂതന്മാർ പുറത്താക്കപ്പെട്ടപ്പോൾ ഒരു കപടൻ പോലും ഒപ്പം പുറപ്പെട്ടില്ല യുദ്ധത്തിൽ സഹായിച്ചുമില്ല ഇനി സഹായിക്കാനെന്ന് പറഞ്ഞ് അവർ വന്നാലും യുദ്ധമുഖത്ത് പിടിച്ച് നിൽക്കാനാവാതെ ജൂതന്മാരെ മുസ്ലിംകളുടെ കൈകളിലേക്കിട്ട് കൊടുത്ത് അവർ പിന്തിരിഞ്ഞോടുമായിരുന്നു സൂക്തത്തിന്റെ അവസാനം അവർക്ക് സഹായം ലഭിക്കില്ലെന്ന് പറഞ്ഞത് കപടന്മാർക്ക് സഹായം ലഭിക്കില്ലെന്നും അവരുടെ കാപട്യം വെളിച്ചത്താവുകയും അവർ നശിപ്പിക്കപ്പെടുക തന്നെ ചെയ്യും ഈ ഞാണിന്മേൽ കളി അവരെ രക്ഷിക്കില്ലെന്ന് സാരം.ജൂതന്മാർ തോറ്റ് പോകുമെന്നും കപടന്മാരുടെ സഹായം അവരെ രക്ഷിക്കില്ലെന്നും ഇവിടെ വ്യാഖ്യാനമുണ്ട്

لَأَنتُمْ أَشَدُّ رَهْبَةً فِي صُدُورِهِم مِّنَ اللَّهِ ذَلِكَ بِأَنَّهُمْ قَوْمٌ لَّا يَفْقَهُونَ(13)

(സത്യവിശ്വാസികളേ)നിശ്ചയമായും അവരുടെ ഹൃദയങ്ങളിൽ അള്ളാഹുവിനെക്കുറിച്ചുള്ളതിനേക്കാൾ കഠിന ഭയം നിങ്ങളെക്കുറിച്ചാണ് അവർ കാര്യം ഗ്രഹിക്കാത്ത ഒരു ജനത തന്നെയാണെന്നുള്ളതു കൊണ്ടാണത്

കപടന്മാർ ബുദ്ധിഹീനരും ചിന്താശൂന്യരുമായതിനാൽ അള്ളാഹുവിനെക്കുറിച്ച് തങ്ങൾക്ക് ഭയമുണ്ടെന്ന് പുറത്ത് കാണിക്കുന്നതിനേക്കാൾ അധികഭയം സത്യവിശ്വാസികളെ സംബന്ധിച്ച് അവരുടെ മനസ്സിലുണ്ട് (യഥാർത്ഥത്തിൽ അള്ളഹുവിന്റെ മഹത്വം മനസിലാക്കി അവനെയായിരുന്നു അവർ ഭയപ്പെടേണ്ടിയിരുന്നത്) അത് കൊണ്ടാണല്ലോ വിശ്വാസം മനസ്സിലില്ലാതിരുന്നിട്ടും പ്രത്യക്ഷത്തിൽ മുസ്ലിംകളായി നടക്കുന്നത് സത്യവിശ്വാസികളുടെ വിശ്വാസദ്ര്‌ഢതയും ധീരതയും അവർക്ക് നന്നായി അറിയാം അതിനാൽ സത്യവിശ്വാസികളോട് ഒരു സമരത്തിനിറങ്ങാൻ അവർ ധൈര്യപ്പെടുകയില്ല

لَا يُقَاتِلُونَكُمْ جَمِيعًا إِلَّا فِي قُرًى مُّحَصَّنَةٍ أَوْ مِن وَرَاء جُدُرٍ بَأْسُهُمْ بَيْنَهُمْ شَدِيدٌ تَحْسَبُهُمْ جَمِيعًا وَقُلُوبُهُمْ شَتَّى ذَلِكَ بِأَنَّهُمْ قَوْمٌ لَّا يَعْقِلُونَ(14

കോട്ട കെട്ടി ഭദ്രമാക്കപ്പെട്ട നാടുകളിൽ വെച്ചോ വല്ല മതിലുകളുടെയും പിന്നിൽ നിന്നോ അല്ലാതെ അവർ സംഘടിച്ചുകൊണ്ട് നിങ്ങളോട് യുദ്ധം ചെയ്യുകയില്ല അവർക്കിടയിൽ അവരുടെ സമര ശക്തി മികച്ചതാണ് അവർ സംഘടിച്ചവരാണെന്ന് തങ്ങൾ വിചാരിക്കുന്നു അവരുടെ ഹൃദയങ്ങളാവട്ടെ വിഭിന്നങ്ങളാണ് അത് അവർ ചിന്തിക്കാത്ത ഒരു ജനതയാണെന്നത് കൊണ്ടാകുന്നു

കപടന്മാർ തനി ഭീരുക്കളാണെന്നും ബഹുദൈവ വിശ്വാസികളും ജൂതന്മാരുമൊക്കെയായി അവർ പല ഗൂഢാലോചനയും വെറുതെ നടത്തുകയാണെന്നും നേരത്തേ പറഞ്ഞതിൽ നിന്ന് മനസ്സിലായല്ലൊ .എന്നാൽ നിവ്ര്‌ത്തിയില്ലാതെ അങ്ങനെ ഒരു യുദ്ധത്തിനു അവർ പുറപ്പെടേണ്ടി വന്നാൽ തന്നെ സുശക്തമായ വല്ല കോട്ടക്കുള്ളിൽ വെച്ചോ വല്ല മതിലുകളുടെയും പിന്നിൽ നിന്ന് ഒളിപ്പോരു നടത്തുകയോ അല്ലാതെ അരങ്ങത്ത് വന്ന് യുദ്ധം ചെയ്യാൻ അവർ ധൈര്യപ്പെടുകയില്ല കാരണം അവരുടെ മനസ്സിൽ അള്ളാഹു മുസ് ലിംകളെ സംബന്ധിച്ച് ശക്തമായ ഭയം ഇട്ട് കൊടുത്തിരിക്കുന്നു അവർ തമ്മതമ്മിൽ പോരാട്ടത്തിനു കേമന്മാരാണെങ്കിലും അള്ളാഹുവിന്റെ സേനക്കുമുന്നിൽ അവർ ചൂളിപ്പോകും അവർക്കിടയിൽ അവരുടെ സമര ശക്തി മികച്ചതാണെന്നതിനു അവർ പരസ്പരം ശത്രുക്കളാണെന്നാണ് ഇബ്നു അബ്ബാസ്(റ) പറഞ്ഞ വ്യാഖ്യാനം അവരുടെ മനസ്സ് വിഭിന്നമാണെന്ന വാക്യം അതിന്റെ തെളിവായി മഹാൻ ചൂണ്ടിക്കാണിക്കുന്നുണ്ട് അവർ കാഴ്ചയിൽ ഒറ്റക്കെട്ടാണെങ്കിലും മനസ്സ് ഭിന്നിപ്പിലാണ്. ഓരോരുത്തർക്കും ഓരോ അഭിപ്രായമാണെന്ന് സാരം(റാസി)

അവർ ചിന്തിക്കാത്ത ജനതയായത് കൊണ്ടാണിത് എന്നതിനു അവർക്ക് യഥാർത്ഥത്തിൽ എന്തിലാണ് വിജയം എന്ന് മനസ്സിലാക്കാത്തവരായത് കൊണ്ട് എന്നും അവരുടെ ശക്തി ക്ഷയിച്ചത് അവരുടെ മനസിന്റെ ഭിന്നിപ്പ് കാരണത്താലാണെന്ന് അവർക്ക് ചിന്തിക്കാൻ കഴിയുന്നില്ല എന്നും വ്യാഖ്യാനമുണ്ട്

كَمَثَلِ الَّذِينَ مِن قَبْلِهِمْ قَرِيبًا ذَاقُوا وَبَالَ أَمْرِهِمْ وَلَهُمْ عَذَابٌ أَلِيمٌ(15

ഇവരുടെ സ്ഥിതി) അടുത്ത കാലത്ത് ഇവരുടെ മുമ്പുണ്ടായിരുന്നവരുടെ സ്ഥിതി പോലെ തന്നെയാണ് അവർ തങ്ങളുടെ കാര്യത്തിന്റെ ദുഷ്ഫലം (ഇഹലോകത്ത്)അനുഭവിച്ചു അവർക്ക്(പരലോകത്ത്)വേദനാജനകമായ ശിക്ഷയുമുണ്ട്

ബനൂനളീർ സംഭവത്തിനു അല്പം മുമ്പ് അവരെപ്പോലെ അക്രമം ചെയ്തവരുടെ മേൽ അള്ളാഹു നടപടി എടുത്തതാണിവിടെ ചൂണ്ടിക്കാണിച്ചിരിക്കുന്നത് മക്കാമുശ്രിക്കുകളെ ബദ് റിൽ വെച്ച് അള്ളാഹു പിടികൂടിയതാണിവിടെ ഉദ്ദേശ്യം എന്നത്രെ വ്യാഖ്യാതാക്കൾ വിവരിക്കുന്നത് ബനൂനളീറിന്റെ ശിക്ഷാ നടപടിക്കുമുമ്പ്.ബനൂ ഖൈനുഖാ‍ അ് എന്ന ജൂത ഗോത്രത്തെ കരാർ ലംഘനവും ചതിയും കാണിച്ചപ്പോൾ അവരെ നാട്കടത്തിയിരുന്നു. അതാണിവിടെ ഉദ്ദേശ്യമെന്നും അഭിപ്രായമുണ്ട്

അവർ ഇഹലോകത്ത് കൊല്ലപ്പെടലിന്റെയും നാടു കടത്തലിന്റെയും ദുഷ്ഫലം അനുഭവിച്ചു. പരലോകത്ത് ഗുരുതരമായ ശിക്ഷയും അവരെ കാത്തിരിക്കുന്നു

كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِّنكَ إِنِّي أَخَافُ اللَّهَ رَبَّ الْعَالَمِينَ(16

(ആ കപട വിശ്വാസികളുടെ ഉപമ)പിശാചിന്റെ മാതിരിയാണ് നീ സത്യം നിഷേധിക്കുക എന്ന് അവൻ മനുഷ്യനോട് പറഞ്ഞ സന്ദർഭം അങ്ങനെ മനുഷ്യൻ സത്യം നിഷേധിച്ചപ്പോൾ പിശാച് പറഞ്ഞു നിശ്ചയമായും ഞാൻ നിന്നിൽ നിന്ന് ഒഴിവായവനാണ് (നാം തമ്മിൽ ബന്ധമൊന്നുമില്ല) ലോകരക്ഷിതാവായ അള്ളാഹുവിനെ ഞാൻ ഭയപ്പെടുകതന്നെ ചെയ്യുന്നു

മുനാഫിഖുകളുടെയും അവരുടെ വാക്കുകൾ വിശ്വസിക്കുന്നവരുടെയും ഉദാഹരണമാണിവിടെ പറയുന്നത് പിശാച് മനുഷ്യനു പല ദുർബോധനവും നൽകും .എന്നാൽ അതിന്റെ ദുഷ്ഫലം അവൻ നേരിടുമ്പോൾ അവിടെ പിശാചിനെ കാണുകയില്ല അവസാനം നരകശിക്ഷയിൽ ഇരുവരും അകപ്പെടും ഇത് പോലെയാണ് മുനാഫിഖുകളുടെയും അവരുടെ വാക്ക് വിശ്വസിച്ച ജൂതരുടെയും ഉപമ എന്നാണിവിടെപറയുന്നത് ഇവിടെ പിശാച് അവിശ്വാസത്തിലേക്ക് ക്ഷണിക്കുന്ന എല്ലാ കാര്യവും ഉദ്ദേശ്യമാണെന്നും ബദ്റിൽ സഹായിക്കാമെന്ന് മുശ്രിക്കുകളോട് വാഗ്ദാനം ചെയ്ത പിശാച് മലക്കുകളുടെ സാന്നിദ്ധ്യമറിഞ്ഞപ്പോൾ ഞാൻ നിങ്ങളുമായി ബന്ധമില്ലെന്ന് പറഞ്ഞ് നിർണായക ഘട്ടത്തിൽ അവരെ കൈയൊഴിഞ്ഞ സംഭവമാണുദ്ദേശ്യമെന്നും അഭിപ്രായമുണ്ട്.ഏതായാലും പിശചിന്റെ വാഗ്ദാനം ലംഘിക്കപ്പെട്ടത് പോലെ കപടന്മാർ ജൂതരെ സഹായിക്കാമെന്ന വാഗ്ദാനവും ലംഘിക്കപ്പെട്ടു എന്ന് ചുരുക്കം

فَكَانَ عَاقِبَتَهُمَا أَنَّهُمَا فِي النَّارِ خَالِدَيْنِ فِيهَا وَذَلِكَ جَزَاء الظَّالِمِينَ(17

അങ്ങനെ അവർ ഇരുവരുടെയും പര്യവസാനം ഇരുവരും നരകത്തിലാണ് എന്നതായിത്തീർന്നു അവർ അതിൽ നിരന്തര വാസികളായ നിലയിൽ അതത്രെ അക്രമികളുടെ പ്രതിഫലം

പിശാചും അവൻ വഴിതെറ്റിച്ചവരും നരകത്തിലാവുക എന്നതാണ് ഇതിന്റെ അവസാനം എന്നത് പോലെ ജൂതന്മാരും അവരെ വഴിതെറ്റിക്കാൻ വാഗ്ദാനം നൽകിയ കപടന്മാരും അവസാനം ഒരേ സ്ഥലത്ത് (നരകത്തിൽ)എത്തിപ്പെടുമെന്ന് ചുരുക്കം

يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ(18

സത്യ വിശ്വാസികളേ നിങ്ങൾ അള്ളാഹുവിനെ സൂക്ഷിക്കുക നാളേക്ക് വേണ്ടി താൻ എന്താണ് ഒരുക്കിവെച്ചിട്ടുള്ളത് എന്ന് ഓരോരുത്തരും ചിന്തിക്കട്ടെ നിങ്ങൾ അള്ളാഹുവെ സൂക്ഷിക്കുക നിങ്ങൾ പ്രവർത്തിക്കുന്നതിനെ പറ്റി അള്ളാഹു സൂക്ഷ്മജ്ഞൻ തന്നെയാകുന്നു

കപടന്മാരെയും ജൂതന്മാരെയും പിടികൂടിയ സത്യ നിഷേധം വിവരിച്ച ശേഷം സത്യ വിശ്വാസികൾക്ക് അള്ളാഹു നൽകുന്ന ഉപദേശമാണിവിടെ

അള്ളാഹുവിനെ സൂക്ഷിക്കുക അതായത് അവന്റെ വിധിവിലക്കുകൾ അനുസരിക്കുക വഴി അവനോടുള്ള ഭയ ഭക്തിയോടെ ജീവിക്കുക ഏറ്റവും മർമ്മപ്രധാനമാണ് തഖ്‌വ: എല്ലാ നന്മയുടെയും വിജയത്തിന്റെയും അടിസ്ഥാനമാണ് തഖ്‌വ: നാളേക്ക് വേണ്ടി -അനശ്വരമായ പരലോകത്തിനുവേണ്ടി- എന്തൊക്കെയാണ് കാലേക്കൂട്ടി തയ്യാറാക്കിയത് എന്ന് ആത്മ പരിശോധന നടത്തുക .ഇതുമൂലം സ്വന്തം കുറ്റങ്ങളും കുറവുകളും കണ്ട് പിടിക്കാനും അത് പരിഹരിക്കാനും കഴിയും.വീണ്ടും തഖ് വ ചെയ്യണമെന്ന് പറഞ്ഞത് ആദ്യം പറഞ്ഞതിനെ ശക്തിപ്പെടുത്താൻ വേണ്ടിയാണെന്നും ആദ്യം അള്ളാഹുവെ സൂക്ഷിക്കണമെന്ന് പറഞ്ഞത് നിർബന്ധങ്ങൾ നിർവഹിക്കണമെന്ന അർത്ഥത്തിലും രണ്ടാമത് പറഞ്ഞ അള്ളാഹുവെ സൂക്ഷിക്കണമെന്നത് കുറ്റങ്ങൾ ഉപേക്ഷിക്കണമെന്ന അർത്ഥത്തിലുമാണെന്നും അഭിപ്രായമുണ്ട്(റാസി)

وَلَا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ أُوْلَئِكَ هُمُ الْفَاسِقُونَ (19

അള്ളാഹുവിനെ മറന്ന് കളയുകയും തന്നിമിത്തം അവർക്ക് തങ്ങളെത്തന്നെ അവൻ വിസ്മരിപ്പിച്ച് കളയുകയും ചെയ്തിട്ടുള്ളവരെ പോലെ നിങ്ങൾ ആവരുത് അങ്ങനെയുള്ളവർ തന്നെയാണ് ധിക്കാരികൾ

അള്ളാഹുവിനെ തീരെ ഓർക്കാതെ തനി താന്തോന്നികളായിത്തീരുകയും തന്നിമിത്തം സ്വന്തം രക്ഷാമാർഗത്തെക്കുറിച്ച് ചിന്തിക്കാൻ കഴിയാതെ പോവുകയും ചെയ്തവരുടെ സമൂഹത്തിൽ പെടാതിരിക്കുക അതായത് അത്തരക്കാരെ അനുകരിക്കാതെ അവരോട് സാദ്ര്‌ശ്യപ്പെടാതെ സൂക്ഷിക്കുക അള്ളാഹുവിന്റെ ഈ ഉപദേശം അനുസരിച്ച് ജീവിക്കുന്നവർ ശരിയായ സത്യവിശ്വാസികളും പരലോകത്ത് സ്വർഗാവകാശികളുമാണ്

لَا يَسْتَوِي أَصْحَابُ النَّارِ وَأَصْحَابُ الْجَنَّةِ أَصْحَابُ الْجَنَّةِ هُمُ الْفَائِزُونَ(20

നരകക്കാരും സ്വർഗക്കാരും സമമാവുകയില്ല സ്വർഗക്കാർ തന്നെയാണ് വിജയികൾ

ഇവിടെ എങ്ങനെ ജീവിച്ചാലും മരണത്തോടെ എല്ലാം തീർന്നു എന്ന കണക്ക് കൂട്ടലിനെ തകർക്കുയാണിവിടെ .സ്വർഗക്കാർ വിജയം വരിക്കുകയും നരകക്കാർ നിത്യ ദു:ഖത്തിൽ അകപ്പെടുകയും ചെയ്യും

لَوْ أَنزَلْنَا هَذَا الْقُرْآنَ عَلَى جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ وَتِلْكَ الْأَمْثَالُ نَضْرِبُهَا لِلنَّاسِ لَعَلَّهُمْ يَتَفَكَّرُونَ(21

ഈ ഖുർ ആനിനെ നാം ഒരു പർവതത്തിന്മേൽ അവതരിപ്പിച്ചിരുന്നുവെങ്കിൽ അത് വിനയം കാണിക്കുന്നതായും അള്ളാഹുവിനെ ഭയപ്പെട്ടതിനാൽ പൊട്ടിപ്പിളരുന്നതായും അതിനെ തങ്ങൾ കാണുമായിരുന്നു ആ ഉപമകൾ നാം മനുഷ്യർക്ക് വേണ്ടി വിവരിക്കുന്നു അവർ ചിന്തിക്കുവാൻ വേണ്ടി

വിശുദ്ധ ഖുർആനിന്റെ മഹത്വവും ഉന്നത നിലപാടും ഒരു ഉപമാ രൂപത്തിൽ ചൂണ്ടിക്കാണിച്ച് കൊണ്ട് മനുഷ്യന്റെ ബുദ്ധിശൂന്യതയും ബോധമില്ലായ്മയും എടുത്ത് കാണിക്കുകയാണ് ഈ ഖുർ ആൻ അവതരിപ്പിച്ചു കൊടുത്തത് ഒരു പർവതത്തിനായിരുന്നുവെങ്കിൽ -അതെത്ര ഉറച്ചതും കടുത്തതുമായിരുന്നാലും-ഖുർ ആന്റെ ഗൌരവത്താൽ അത് അള്ളാഹുവോട് വിനയം കാണിക്കുകയും അവനെ ഭയന്നതിനാൽ പൊട്ടിപ്പിളരുകയും ചെയ്യുമായിരുന്നു അത്രയും മഹത്തായതാണത് എന്നിട്ടു പോലും വിശേഷ ബുദ്ധിയുള്ള മനുഷ്യൻ ഖുർആൻ ഉൾക്കൊണ്ട് ചിന്തിക്കുന്നവനും അള്ളാഹുവെ ഭയപ്പെടുന്നവനുമാകുന്നില്ലല്ലോ

هُوَ اللَّهُ الَّذِي لَا إِلَهَ إِلَّا هُوَ عَالِمُ الْغَيْبِ وَالشَّهَادَةِ هُوَ الرَّحْمَنُ الرَّحِيمُ (22

താനല്ലാതെ യാതൊരു ആരാധ്യനുമില്ലാത്തവനായഅള്ളാഹുവാണവൻ.അവൻ ദൃശ്യവും അദൃശ്യവും അറിയുന്നവനാകുന്നു അവൻ പരമകാരുണികനും കരുണാനിധിയുമാകുന്നു

ആരാധ്യനാവാൻ അർഹൻ അള്ളാഹു മാത്രമേയുള്ളൂ.അവൻ എല്ലാം അറിയുന്നവനാണ് അവനെ അനുസരിച്ചവർക്കും അല്ലാത്തവർക്കും ഇഹലോകത്ത് അവൻ അനുഗ്രഹം നൽകുമെങ്കിലും അനന്തമായ പരലോകത്ത് അവനെ അനുസരിച്ചവർക്ക് മാത്രമേ അവൻ ഗുണം ചെയ്യുകയുള്ളൂ.ഇതാണ് അവസാന ഭാഗത്തിന്റെ ആശയം

هُوَ اللَّهُ الَّذِي لَا إِلَهَ إِلَّا هُوَ الْمَلِكُ الْقُدُّوسُ الْمُهَيْمِنُ الْعَزِيزُ الْجَبَّارُ الْمُتَكَبِّرُ سُبْحَانَ اللَّهِ عَمَّا يُشْرِكُونَ(23

(അതെ)അവനല്ലാതെ വേറെ ആരാധ്യനില്ലാത്ത അള്ളാഹുവാണവൻ.അവൻ രാജാവും മഹാ പരിശുദ്ധനും അന്യൂനനും അഭയം നൽകുന്നവനും മേൽനോട്ടം വഹിക്കുന്നവനും പ്രതാപശാലിയും പരമാധികാരിയും മഹത്വമുള്ളവനുമാണ് അവർ പങ്ക് ചേർക്കുന്നതിൽ നിന്ന് അള്ളാഹു എത്ര പരിശുദ്ധൻ!

അള്ളാഹുവിന്റെ അത്യുത്കൃഷ്ട ഗുണനാമങ്ങളിൽ ചിലത് എടുത്ത് കാണിച്ചിരിക്കയാണ് ഈ വാക്യങ്ങളിൽ.എല്ലാ വസ്തുക്കളുടെയും ഉടമസ്ഥനും അവയെ യഥേഷ്ടം നിയന്ത്രിക്കുന്നവനും എന്നാണ് الْمَلِكُ എന്ന നാമത്തിന്റെ വിവക്ഷ.സകലവിധ കുറ്റങ്ങളിൽ നിന്നും പരിശുദ്ധൻ എന്നാണ് الْقُدُّوسُ എന്നതിന്റെ വിവക്ഷ.എല്ലാ പോരായ്മയിൽ; നിന്നും സുരക്ഷിതൻ എന്ന് السَّلَامُ എന്ന വാക്ക് സൂചിപ്പിക്കുന്നു ഈഅർത്ഥപ്രകാരം ഖുദ്ദൂസ്, സലാം ഇത് രണ്ടും ഒന്നു തന്നെയല്ലേ പിന്നെ എന്തിനാണ് ആവർത്തിക്കുന്നത് എന്ന് ചോദ്യമുണ്ടാവാം.ഭൂതകാലത്തും വർത്തമാന കാലത്തും പോരായ്മകൾ അള്ളാഹിവുനുണ്ടായിട്ടില്ല എന്ന് ഖുദ്ദൂസ് എന്ന പദവും ഭാവിയിൽ ഒരു ന്യൂനതയും അള്ളാഹുവിനുണ്ടാവില്ല എന്ന സലാം എന്ന പദവും അറിയിക്കുന്നു എന്നാണിതിന്റെ നിവാരണം

അർഹതയുള്ളവർക്ക് അഭയം നൽകുന്നവൻ എന്ന് الْمُؤْمِنُ എന്ന വാക്യവും എല്ലാത്തിന്റെയും മേൽനോട്ടവും മേലന്വേഷണവും നടത്തുന്നവൻ എന്ന് الْمُهَيْمِنُ എന്ന വാക്യവും.തന്റെ അധികാര ശക്തിക്ക് എല്ലാവരെയും കീഴ് പെടുത്തുന്ന പരമാധികാരി എന്ന് എന്നതും എല്ലാ യോഗ്യതയും തികഞ്ഞ മഹത്വമുള്ളവൻ എന്ന് الْمُتَكَبِّرُ എന്ന വാക്കും അറിയിക്കുന്നു

هُوَ اللَّهُ الْخَالِقُ الْبَارِئُ الْمُصَوِّرُ لَهُ الْأَسْمَاء الْحُسْنَى يُسَبِّحُ لَهُ مَا فِي السَّمَاوَاتِ وَالْأَرْضِ وَهُوَ الْعَزِيزُ الْحَكِيمُ(24

അവൻ അള്ളാഹുവാണ്. സൃഷ്ടിക്കുന്നവനും നിർമ്മിച്ചുണ്ടാക്കുന്നവനും രൂപം നൽകുന്നവനും.അവനു ഉൽകൃ‌ഷ്ട നാമങ്ങളുണ്ട് ആകാശഭൂമികളിലുള്ളതെല്ലാം അവന്റെ പരിശുദ്ധിയെ പ്രകീർത്തിക്കുന്നുണ്ട് അവൻ പ്രതാപ ശാലിയും അഗാധജ്ഞാനമുള്ളവമാണ്

സർവ വസ്തുക്കളെയും ഇന്നിന്ന പ്രകാരമെന്ന് നിശ്ചയിച്ച് ഓരോന്നിനും വേണ്ട ആക്ര്‌തിയും പ്രക്ര്‌തിയും കൊടുത്ത് ക്രമീകരിച്ച് രൂപം നൽകി സൃ‌ഷ്ടിച്ചുണ്ടാക്കുന്നവൻ എന്നാണ് الْخَالِقُ الْبَارِئُ الْمُصَوِّر എന്നിവയുടെ വ്യാഖ്യാനം.ഇത് പോലെ ധാരാളം നാമങ്ങൾ ഖുർ ആനിലും ഹദീസിലും വന്നിട്ടുണ്ട് അള്ളാഹുവിനു അതി വിശിഷ്ട നാമങ്ങളുണ്ട് അതിനാൽ അവകൊണ്ട് നിങ്ങൾ അള്ളാഹുവോട് പ്രാർത്ഥിക്കുക (അഅ്റാഫ് 180)

ഈ അവസാന നാലു സൂക്തങ്ങൾ രാവിലെയും വൈകുന്നേരവും പാരായണം ചെയ്യുന്നത് വളരെ ഉപകാരപ്രദമാണെന്ന് ഹദീസിൽ വന്നിട്ടുണ്ട്

അള്ളാഹുവിന്റെ മഹത്വങ്ങൾ മനസിലാക്കി അവനു കീഴ്പെട്ട് അവന്റെ വിധിവിലക്കുകൾ അനുസരിച്ച് ജീവിക്കുന്നവരിൽ അള്ളാഹു നമ്മെ ഉൾപ്പെടുത്തട്ടെ ആമീൻ

അദ്ധ്യായം 59 : സൂറത്തുൽ ഹശ്ർ-ഭാഗം-01

2011-10-25T13:30:00.000+04:00

سورة الحشر

മദീനയിൽ അവതരിച്ചു :സൂക്തങ്ങൾ 24

بسم الله الرحمن الرحيم

പരമകാരുണികനും മഹാകാരുണ്യവാനുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

سَبَّحَ لِلَّهِ مَا فِي السَّمَاوَاتِ وَمَا فِي الْأَرْضِ وَهُوَ الْعَزِيزُ الْحَكِيمُ (1

ആകാശ ഭൂമിയിലുള്ളവയെല്ലാം അള്ളാഹുവിന്റെ പരിശുദ്ധിയെ പ്രകീർത്തിക്കുന്നു അവൻ പ്രതാപവാനും അഗാധജ്ഞനുമത്രെ

അള്ളാഹുവിന്റെ പരിശുദ്ധി എല്ലാ വസ്തുക്കളും അവയുടെതായ ശൈലിയിൽ പ്രകീർത്തനം ചെയ്തു കൊണ്ടേയിരിക്കുന്നുണ്ട്.അള്ളാഹു യാതൊരു കുറവുകളുമില്ലാത്തവനാണെന്നും അവനിലേക്ക് മക്കളെയോ പങ്കാളികളെയോ ചേർത്തിപ്പറയപ്പെടാൻ പറ്റില്ലെന്നുമൊക്കെ ഈ പ്രകീർത്തനത്തിന്റെ പ്രധാന ഉദ്ദേശ്യമാണ്.പങ്കാളികളെയോ മക്കളെയോ സ്വീകരിക്കേണ്ട ഒരു ആവശ്യവുമില്ലാത്ത വിധം അള്ളാഹു പ്രതാപിയും അഗാധജ്ഞനുമത്രെ എന്നാണിവിടെ സൂചിപ്പിക്കുന്നത്

هُوَ الَّذِي أَخْرَجَ الَّذِينَ كَفَرُوا مِنْ أَهْلِ الْكِتَابِ مِن دِيَارِهِمْ لِأَوَّلِ الْحَشْرِ مَا ظَنَنتُمْ أَن يَخْرُجُوا وَظَنُّوا أَنَّهُم مَّانِعَتُهُمْ حُصُونُهُم مِّنَ اللَّهِ فَأَتَاهُمُ اللَّهُ مِنْ حَيْثُ لَمْ يَحْتَسِبُوا وَقَذَفَ فِي قُلُوبِهِمُ الرُّعْبَ يُخْرِبُونَ بُيُوتَهُم بِأَيْدِيهِمْ وَأَيْدِي الْمُؤْمِنِينَ فَاعْتَبِرُوا يَا أُولِي الْأَبْصَارِ (2

വേദക്കാരിൽ നിന്നുള്ള സത്യ നിഷേധികളെ ഒന്നാമത്തെ നാടുകടത്തലിൽ സ്വഭവനങ്ങളിൽ നിന്ന് പുറത്താക്കിയവനാണ് അവൻ.അവർ പുറത്ത് പോകുമെന്ന് നിങ്ങൾ വിചാരിച്ചിരുന്നില്ല തങ്ങളുടെ കോട്ടകൾ അള്ളാഹുവിൽ നിന്ന് തങ്ങളെ തടുത്തു രക്ഷിക്കുന്നവയാണെന്ന് അവർ ധരിക്കുകയും ചെയ്തു.എന്നാൽ അവർ ഊഹിക്കാത്ത ഭാഗത്തുകൂടി അള്ളാഹു(വിന്റെ ശിക്ഷ)അവർക്ക് വരികയും അവരുടെ ഹൃദയങ്ങളിൽ അവൻ ഭീതി ഇട്ടുകൊടുക്കുകയും ചെയ്തു. അവർ തങ്ങളുടെ വീടുകളെ സ്വന്തം കൈകൾ കൊണ്ടും സത്യവിശ്വാസികളുടെ കൈകൾകൊണ്ടും നശിപ്പിക്കുന്നു അതിനാൽ കണ്ണുള്ളവരേ നിങ്ങൾ ആലോചിക്കൂ!

ഹശ്ർ എന്നാൽ നാട് കടത്തൽ എന്ന് അർത്ഥം. മദീനയുടെ പരിസരങ്ങളിൽ താമസിച്ചിരുന്ന ജൂത ഗോത്രങ്ങളിലൊന്നായിരുന്നു ബനുന്നളീർ.(ബനൂ ഖുറൈള: ബനൂ ഖൈനുഖാഅ് എന്നിവയായിരുന്നു മറ്റു രണ്ട് ഗോത്രങ്ങൾ) നബി(സ)മദീനയിൽ വന്ന ശേഷം അവരുമായി സമാധാന ഉടമ്പടിയിലേർപ്പെട്ടു പിന്നീട് അവർ കരാർ ലംഘിക്കുകയും നബി(സ)യെയും സത്യ വിശ്വാസികളെയും ഉപദ്രവിക്കുകയും ചെയ്തു കൊണ്ടിരുന്നു അതിനെത്തുടർന്ന് അവർക്കെതിരെ ചില നടപടികളെടുക്കാൻ നബി(സ) തീരുമാനിച്ചു. ഹിജ്റയുടെ നാലാം വർഷം റബീഉൽ അവ്വലിലായിരുന്നു അത്. ആ സംഭവമാണിവിടെ വിശദീകരിക്കുന്നത്.അതിനാൽ ഈ സൂറത്തിനു സൂറത്തുന്നളീർ എന്നും പേരുണ്ട്

ദുഷ്ടരായ ജൂതന്മാർ സത്യവിശ്വാസികളെ കഠിനമായി ഉപദ്രവിച്ചു കൊണ്ടിരുന്നു ഇമാം റാസി(റ) എഴുതുന്നു. ബനൂനളീർ ഗോത്രക്കാർ നബി(സ)യുമായി ഞങ്ങൾ ഉപകാരത്തിനും ഉപദ്രവത്തിനുമുണ്ടാവില്ല എന്ന നിലയിൽ സന്ധിയുണ്ടാക്കി. ബദ്റിൽ മുസ്‌ലിംകൾക്ക് അഭിമാനകരമായ വിജയമുണ്ടായപ്പോൾ ഇത് തൌറാത്തിൽ പറഞ്ഞ പ്രവാചകൻ തന്നെ എന്ന് അവർ പറഞ്ഞു, എന്നാൽ ഉഹ്ദിൽ മുസ്‌ലിംകൾക്ക് ഒരു ഘട്ടത്തിൽ ചെറിയ പരാജയം ഉണ്ടായെന്ന് തോന്നിയപ്പോൾ(യഥാർത്ഥത്തിൽ ഉഹ്ദിലും ആത്യന്തികമായി മുസ്‌ലിംകള് തന്നെയാണ് വിജയിച്ചത്)നബി(സ)യോടുണ്ടാക്കിയ കരാറിൽ നിന്ന് അവർ പിൻ മാറുകയും അവരുടെ നേതാവായ ക‌അബ്‌ബുനുൽ അശ്റഫിന്റെ നേത്രത്വത്തിൽ നാല്പതാളുകൾ മക്കയിൽ ചെന്ന് അബൂസുഫ് യാനുമായി കഅ്ബയുടെ സമീപത്ത് വെച്ച് സന്ധിയുണ്ടാക്കി .അപ്പോൾ മുഹമ്മദ്‌ബിന് മസ്‌ലമത്തല് അൻസാരി(റ)നെ നബി(സ) ഈ ജൂത നേതാവിനെ കൈകാര്യം ചെയ്യാൻ ഏൽ‌പ്പിക്കുകയും വിശ്വാസ വഞ്ചന കാണിച്ച ജൂത നേതാവിനെ മുഹമ്മദ്‌ബിന് മസ്ലമ(റ) കൊലപ്പെടുത്തുകയും ചെയ്തു പിന്നീട് മദീനയിലെ ബനൂ നളീറിന്റെ താമസ സ്ഥലത്തേക്ക് നബി(സ)യും സഹാബികളും മാർച്ച് ചെയ്യുകയും കരാർ ലംഘിച്ച അവരോട് മദീന വിട്ട് പോകാൻ നിർദ്ദേശിക്കുകയും ചെയ്തു.ഇവിടം വിട്ട് പോകുന്നതിനേക്കാൾ നല്ലത് മരണമാണെന്നായിരുന്നു അവരുടെ പ്രതികരണം മദീനയിലെ കപടന്മാരുടെ നേതാവായ അബ്ദുള്ളാഹിബ്നു ഉബയ്യിബ്നു സുലൂൽ ഒരിക്കലും നിങ്ങൾ ഇവിടം വിട്ട് പോകേണ്ടതില്ലെന്നും മുഹമ്മദ് നബി(സ) നിങ്ങൾക്കെതിരെ യുദ്ധം ചെയ്താൽ നിങ്ങൾക്കൊപ്പം ഞങ്ങൾ ഉണ്ടാകുമെന്നും നിങ്ങൾ നാട് വിട്ട് പോകേണ്ടി വന്നാൽ ഞങ്ങളും നിങ്ങളുടെ കൂടെയുണ്ടാവുമെന്നും ജൂതന്മാർക്ക് ഉറപ്പ് കൊടുത്തു അങ്ങനെ അവർ അവരുടെ കോട്ടക്കുള്ളിൽ ഒത്തുകൂടി മുസ്‌ലിംകൾ കോട്ട വളയുകയും അവരെ ഉപരോധിക്കുകയും ചെയ്തു ഈ ഉപരോധം ഇരുപത്തൊന്ന് ദിവസം തുടർന്നു(ദിവസത്തിന്റെ എണ്ണത്തിൽ വേറെയും അഭിപ്രായമുണ്ട്) തങ്ങളെ സഹായിക്കാമെന്നേറ്റ കപടന്മാർ അവരെ സഹായിച്ചില്ലെന്ന് മാത്രമല്ല അവർ ശരിക്കും തങ്ങളെ വഞ്ചിച്ചു എന്ന് ജൂതന്മാർക്ക് മനസിലായപ്പോൾ അവർക്ക് മനസിൽ ഭയം തോന്നി.അപ്പോൾ ജൂതന്മാർ നബി(സ)യുമായി സന്ധിക്ക് തയാറാണെന്ന് അറിയിച്ചു,പക്ഷെ വഞ്ചകന്മാരുമായി കരാർ ചെയ്യുന്നതിൽ കാര്യമില്ലെന്നറിയാവുന്ന നബി(സ) ജൂതന്മാർ നാട് വിട്ട് പോവുക എന്നതിൽ കുറഞ്ഞ ഒന്നും സ്വീകാര്യമല്ലെന്നറിയിച്ചു. മൂന്ന് വീട്ടുകാർക്ക് ഒരു ഒട്ടകത്തിനു ചുമക്കാവുന്ന ആയുധങ്ങളല്ലാത്ത സാധനങ്ങൾ കൊണ്ട് പോകാനും അനുവാദം നൽകി അങ്ങനെ അവർ സിറിയയിലെ അരീഹാഅ്أريحاء അദ്‌രിആത്ത് (أذرعات) എന്നിവിടങ്ങളിലേക്ക് നാട് വിട്ടു. അബുൽ ഹഖീഖിന്റെ കുടുംബവും ഹുയയ്യുബ്നു അഖ്തബിന്റെ കുടുംബവും ഒഴികെയുള്ളവരാണ് സിരിയയിൽ പോയത്.അവർ ഖൈബറിലേക്കും ഹീറായിലേക്കുമാണ് മാറിത്താമസിച്ചത്(റാസി)

ഇവിടെ ഒന്നാമത്തെ നാടുകടത്തൽ എന്ന് പറയാൻ കാരണം അറേബ്യൻ ഉപദ്വീപിൽ നിന്ന് ഇത്തരമൊരു ദുരനുഭവം അവർക്ക് ആദ്യമായാണ് എന്ന നിലക്കാണ്.കാരണം അവർ അറേബ്യയിൽ വേദം ലഭിച്ചവരെന്ന നിലക്ക് വലിയ പത്രാസിലും ബഹുമാനത്തിലുമായിരുന്നു നേരത്തേ കഴിഞ്ഞിരുന്നത് എന്ന അർത്ഥത്തിലാണെന്നാണ് ഇബ്നു അബ്ബാസ്(റ) അടക്കം ധാരാളം വ്യാഖ്യാതാക്കൾ പറയുന്നത്.ഇനിയും നാടു കടത്തലിനു അവർ വിധേയരാവാൻ പോകുന്നത് കൊണ്ടാണ് ആദ്യത്തേതാണീ പുറത്താവൽ എന്നും മറ്റും വ്യാഖ്യാനമുണ്ട്(റാസി)

>അവർ പുറത്ത് പോകുമെന്ന് നിങ്ങൾ വിചാരിച്ചിരുന്നില്ല< എന്ന് പറഞ്ഞത് അവരുടെ ശക്തിയും സ്വാധീനവും കാരണത്താൽ ഇത്ര പെട്ടെന്ന് അവർ ഒഴിഞ്ഞു പോകുമെന്ന് മുസ്‌ലിംകൾ കരുതിയില്ലെന്നാണ്

>തങ്ങളുടെ കോട്ടകൾ അള്ളാഹുവിൽ നിന്ന് തങ്ങളെ തടുത്തു രക്ഷിക്കുന്നവയാണെന്ന് അവർ ധരിക്കുകയും ചെയ്തു,,,<

അവരുടെ കോട്ട അത്രക്കും സുശക്തമായിരുന്നുവെന്നും നബി(സ)ക്ക് തങ്ങളെ ഒന്നും ചെയ്യാനാവില്ലെന്നും അവർ ധരിച്ചിരുന്നു അതാണ് നബി(സ)ക്കെതിരിൽ നിൽക്കാൻ അവർക്ക് ധൈര്യം നൽകിയത് എന്നത്രെ ഇവിടെ പറയുന്നത്

.. >എന്നാൽ അവർ ഊഹിക്കാത്ത ഭാഗത്തുകൂടി അള്ളാഹു (വിന്റെ ശിക്ഷ) അവർക്ക് വരികയും <

അവരുടെ നേതാവായ കഅബുബ്നുൽ അശ്റഫിനെ മുസ്‌ലിംകൾ കൊല ചെയ്തത് അവർക്ക് വല്ലാത്ത ആഘാതമായിരുന്നു അതോടെ അവരുടെ ശക്തി ചോരുകയും അവരുടെ സംഘ ശക്തി നശിക്കുകയും ചെയ്തു ഇത് അവർ തീരേ പ്രതീക്ഷിച്ചിരുന്നില്ല എന്നാണ് ഇവിടെ പറയുന്നത് അവർ ഊഹിക്കാത്ത ഭാഗത്ത് കൂടി അള്ളാഹുവിന്റെ സഹായം മുസ്‌ലിംകൾക്ക് വന്നു എന്നും ഇവിടെ വ്യാഖ്യാനമുണ്ട്(റാസി)

>അവരുടെ ഹൃദയങ്ങളിൽ അവൻ ഭീതി ഇട്ടുകൊടുക്കുകയും ചെയ്തു<

നബി(സ)ക്ക് അള്ളാഹു നൽകിയ ഏറ്റവും വലിയ അനുഗ്രഹങ്ങളിൽ പെട്ടതാണ് ശത്രുക്കളുടെ മനസിൽ മുസ്‌ലിംകളെ സംബന്ധിച്ച് ഭയം ഇട്ടു കൊടുക്കുക എന്നത് .

അവരുടെ വീടുകളെ അവരുടെ കൈകൊണ്ടും മുസ്ലിംകളുടെ കൈ കൊണ്ടും നശിപ്പിച്ചു എന്ന് പറഞ്ഞതിനെക്കുറിച്ച് ഇമാം റാസി(റ)എഴുതുന്നു .ജൂതന്മാർ എന്തായാലും നാട് വിട്ട് പോകേണ്ടി വരുമെന്ന് ഉറപ്പായപ്പോൾ ഞങ്ങൾ പോയതിനു ശേഷം ഈ വീടുകൾ മുസ്‌ലിംകൾ ഉപയോഗിക്കുന്നതിൽ ജൂതന്മാർക്ക് അസൂയ തോന്നുകയും അവർ അകത്ത് പരമാവധി കേട് വരുത്തുകയും ചെയ്തു എന്നാണ്. മുസ്ലിംകൾ പുറത്ത് നിന്നും അവയെ നശിപ്പിക്കുന്നുണ്ടായിരുന്നു മുസ്‌ലിംകൾ അവരുടെ നേരെ തിരിയാൻ കാരണം ജൂതന്മാർ തന്നെയാണല്ലോ അതാണ് മുസ്‌ലിംകളുടെ കൈകൊണ്ടും അവരുടെ വീടുകളെ അവർ നശിപ്പിച്ചു എന്ന് പറഞ്ഞത് .ആയത്തിനൊടുവിൽ കണ്ണുള്ളവരോട് ആലോചിക്കാൻ പറഞ്ഞതിൽ വലിയ അർത്ഥമുണ്ട്.തങ്ങളുടെ കോട്ടയും സ്വാധീനവും അവരുടെ രക്ഷയായി അവർ കണ്ടുവെങ്കിലും അള്ളാഹു വിന്റെ തീരുമാനത്തിൽ നിന്ന് ഒരു കോട്ടയും ഒരു സ്വാധീനവും അവർക്ക് ഉപകരിച്ചില്ല എന്ന് വരുമ്പോൾ ചിന്തിക്കുന്നവർ അള്ളാഹുവിനെ ഭയപ്പെടേണ്ടതിന്റെ ആവശ്യകതയും അവനിൽ എല്ലാം ഏൽ‌പ്പിക്കണം എന്നും ഇതിൽ നിന്ന് മനസ്സിലാക്കുക തന്നെ ചെയ്യും എന്ന് ഇത് തെളിയിക്കുന്നു ഇമാം റാസി(റ) എഴുതുന്നു അള്ളാഹുവിലല്ലാതെ നിങ്ങൾ അഭയം തേടരുത് ഒരു പ്രബഞ്ചത്യാഗിയായ വ്യക്തി തന്റെ ആ ത്യാഗത്തിലോ ഒരു പണ്ഡിതൻ തന്റെ പാണ്ഡിത്യത്തിലോ അഭയം കണ്ടെത്തരുത്. കാരണം വലിയ ത്യാഗിയും പണ്ഡിതനുമായിരുന്നു ബൽആം എന്ന മനുഷ്യൻ.(പക്ഷെ അയാൾ പട്ടിയേക്കാൾ മോശം എന്ന വിധത്തിലാണ് വിലയിരുത്തപ്പെട്ടത്) അള്ളാഹുവിൽ ഭരമേല്പിച്ചാൽ അവനു അള്ളാഹു മതി എന്ന് ഖുർആൻ പഠിപ്പിക്കുന്നുണ്ടല്ലോ!

وَلَوْلَا أَن كَتَبَ اللَّهُ عَلَيْهِمُ الْجَلَاء لَعَذَّبَهُمْ فِي الدُّنْيَا وَلَهُمْ فِي الْآخِرَةِ عَذَابُ النَّارِ(3

ഈനാടു വിട്ടുപോകൽ അവരുടെ മേൽ അള്ളാഹു വിധിച്ചിരുന്നില്ലെങ്കിൽ ഇഹത്തിൽ വെച്ചുതന്നെ അള്ളാഹു അവരെ (മറ്റൊരുവിധത്തിൽ)ശിക്ഷിക്കുമായിരുന്നു പരലോകത്തിൽ അവർക്ക് നരകശിക്ഷയുണ്ട്

നബി(സ)യുടെ എതിരിൽ വഞ്ചനയും കരാർ ലംഘനവും കാണിച്ച ഈ ജൂതന്മാർക്ക് നാട് വിട്ടുപോകൽ എന്ന ശിക്ഷ ഇല്ലെങ്കിലും അവർ മറ്റു നിലയിൽ (കൊല്ലപ്പെടലുൾപ്പെടെ) ശിക്ഷിക്കപ്പെടുമായിരുന്നു പരലോകം എന്തായാലും അവർക്ക് വിഷമകരം തന്നെ എന്നാണിവിടെ സൂചിപ്പിക്കുന്നത്

ذَلِكَ بِأَنَّهُمْ شَاقُّوا اللَّهَ وَرَسُولَهُ وَمَن يُشَاقِّ اللَّهَ فَإِنَّ اللَّهَ شَدِيدُ الْعِقَابِ (4

അത് അള്ളാഹുവോടും അവന്റെ റസൂലിനോടും അവർ മത്സരിച്ചത് കൊണ്ടാകുന്നു അള്ളാഹുവിനോട് വല്ലവനും മത്സരിച്ചാൽ നിശ്ചയമായും അള്ളാഹു കഠിനമായി ശിക്ഷിക്കുന്നവനാകുന്നു

അവർ ഈ വിധം പരീക്ഷിക്കപ്പെട്ടത് അള്ളാഹുവിനോടും റസൂലിനോടും മത്സരിച്ചത് കൊണ്ടാണ്.അത്തരക്കാർ കഠിന ശിക്ഷക്ക് വിധേയരാവുക തന്നെ ചെയ്യും .ഇത്തരക്കാർക്ക് ശിക്ഷ ഉറപ്പ് തന്നെ എന്ന് അള്ളാഹു പറയുന്നത് അത്തരം തെറ്റുകളിലേക്ക് പോകാതിരിക്കും വിധം ജനങ്ങളെ തിന്മയിൽ നിന്ന് തടയാൻ വേണ്ടിയാണ്

مَا قَطَعْتُم مِّن لِّينَةٍ أَوْ تَرَكْتُمُوهَا قَائِمَةً عَلَى أُصُولِهَا فَبِإِذْنِ اللَّهِ وَلِيُخْزِيَ الْفَاسِقِينَ (5

(സത്യവിശ്വാസികളേ)നിങ്ങൾ ഈത്തപ്പനയിൽ നിന്ന് വല്ലതും മുറിക്കുകയോ അല്ലെങ്കിൽ അവയെ മുരടുകളിൽ നിലകൊള്ളുന്നതായി വിടുകയോ ചെയ്തിട്ടുണ്ടെങ്കിൽ അത് അള്ളാഹുവിന്റെ അനുവാദപ്രകാരമാണ് (സത്യവിശ്വാസികളെ അന്തസ്സുള്ളവരാക്കുവാനും)അ ധിക്കാരികളെ നിന്ദിക്കുവാനും വേണ്ടി ആകുന്നു (അത്)

യഹൂദികളുടെ കോട്ട ഉപരോധിച്ചപ്പോൾ അവരെ വിഷമിപ്പിക്കാനും ഭയപ്പെടുത്താനുമായി അവരുടെ ഈത്തപ്പനകൾ മുറിച്ചു കളയുവാൻ നബി(സ) സഹാബികൾക്ക് നിർദ്ദേശം നൽകി .അപ്പോൾ മുഹമ്മദ്(സ)നന്മ ചെയ്യുന്ന ആളാണെന്നല്ലേ പറയുന്നത് കൃഷി നശിപ്പിക്കുന്നത് നന്മയാണോ എന്ന് ശത്രുക്കൾ ആക്ഷേപമുന്നയിച്ചു.ജൂതന്മാർ നാടുവിടുന്നതോടെ മുസ്ലിംകൾക്ക് ഗനീമത്തായി ലഭിക്കാവുന്ന മുതൽ എന്തിനു നമ്മൾ തന്നെ നശിപ്പിക്കണമെന്ന സംശയം ചില മുസ്‌ലിംകള്ക്കും തോന്നാതിരുന്നില്ല.എന്നാൽ പ്രത്യേക പരിതസ്ഥിതിയിൽ ഇത് ആവാശ്യമായിരുന്നെന്നും തന്റെ അനുമതിയോടെയാണതുണ്ടായതെന്നും അള്ളാഹു വ്യക്തമാക്കിയിരിക്കുകയാണ്. എതിരാളികളെ നിന്ദിക്കലും കോട്ടയിൽ നിന്ന് അവരെ പുറത്ത് ചാടിക്കലും സത്യവിശ്വാസികൾക്ക് അന്തസ്സ് നിലനിർത്താനുമാണിത് എന്നാണിവിടെ പറയുന്നത്

അവരുടെ ഏറ്റവും വിലയുള്ള ധനമായി അവർ കണ്ടിരുന്നതാണ് ഈത്തപ്പനകൾ.അത് തങ്ങളുടെ ശത്രുക്കൾ നശിപ്പിക്കുന്നത് കാണേണ്ടി വരുന്നത് വല്ലാത്ത ശിക്ഷ തന്നെയല്ലെ!

ഇവിടെلينة ലീനത്ത് എന്നാൽ അജ്വ,ബർനീ എന്നീ ഈത്തപ്പഴങ്ങളല്ലാത്താവയാണുദ്ദെശ്യമെന്ന് ഇമാം റാസി(റ)രേഖപ്പെടുത്തിയിട്ടുണ്ട്

وَمَا أَفَاء اللَّهُ عَلَى رَسُولِهِ مِنْهُمْ فَمَا أَوْجَفْتُمْ عَلَيْهِ مِنْ خَيْلٍ وَلَا رِكَابٍ وَلَكِنَّ اللَّهَ يُسَلِّطُ رُسُلَهُ عَلَى مَن يَشَاء وَاللَّهُ عَلَى كُلِّ شَيْءٍ قَدِير (6)

അവരിൽ നിന്ന് തന്റെ റസൂലിനു അള്ളാഹു കൈവരുത്തിക്കൊടുത്തതെന്തോ അതിനു വേണ്ടി നിങ്ങൾ കുതിരകളെയോ ഒട്ടകങ്ങളെയൊഓടിച്ചിട്ടില്ല.പക്ഷെ താനുദ്ദേശിക്കുന്നവരുടെ മേൽ തന്റെ ദൂതന്മാരെ അവൻ അധികാരപ്പെടുത്തുന്നു അള്ളാഹു എല്ലാ കാര്യത്തിനും കഴിവുള്ളവനാകുന്നു

ബനൂനളീർ വിട്ടുപോയ സ്വത്തിനെക്കുറിച്ചാണിവിടെ പറയുന്നത്.ശത്രുക്കളുമായി ഏറ്റുമുട്ടാതെയും പടവെട്ടാതെയും അള്ളാഹു തന്റെ റസൂലിന് അധീനപ്പെടുത്തിക്കൊടുത്തതാണിത് .ഇങ്ങനെ യുദ്ധമില്ലാതെ ലഭിക്കുന്ന സ്വത്തിനു (ശത്രുക്കൾ ഒഴിച്ചിട്ട് പോയതിനാലോ അല്ലെങ്കിൽ അവർ കൊലയിൽ നിന്ന് രക്ഷപ്പെടാനായി നികുതിയിനത്തിലല്ലാതെ നൽകിയതിനാലോ ആവാം ഇങ്ങനെ ലഭിക്കുന്നത്) ഫൈഅ്(فيء) എന്നാണ് പറയുക. ശത്രുക്കളുമായി യുദ്ധം നടത്തുകയും എന്നിട്ട് അവരിൽ നിന്ന് ലഭിക്കുന്ന സ്വത്തിനു ഗനീമത്ത് എന്നും പറയും

മദീനയുടെ വളരെ അടുത്ത് താമസിച്ചിരുന്ന ബനൂനളീറിനെ നേരിടാൻ വാഹനപ്പുറത്ത് വരേണ്ട കാര്യം പോലുമില്ലാത്തതിനാൽ നബി(സ) അല്ലാതെ ആരും വാഹനത്തിൽ അല്ല അങ്ങോട്ട് വന്നത് (നബി(സ)ഒട്ടകപ്പുറത്തായിരുന്നു വന്നത്)ഏതായാലും ശത്രുക്കളിൽ നിന്ന് ലഭിച്ച ധനം ഗനീമത്ത് പോലെ ഓഹരി ചെയ്യാതെ നബി(സ)ക്ക് യുക്തമെന്ന് തോന്നും വിധം കൈകാര്യം ചെയ്യാൻ അള്ളാഹു അനുവാദം നൽകി.അപ്പോൾ മക്കയിൽ നിന്ന് പാലായനം ചെയ്തെത്തിയ സാധുക്കളായ സഹാബികൾക്ക് അത് നബി(സ)വിതരണം ചെയ്തു അബൂദുജാന: (റ) സഹ്_ലുബ്നു ഹുനൈഫ്(റ) ഹാരിസുബ്നുസ്വിമത്(റ)എന്നീ മദീനക്കാർ വളരെ സാധുക്കളായത് കൊണ്ട് അവർക്കും നബി(സ)നൽകി (റാസി)

സാധാരണ ഗനീമത്ത് ഓഹരി ചെയ്യുമ്പോലെ ഇതും ചെയ്യുന്നില്ലേ എന്ന് അന്വേഷിച്ച സഹാബികളുടെ അറിവിലേക്കായാണ് ഇത് ഗനീമത്തല്ല പ്രത്യുത ഫൈഅ് ആണെന്ന് അള്ളാഹു അറിയിച്ചത് (റാസി)

مَّا أَفَاء اللَّهُ عَلَى رَسُولِهِ مِنْ أَهْلِ الْقُرَى فَلِلَّهِ وَلِلرَّسُولِ وَلِذِي الْقُرْبَى وَالْيَتَامَى وَالْمَسَاكِينِ وَابْنِ السَّبِيلِ كَيْ لَا يَكُونَ دُولَةً بَيْنَ الْأَغْنِيَاء مِنكُمْ وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا وَاتَّقُوا اللَّهَ إِنَّ اللَّهَ شَدِيدُ الْعِقَابِ (7

(എന്നുവെച്ചാൽ) അള്ളാഹു തന്റെ റസൂലിനു നാട്ടുകാരിൽ നിന്ന് കൈവരുത്തിക്കൊടുത്തതെന്തോ അത് അള്ളാഹുവിനും അവന്റെ റസൂലിനും (റസൂലിന്റെ)അടുത്ത കുടുംബങ്ങൾക്കും അനാഥ കുട്ടികൾക്കും അഗതികൾക്കും വഴിയാത്രക്കാർക്കും ഉള്ളതാകുന്നു ആ ധനം നിങ്ങളിലുള്ള ധനികന്മാർക്കിടയിൽ കൈമാറ്റപ്പെടുന്നതാവാതിരിക്കാനായിട്ടാണ്(അങ്ങനെ വിതരണം ചെയ്യാൻ കല്പിച്ചത്) റസൂൽ നിങ്ങൾക്ക് നൽകിയതെന്തോ അത് സ്വീകരിച്ചുകൊള്ളുക റസൂൽ നിങ്ങളോട് വിരോധിച്ചതെന്തോ അതിൽ നിന്ന് അകന്ന് നിൽക്കുക അള്ളാഹുവിനെ സൂക്ഷിക്കുകയും ചെയ്യുക നിശ്ചയമായും അള്ളാഹു കഠിനമായി ശിക്ഷിക്കുന്നവനാകുന്നു

ബനൂനളീറിൽ നിന്ന് ലഭിച്ചത് പോലുള്ള ഫൈഅ് ഇനത്തിൽ പെട്ട ധനം ഭാഗിക്കേണ്ട ക്രമമാണിവിടെ പറയുന്നത്.അത് അള്ളാഹുവിനും അവന്റെ റസൂലിനും അവിടുത്തെ അടുത്ത കുടുംബങ്ങൾക്കും അനാഥകൾ, സാധുക്കൾ, യാത്രക്കാർ എന്നിവർക്കുമുള്ളതാണ്.അള്ളാഹുവിനുള്ളത് എന്നതിന്റെ താല്പര്യം അള്ളാഹു നിശ്ചയിക്കുന്ന പ്രകാരം ഓഹരിച്ചെയ്യണമെന്നാണ്.ഇത് ഇവരിൽ ഓഹരി ചെയ്യപ്പെടാനായി അള്ളാഹു പറഞ്ഞ കാരണം ശ്രദ്ധേയമാണ് ധനം ധനികർക്കിടയിൽ മാത്രം കൈമാറപ്പെടുന്ന ഒരു വസ്തുവാകരുത്. ധനം ധനികർക്ക് മാത്രം കൈകാര്യം ചെയ്യാനവസരമുണ്ടായാൽ പോരാ. സാധുക്കൾക്കുമുണ്ടാവണം അതിനു അവസരം.അതിനാൽ സാധുവിനെ പരിഗണിക്കേണ്ട സന്ദർഭങ്ങളൊന്നും ഇസ്‌ലാം പാഴാക്കുകയില്ല .ഇത് ഫലപ്രദമായി നടപ്പാക്കാനാണ് സക്കാത്ത് നിശ്ചയിച്ചതും പൂഴ്ത്തിവെപ്പും പലിശയും അടക്കം ധനവിനിയോഗത്തിലെ ചൂഷണ വഴികളെ മുഴുവൻ ഇസ്‌ലാം നിരോധിച്ചതും ! ഉള്ളവന്റേത് പിടിച്ച് പറിച്ച് സേവനം നടത്തുന്ന ചിന്താഗതിയല്ല ഇസ്‌ലാം ഇതിനു കണ്ടെതെന്നത് പ്രത്യേകം ശ്രദ്ധിക്കേണ്ടതാണ്

റസൂൽ നൽകിയത് സ്വീകരിക്കുക വിരോധിച്ചത് വർജ്ജിക്കുക എന്നത് അവിടുന്ന് കൊണ്ടുവന്ന എല്ലാ നിയമങ്ങൾക്കും സാമ്പത്തിക വിഷയങ്ങൾക്കും ബാധകമാണ്. നബി(സ) വാക്ക് കൊണ്ടോ പ്രവർത്തി കൊണ്ടോ സമ്മതം കൊണ്ടോ വ്യക്തമായോ വ്യംഗ്യമായോ കാണിച്ചു തന്നതെല്ലാം ഇതിൽ ഉൾപ്പെടുന്നു .നബി(സ) കാണിച്ചു തന്നതെല്ലാം അംഗീകരിക്കുക എന്നാൽ കാണിച്ചു തരാത്തതൊക്കെ തെറ്റാണെന്ന് അർത്ഥമില്ല. പാടില്ലെന്ന് വിലക്കിയത് വർജ്ജിക്കണം എന്നേയുള്ളൂ. നബി(സ)പഠിപ്പിച്ചതാണെങ്കിൽ പോലും തന്റെ യുക്തിക്ക് നിരക്കുന്നില്ലെന്ന നിലക്ക് അത് തള്ളിക്കളയാൻ വെമ്പുന്നത് വലിയ അപകടം തന്നെ

لِلْفُقَرَاء الْمُهَاجِرِينَ الَّذِينَ أُخْرِجُوا مِن دِيارِهِمْ وَأَمْوَالِهِمْ يَبْتَغُونَ فَضْلًا مِّنَ اللَّهِ وَرِضْوَانًا وَيَنصُرُونَ اللَّهَ وَرَسُولَهُ أُوْلَئِكَ هُمُ الصَّادِقُونَ(8

തങ്ങളുടെ വാസസ്ഥലങ്ങളിൽ നിന്നും സ്വത്തുക്കളിൽ നിന്നും പുറത്താക്കപ്പെട്ട മുഹാജിറുകളായ ദരിദ്രർക്കുള്ളതാണ് (വിശിഷ്യാ ആ ധനം) അവർ അള്ളാഹുവിൽ നിന്നുള്ള അനുഗ്രഹവും സംത്ര്‌പ്തിയും തേടുന്നവരും അള്ളാഹുവിനെയും അവന്റെ റസൂലിനെയും സഹായിക്കുന്നവരും ആയ സ്ഥിതിയിലാണ്(അവർ പുറത്താക്കപ്പെട്ടത്)അവർ തന്നെയാണ് സത്യവാന്മാർ

നാടും വീടും സ്വത്തുക്കളും വിട്ട് ഉടുതുണിക്ക് മറുതുണിയില്ലാതെ മദീനയിൽ അഭയം പ്രാപിച്ച മുഹാജിറുകൾക്ക് ബനൂന്നളീർ കൈവിട്ടു പോയ സ്വത്തിൽ അവകാശമുണ്ടെന്നാണ് ഈ വാക്യത്തിൽ പറയുന്നത് അവർ അള്ളാഹുവിന്റെ തൃപ്തിയും അനുഗ്രഹവും ആഗ്രഹിച്ചും അവന്റെ ദീനിനെയും റസൂലിനെയും സഹായിക്കുവാനുമായിട്ടാണ് എല്ലാം ഉപേക്ഷിച്ച് മദീനയിൽ വന്നത് തങ്ങളുടെ വിശ്വാസത്തിലും നടപടിയിലുമെല്ലാം തികച്ചും സത്യസന്ധരാണവർ

ഇമാം റാസി(റ)എഴുതുന്നു “ഈ മുഹാജിറുകൾക്ക് കുറേ വിശേഷണങ്ങൾ അള്ളാഹു പറഞ്ഞിരിക്കുന്നു.(ധരിദ്രർ,പാലായനം ചെയ്തവർ,വീട്ടിൽ നിന്നും സ്വത്തിൽ നിന്നും പുറത്താക്കപ്പെട്ടവർ” അള്ളാഹുവിന്റെ തൃപ്തിയും ഔദാര്യവും(സ്വർഗം) തേടുന്നവർ ( സ്വന്തം ശരീരം കൊണ്ടും സമ്പത്ത് കൊണ്ടും അള്ളാഹുവിനെയും റസൂലിനെയും സഹായിക്കുന്നവർ,സത്യവാന്മാർ) എന്നിവയാണാ വിശേഷണങ്ങൾ. അതായത് അള്ളാഹുവിനും റസൂലിനും വേണ്ടി തങ്ങളുടെ സന്തോഷങ്ങളെ വിട്ടൊഴിഞ്ഞ് ശത്രുക്കളുടെ പീഢനങ്ങളെ അവഗണിച്ചും സഹിച്ചും സത്യ സന്ധത നിലനിർത്തിയും സത്യാവാന്മാർ എന്ന സ്ഥാനം നേടിയവരാണവർ(റാസി)

وَالَّذِينَ تَبَوَّؤُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَى أَنفُسِهِمْ وَلَوْ كَانَ بِهِمْ خَصَاصَةٌ وَمَن يُوقَ شُحَّ نَفْسِهِ فَأُوْلَئِكَ هُمُ الْمُفْلِحُون (9

അവരുടെ മുമ്പായി(മുഹാജിറുകളുടെ വരവിനു മുമ്പായി)തന്നെ വാസസ്ഥലം സൌകര്യപ്പെടുത്തിവെച്ചവരും സത്യവിശ്വാസം സ്വീകരിച്ചവരുമായവർക്കുമുള്ളതാണ്(ആ ധനം) തങ്ങളുടെ അടുക്കലേക്ക് പാലായനം ചെയ്തെത്തിയവരെ അവർ സ്നേഹിക്കുന്നു മുഹാജിറുകൾക്ക് നൽകപ്പെട്ടതിനെ സംബന്ധിച്ച് തങ്ങളുടെ മനസ്സുകളിൽ ഒരു അസൂയയും അവർ കണ്ടെത്തുകയില്ല സ്വന്തത്തിനു ആവശ്യമുണ്ടെങ്കിൽ പോലും തങ്ങളേക്കാൾ (മറ്റുള്ളവർക്ക്) അവർ പ്രാധാന്യം നൽകും മനസ്സിന്റെ പിശുക്കിൽ നിന്ന് അഥവാ ആർത്തിയിൽ നിന്ന് )ആര് സുരക്ഷിതരായോ അവർ തന്നെയാണ് വിജയികൾ

മുഹാജിറുകൾ മദീനയിൽ എത്തുന്നതിനു മുമ്പ് തന്നെ സത്യവിശ്വാസം സ്വീകരിക്കുകയും മദീനയിൽ താമസിക്കുകയും നാടുവിട്ട് വരുന്ന മുഹാജിറുകൾക്ക് താമസിക്കാൻ സ്വന്തം നാട്ടിൽ സാഹചര്യമൊരുക്കുകയും ചെയ്തവരാണ് അൻസാറുകൾ(സഹായികൾ)എന്ന് വിളിക്കപ്പെടുന്ന മദീനാ വാസികൾ.അവരിലുള്ള സാധുക്കൾക്കും നേരത്തേ പറഞ്ഞ ഫൈഇൽ അവകാശമുണ്ടെന്നാണിവിടെ പറയുന്നത് (അൻസാരികളിൽ ചിലർക്ക് നബി(സ)അതിൽ നിന്ന് നൽകി എന്ന് നേരത്തേ വിശദീകരിച്ചത് ഓർക്കുമല്ലോ) അൻസാരികളുടെ ചില ഗുണങ്ങളാണിതിൽ പരാമർശിക്കുന്നത്(സ്വന്തം നാട്ടിലേക്ക് വന്ന മുഹാജിറുകൾക്ക് ഇവിടെ നിന്ന് ലഭിച്ച സമ്പത്ത് നൽകുന്നതിൽ ഒരു വിഷമവും തോന്നിയില്ല എന്നത് അവർ പ്രശംസിക്കപ്പെടാനുള്ള വലിയ കാരണമാണെന്ന് ഇമാം റാസി എഴുതുന്നുണ്ട്) മുഹാജിറുകളെ അവർ സ്നേഹിക്കുന്നു.മുഹാജിറുകൾക്ക് നബി(സ)എന്ത് നൽകിയാലും അവർക്കതിൽ യാതൊരു അസൂയയോ വിഷമമോ ഇല്ല എന്നും സ്വന്തം ആവശ്യങ്ങൾ പോലും മാറ്റിവെച്ച് ഇവർക്ക് വേണ്ടി അവർ സഹായം ചെയ്യുന്നു എന്നൊക്കെയാണ് അൻസാരികളുടെ മഹത്വമായി പറയുന്നത്.ഇതിനൊക്കെ അത്ഭുതകരമായ ഉദാഹരണങ്ങൾ ചരിത്രത്തിലുണ്ട്(മദീനയിലേക്ക് വന്നവർക്ക് തങ്ങളുടെ സ്വത്ത് കൈമാറാനും സ്വന്തം ഭാര്യമാരെ മൊഴിചൊല്ലി അവർക്കൊരു കുടുംബജീവിതമുണ്ടാക്കിക്കൊടുക്കാൻ പോലും മദീനക്കാർ തയാറായിരുന്നു എന്ന് ചരിത്രം രേഖപ്പെടുത്തുന്നുണ്ട്)

ആർത്തിയോട്കൂടിയുള്ള പിശുക്കാണ് ശുഹ്ഹ് (شُحَّ) എന്ന് പറയുന്നത്.അതായത് മറ്റൊരാളുടെ അടുത്തുള്ളത് തനിക്ക് ലഭിക്കണമെന്ന് മോഹിക്കുകയും തന്റെ കൈയിലുള്ളത് ചെലവഴിക്കാതെ ലുബ്ദത കാണിക്കുകയും ചെയ്യുക എന്നാണ്. ഇബ്നു സൈദ് പറഞ്ഞതായി ഇമാം റാസി(റ) പറയുന്നു.ആരെങ്കിലും അള്ളാഹു വിലക്കിയതൊന്നും സ്വീകരിക്കാതിരിക്കുകയും കൊടുക്കാൻ കൽ‌പ്പിച്ചതൊന്നും തടഞ്ഞ് വെക്കാതിരിക്കുകയും ചെയ്താൽ മനസ്സിന്റെ പിശുക്കിൽ നിന്ന് അവൻ സംരക്ഷിക്കപ്പെട്ടു(റാസി)മനുഷ്യന്റെ ആത്മീയ നാശത്തിന്റെ കാരണമായി പിന്തുടരപ്പെടുന്ന ദേഹേഛയും അനുസരിക്കപ്പെടുന്ന പിശുക്കും സ്വയം മതിപ്പ് തോന്നലും നബി(സ)പഠിപ്പിച്ചിട്ടുണ്ട്

وَالَّذِينَ جَاؤُوا مِن بَعْدِهِمْ يَقُولُونَ رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلًّا لِّلَّذِينَ آمَنُوا رَبَّنَا إِنَّكَ رَؤُوفٌ رَّحِيمٌ (10

അവർക്ക് ശേഷം വന്നവർക്കുമുള്ളതാണ്.(ഈ ധനം) അവർ പറയും ഞങ്ങളുടെ രക്ഷിതാവേ!ഞങ്ങൾക്കും സത്യവിശ്വാസത്തോടെ മുൻ കഴിഞ്ഞു പോയ ഞങ്ങളുടെ സഹോദരങ്ങൾക്കും നീ പൊറുക്കേണമേ ഞങ്ങളുടെ ഹ്ര്‌ദയങ്ങളിൽ സത്യവിശ്വാസികളോട് ഒരു പകയും നീ ഉണ്ടാക്കരുതേ!ഞങ്ങളുടെ റബ്ബേ!നിശ്ചയം നീ വളരെ കൃപയുള്ളവനും പരമകാരുണികനുമാകുന്നു

ഫൈഇന്റെ അവകാശികളായ മൂന്നാം വിഭാഗമാണിവിടെ വിവരിക്കുന്നത് സഹാബികളുടെ ശിഷ്യന്മാരായ താബിഉകൾ ആണിവിടെ പ്രധാനമായും ഉദ്ദേശ്യം.അവരെ മാതൃകയാക്കി ജീവിക്കുന്ന അന്ത്യനാൾ വരെ വരുന്ന പിൻ ഗാമികളും ഇതിൽ പെടുന്നു.ഇങ്ങനെയുള്ള ദരിദ്രർക്കും അതാതുകാലങ്ങളിൽ ലഭിക്കുന്ന ഫൈഇൽ അവകാശമുണ്ടെന്ന് സാരം .ആ മുൻ ഗാമികൾവെട്ടിത്തെളിയിച്ച പാതയിൽ കൂടി അവരിൽ നിന്ന് ലഭിച്ച പ്രകാശത്തിന്റെ സഹായത്താലാണല്ലൊ പിൻഗാമികൾ മുന്നേറുന്നത്.അതിനാൽ അവരോടുള്ള സ്നേഹ ബഹുമാന സൂചകമായാണ് തങ്ങൾക്ക് വേണ്ടി പ്രാർത്ഥിക്കുന്നതോടൊപ്പം അവർക്കു വേണ്ടി കൂടി പ്രാർത്ഥിക്കുന്നത് .ആപുണ്യാത്മാക്കളോട് തങ്ങളുടെ ഹ്ര്‌ദയങ്ങളിൽ ഒരു വെറുപ്പും പകയും നൽകരുതെന്നും ആ പ്രാർത്ഥനയിൽ പറയുന്നു .ആ മുൻ ഗാമികളോട് സ്നേഹവും ബഹുമാനവുമുള്ളവരുടെ ഹൃദയത്തിൽ നിന്നും നാവിൽ നിന്നുമല്ലാതെ ഇത്തരമൊരു പ്രാർത്ഥന പുറപ്പെടുകയില്ല .മുൻ ഗാമികളെക്കുറിച്ച് മതിപ്പ് പ്രകടിപ്പിക്കുന്നതിൽ അസഹിഷ്ണുത പ്രകടിപ്പിക്കുന്നവർ കണിശമായും മാറിചിന്തിക്കേണ്ടിയിരിക്കുന്നു.ഇമാം റാസി(റ) എഴുതുന്നു ഈ സൂക്തം എല്ലാ സത്യ വിശ്വാസികളെയും ഉൾക്കൊള്ളുന്നുണ്ട്.കാരണം സത്യ വിശ്വാസികൾ ഒന്നുകിൽ മുഹാജിറുകളോ അൻസാറികളോ അല്ലെങ്കിൽ അവർക്ക് ശേഷം വന്നവരോ ആണല്ലോ.മുഹാജിറുകൾക്കും അൻസാറുകൾക്കും ശേഷം വന്നരുടെ സ്വഭാവമായി മുൻഗാമികളായ മുഹാജിർ/അൻസാറിനെ അവർ പ്രാർത്ഥന കൊണ്ടും അനുഗ്രഹ വാക്കുകൾ കൊണ്ടും ഓർക്കുന്നവരാണെന്നും ഇങ്ങനെ ചെയ്യാത്തവരും അവരെ ചീത്ത വാക്കുകളുമായി പരാമർശിക്കുകയും ചെയ്യുന്നവർ ഈ സൂക്തത്തിന്റെ വ്യക്തമായ താല്പര്യമനുസരിച്ച് സത്യവിശ്വാസികൾ എന്നതിന്റെ പുറത്താകുന്നു .മുൻഗാമികൾക്ക് പിഴവ് പറ്റിയെന്നും തങ്ങളാണ് ശരിയായ ആശയക്കാരെന്നുമൊക്കെ വിളിച്ചു കൂവുന്നവർ ഈ സൂക്തമൊന്നു മനസ്സിരുത്തി വായിച്ചെങ്കിൽ..എന്നാഗ്രഹിച്ചു പോവുകയാണ്.അള്ളാഹു മുൻഗാമികളെ ബഹുമാനിക്കുന്നവരിൽ നമ്മെ ഉൾപ്പെടുത്തട്ടെ ആമീൻ

ബാക്കി ഭാഗം അടുത്ത പോസ്റ്റില് ..ഇൻശാ അള്ളാഹ്