Monday, September 20, 2021

അദ്ധ്യായം 39 | സൂറത്ത് സുമർ سورة الزمر | ഭാഗം 09

അദ്ധ്യായം 39  | സൂറത്ത് സുമർ  سورة الزمر  | ക്കയിൽ അവതരിച്ചു | സൂക്തങ്ങൾ 75


(Part -9  -   സൂക്തം 68 മുതൽ 75 വരെ സൂക്തങ്ങളുടെ വിവരണം )

 

 

നബിതങ്ങൾ എല്ലാ രാത്രിയിലും ഈ സൂറത്ത് ഓതിയിരുന്നതായി ആയിശ ബീവി رضي الله عنهاപറയുന്നുണ്ടെന്ന് ഇമാം നസാഈ رحمة الله عليه റിപ്പോർട്ട് ചെയ്തിട്ടുണ്ട് (ഇബ്നുകസീർ)

 

بِسْمِ اللّهِ الرَّحْمـَنِ الرَّحِيمِ

 

പരമ കാരുണികനും കരുണാമയനുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

 

 


(69)
وَأَشْرَقَتِ الْأَرْضُ بِنُورِ رَبِّهَا وَوُضِعَ الْكِتَابُ وَجِيءَ بِالنَّبِيِّينَ وَالشُّهَدَاء وَقُضِيَ بَيْنَهُم بِالْحَقِّ وَهُمْ لَا يُظْلَمُونَ


ഭൂമി അതിന്റെ രക്ഷിതാവിന്റെ പ്രഭ കൊണ്ട് പ്രകാശിക്കുകയും ചെയ്യും (കർമങ്ങളുടെ) രേഖ വെക്കപ്പെടുകയും പ്രവാചകന്മാരും സാക്ഷികളും കൊണ്ടുവരപ്പെടുകയും ജനങ്ങൾക്കിടയിൽ സത്യപ്രകാരം വിധിക്കപ്പെടുകയും ചെയ്യും അവരോട് അനീതി കാണിക്കപ്പെടുകയില്ല



ജനങ്ങൾക്കിടയിൽ അന്ന് അള്ളാഹു വിധി പ്രഖ്യാപിക്കും അവൻ ഭൂമി പ്രകാശിപ്പിക്കുകയും ചെയ്യും. ഓരോരുത്തരുടെയും ജീവിത ഡയറി ഹാജറാക്കപ്പെടുകയും വിചാരണ നടത്തി പ്രതിഫലം നിശ്ചയിക്കപ്പെടുകയും ചെയ്യും നബിമാരും സാക്ഷികളും സന്നിഹിതരാവുകയും ആ നബിമാരോട് അവർ ചെയ്ത പ്രബോധനത്തിനു അനുയായികൾ നടത്തിയ പ്രതികരണം എന്തായിരുന്നുവെന്ന് അള്ളാഹു ചോദിക്കുകയും പൂർവീക നബിമാരുടെ പ്രബോധനത്തെ പരാചിതരായ ആളുകൾ നിഷേധിക്കുകയും ഞങ്ങൾക്ക് ഇവർ ഒരു സന്ദേശവും എത്തിച്ചു തന്നിരുന്നില്ല എന്ന് ആരോപിക്കുകയും ചെയ്യുമ്പോൾ ആ നബിമാർ പ്രബോധനം ചെയ്തിട്ടുണ്ടെന്നും ഇവർ നിഷേധിക്കുകയായിരുന്നു ചെയ്തിരുന്നതെന്നും മുത്ത് നബി ന്റെ ഉമ്മത്ത് സാക്ഷ്യം വഹിക്കുകയും ചെയ്യും (നബി തങ്ങളുടെ സമുദായമാണിവിടെ സാക്ഷികൾ. നബിമാർക്ക് അനുകൂലമായി  അവരുടെ സാക്ഷ്യം സ്വീകരിക്കപ്പെടും) ഇവിടെ പറഞ്ഞ ശുഹദാക്കൾ അള്ളാഹുവിന്റെ മാർഗത്തിൽ ജീവ ത്യാഗം  ചെയ്തവരാണ് എന്ന അഭിപ്രായവുമുണ്ട് എന്തായാലും എല്ലാ വിഭാഗം ആളുകൾക്കിടയിലും നീതി നിഷ്ഠമായി അള്ളാഹു വിധിക്കുന്നതാണ് ചെയ്യാത്ത കുറ്റം അടിച്ചേല്പിക്കപ്പെട്ടു കൊണ്ടോ മറ്റോ ആരും അക്രമിക്കപ്പെടുകയില്ല (ഥിബ്‌രി)


ഭൂമി പ്രകാശിക്കുമെന്നതിനു നീതിയുടെ പ്രകാശം പരക്കുമെന്നും അനീതി ഇരുട്ടാണെന്നും വ്യാഖ്യാനമുണ്ട് സാക്ഷികൾ കൊണ്ട് വിവക്ഷ നബി
തങ്ങളുടെ സമുദായമാണെന്നും രക്ത സാക്ഷികൾ ദീനീ പ്രബോധനത്തിൽ സഹായിച്ചവർക്കനുകൂലമായി സാക്ഷി നിൽക്കുമെന്നും മനുഷ്യരുടെ പ്രവർത്തനങ്ങൾ കണ്ടു കൊണ്ടിരുന്ന കാവൽ മാലാഖമാർ ആ പ്രവർത്തനങ്ങളുടെ മേലിൽ സാക്ഷികളാകുമെന്നും വ്യാഖ്യാനമുണ്ട്. അവിടെ സത്യവും നീതിയും അനുസരിച്ച്  അള്ളാഹു വിധിക്കുമ്പോൾ നന്മകൾ ചുരുക്കപ്പെടുകയോ ഇല്ലാത്ത തിന്മകൾ വർദ്ധിപ്പിക്കപ്പെടുകയോ ഇല്ല (ഖുർതുബി)


ഇവിടെ ഭൂമി പ്രകാശിക്കുമെന്ന് പറഞ്ഞത് മഹ്‌ശറിലെ അവസ്ഥയാണ് (ബഗ്‌വി)


(70)
وَوُفِّيَتْ كُلُّ نَفْسٍ مَّا عَمِلَتْ وَهُوَ أَعْلَمُ بِمَا يَفْعَلُونَ


ഓരോ വ്യക്തിക്കും താൻ പ്രവർത്തിച്ചത് നിറവേറ്റിക്കൊടുക്കപ്പെടുകയും ചെയ്യും അവർ പ്രവർത്തിക്കുന്നതിനെപ്പറ്റി അവൻ നല്ലവണ്ണം അറിയുന്നവനത്രെ

ഓരോരുത്തരുടെ പ്രവർത്തനങ്ങളും സാക്ഷികളില്ലാതെ/എഴുതിവെച്ച രേഖകളില്ലാത  തന്നെ വിശദമായി അള്ളാഹു അറിയുന്നവനാണ്. അതിന്റെ അടിസ്ഥാനത്തിൽ കൃത്യമായ പ്രതിഫലം അവൻ നൽകും സാക്ഷികളും ഗ്രന്ഥവുമെല്ലാം അവിടെ കൊണ്ടു വരുന്നത് തെളിവുകൾ നൽകി അക്രമികളെ പ്രതിസന്ധിയിലാക്കാനാണ് (ഖുർതുബി)

 


(71)
وَسِيقَ الَّذِينَ كَفَرُوا إِلَى جَهَنَّمَ زُمَرًا حَتَّى إِذَا جَاؤُوهَا فُتِحَتْ أَبْوَابُهَا وَقَالَ لَهُمْ خَزَنَتُهَا أَلَمْ يَأْتِكُمْ رُسُلٌ مِّنكُمْ يَتْلُونَ عَلَيْكُمْ آيَاتِ رَبِّكُمْ وَيُنذِرُونَكُمْ لِقَاء يَوْمِكُمْ هَذَا قَالُوا بَلَى وَلَكِنْ حَقَّتْ كَلِمَةُ الْعَذَابِ عَلَى الْكَافِرِينَ


സത്യ നിഷേധികൾ കൂട്ടം കൂട്ടമായി നരകത്തിലേക്ക് നയിക്കപ്പെടുകയും ചെയ്യും അങ്ങനെ അവർ അതിനടുത്ത് വന്നാൽ അതിന്റെ വാതിലുകൾ തുറക്കപ്പെടും നിങ്ങൾക്ക് നിങ്ങളുടെ രക്ഷിതാവിന്റെ ദൃഷ്ടാന്തങ്ങൾ ഓതി കേൾപിക്കുകയും നിങ്ങൾക്കുള്ളതായ ഈ ദിവസത്തെ കണ്ടുമുട്ടുന്നതിനെ പറ്റി നിങ്ങൾക്ക് താക്കീത് നൽകുകയും ചെയ്യുന്ന നിങ്ങളുടെ കൂട്ടത്തിൽ നിന്നു തന്നെയുള്ള ദൂതന്മാർ നിങ്ങളുടെ അടുക്കൽ വന്നിട്ടില്ലേ എന്ന് അതിന്റെ (നരകത്തിന്റെ) കാവൽക്കാർ അവരോട് ചോദിക്കുകയും ചെയ്യും .അവർ പറയും അതെ.
പക്ഷെ സത്യ  നിഷേധികളുടെ മേൽ ശിക്ഷയുടെ വചനം സ്ഥിരപ്പെട്ടുപോയി

ഇബ്നുകസീർ رحمة الله عليه എഴുതുന്നു പരാചിതരും നിഷേധികളുമായ ജനങ്ങൾ എങ്ങനെയാണ് നരകത്തിലേക്ക് തെളിക്കപ്പെടുന്നത് എന്ന് വിവരിക്കുകയാണ് അള്ളാഹു. അവർ വളരെ കർശനമായും താക്കീതു നൽകപ്പെട്ടും ദാഹിച്ച് വലഞ്ഞും കണ്ണു കാണാതെയും കാതു കേൾക്കാതെയും സംസാര ശേഷിയില്ലാതെയും മുഖത്തിന്റെ മേലിൽ വലിച്ചിഴച്ചും മറ്റും കൂട്ടം കൂട്ടമായി നരകത്തിലേക്ക് നയിക്കപ്പെടും. അവർ നരകത്തിനടുത്തെത്തുമ്പോൾ താമസം വിനാ നരക കവാടങ്ങൾ തുറക്കപ്പെടും ശിക്ഷ അനുഭവിക്കാനുള്ള സമയം അല്പം പോലും നഷ്ടപ്പെടാതിരിക്കാനാണിത്. അവിടെ മറ്റൊരു ശിക്ഷ എന്ന നിലക്ക് നരകത്തിന്റെ കാവൽക്കാരായ മലക്കുകളുടെ ചോദ്യം ഇത്തരം ദുരവസ്ഥയിൽ വന്നു പെടാതിരിക്കാനുള്ള ഉൽബോധനവും ഉപദേശവും നിങ്ങൾക്ക് നൽകാൻ ദൈവ ദൂതന്മാർ വന്നിരുന്നില്ലേ എന്ന്. വന്നിരുന്നു പക്ഷെ ഞങ്ങൾ അവരെ പരിഗണിക്കാൻ തയാറായില്ല അത് ഞങ്ങളുടെ പരാജയം ഉറപ്പാക്കി എന്ന് അവർ വലിയ നിരാശയോടെ മറുപടി പറയും (ഇബ്നുകസീർ)



(72)
قِيلَ ادْخُلُوا أَبْوَابَ جَهَنَّمَ خَالِدِينَ فِيهَا فَبِئْسَ مَثْوَى الْمُتَكَبِّرِينَ


(അവരോട്) പറയപ്പെടും നിങ്ങൾ നരകത്തിന്റെ വാതിലുകളിലൂടെ പ്രവേശിക്കുക നിങ്ങളതിൽ നിത്യവാസികളായിരിക്കും എന്നാൽ അഹങ്കാരികളുടെ പാർപ്പിടം എത്ര ചീത്ത

ഇബ്നു കസീർ رحمة الله عليهഎഴുതുന്നു.അവരോട് പറയപ്പെടും എന്ന് പറഞ്ഞാൽ അവരുടെ അവസ്ഥ അറിയുന്ന ആരും പറഞ്ഞു പോകും നിങ്ങൾ നരക കവാടത്തിലൂടെ അകത്ത് പ്രവേശിക്കുക നിങ്ങൾ നീതിമാനായ നാഥന്റെ വിധിയനുസരിച്ച് നരകത്തിനു അർഹർ തന്നെ ഒരിക്കലും ഇതിൽ നിന്ന് പുറത്ത് കടക്കാമെന്ന പ്രതീക്ഷയില്ലാതെ വേണം നിങ്ങളതിൽ പ്രവേശിക്കാൻ. സത്യം വ്യക്തമായിട്ടും അത് അംഗീകരിക്കാൻ തയാറാവാത്ത അഹങ്കാരമാണ് നിങ്ങളെ ഇവിടെ എത്തിച്ചത് നിങ്ങളുടെ അവസ്ഥയും അഭയ സ്ഥാനവും വളരെ മോശം തന്നെ (ഇബ്നുകസീർ)
തീയിന്റെ ദണ്ഢുകളുപയോഗിച്ച് കാവൽക്കാരായ മലക്കുകൾ അവരെ നരകത്തിലേക്ക് തള്ളി വിടും ഒരു തള്ളലിൽ തന്നെ റബീഅ:
മുളർ (ധാരാളം ജനസംഘ്യയുള്ള രണ്ട് അറബ് ഗോത്രങ്ങൾ) ഗോത്രക്കാരുടെ എണ്ണം നരകത്തിലെത്തും (ഖുർതുബി)

 


(73)
وَسِيقَ الَّذِينَ اتَّقَوْا رَبَّهُمْ إِلَى الْجَنَّةِ زُمَرًا حَتَّى إِذَا جَاؤُوهَا وَفُتِحَتْ أَبْوَابُهَا وَقَالَ لَهُمْ خَزَنَتُهَا سَلَامٌ عَلَيْكُمْ طِبْتُمْ فَادْخُلُوهَا خَالِدِينَ


തങ്ങളുടെ രക്ഷിതാവിനെ സൂക്ഷിച്ച് ജീവിച്ചവർ സ്വർഗത്തിലേക്ക് കൂട്ടം കൂട്ടമായി നയിക്കപ്പെടും അങ്ങനെ അതിന്റെ കവാടങ്ങൾ തുറന്ന് വെക്കപ്പെട്ട നിലയിൽ അവർ അതിന്നടുത്ത് വരുമ്പോൾ അവരോട് അതിന്റെ കാവൽക്കാർ പറയും.നിങ്ങൾക്ക് സമാധാനം.
നിങ്ങൾ സംശുദ്ധരായിരിക്കുന്നു അതിനാൽ നിത്യവാസികളെന്ന നിലയിൽ നിങ്ങൾ അതിൽ പ്രവേശിച്ചു കൊള്ളുക

ഇബ്നുകസീർ رحمة الله عليه എഴുതുന്നു വിശ്വാസികളും വിജയികളുമായ ആളുകളുടെ അവസ്ഥ അള്ളാഹു വിവരിക്കുകയാണ്. അവർ സംഘം സംഘമായി സ്ഥാന വ്യത്യാസമനുസരിച്ച് അവരവരുടെ അതേ സ്ഥാനത്തുള്ളവരോടൊപ്പം ആദ്യം നബിമാർ, പിന്നെ സിദ്ധീഖുകൾ, ശുഹദാക്കൾ, ഉലമാക്കൾ ഇങ്ങനെ സ്വർഗ കവാടത്തിലേക്ക് നയിക്കപ്പെടും നരകക്കാരെ നിർദാക്ഷിണ്യം തെളിച്ചു കൊണ്ടു പോവുകയായിരുന്നുവെങ്കിൽ ഇവരെ അതിഥികൾക്ക് നൽകപ്പെടുന്ന പരിഗണയിലാണ് ആനയിക്കപ്പെടുന്നത്. സിറാഥ് പാലം കടന്ന ശേഷം സ്വർഗ നരകത്തിനിടയിൽ അവർ തടഞ്ഞു നിർത്തപ്പെടുകയും ഭൂമിയിൽ അവർക്കിടയിലുണ്ടായിരുന്ന എന്തെങ്കിലും പ്രശ്നങ്ങൾക്ക് പ്രതിക്രിയ നൽകപ്പെടാനുണ്ടെങ്കിൽ അത് നൽകി അവർ ശുദ്ധമാക്കപ്പെടുകയും രേഖകൾ പൂർണമായി ശരിയാക്കപ്പെടുകയും ചെയ്ത് സ്വർഗ പ്രവേശനത്തിനു അനുമതി നൽകപ്പെടും അങ്ങനെ സ്വർഗ കവാടങ്ങൾക്കടുത്ത് എത്തുമ്പോൾ അവർ പ്രവേശനാനുമതി ആര് ചോദിക്കണം എന്നത് സംബന്ധമായി കൂടിയാലോചന നടത്തും ആദം, നൂഹ്, ഇബ്‌റാഹീം, മൂസാ, ഈസാ عليهم الصلاة والسلام, മുഹമ്മദ് നബി എന്നിങ്ങനെ മഹ്‌ശറിൽ വെച്ച് സഹായം തേടിയ ക്രമത്തിൽ അവർ നബിമാരെ സമീപിക്കും നബി തങ്ങളുടെ സ്ഥാന വലിപ്പം ഒന്നു കൂടി പ്രകടമാക്കാനാണിത്.അങ്ങനെ സ്വർഗ പ്രവേശനാനുമതി ആദ്യമായി ചോദിക്കാൻ ആ നബിമാരെല്ലാം വിസമ്മതിക്കുകയും നബി തങ്ങൾ അത് നിർവഹിക്കുകയും ചെയ്യും സ്വർഗ വാതിൽ ആദ്യമായി മുട്ടുന്നത് ഞാനായിരിക്കും എന്ന നബി വനം ഇത് സ്ഥിരീകരിക്കുന്നുണ്ട് അങ്ങനെ വിശ്വാസികൾ സ്വർഗത്തിൽ പ്രവേശിക്കുമ്പോൾ കാവൽക്കാർ നിങ്ങൾക്ക് സമാധാനം.നിങ്ങൾ സംശുദ്ധരായിരിക്കുന്നു അതിനാൽ നിത്യവാസികളെന്ന നിലയിൽ നിങ്ങൾ അതിൽ പ്രവേശിച്ചു കൊള്ളുക എന്ന് ആശംസിക്കും (ഇബ്നുകസീർ)


(74)
وَقَالُوا الْحَمْدُ لِلَّهِ الَّذِي صَدَقَنَا وَعْدَهُ وَأَوْرَثَنَا الْأَرْضَ نَتَبَوَّأُ مِنَ الْجَنَّةِ حَيْثُ نَشَاء فَنِعْمَ أَجْرُ الْعَامِلِينَ


അവർ പറയും നമ്മളോടുള്ള തന്റെ വാഗ്‌ദാനം സത്യമായി പാലിക്കുകയും സ്വർഗത്തിൽ നിന്ന് നാം ഉദ്ദേശിക്കുന്ന സ്ഥലത്ത് നമുക്ക് താമസിക്കാവുന്ന വിധം ഈ (സ്വർഗ) ഭൂമി നമുക്ക് അവകാശപ്പെടുത്തിത്തരികയും ചെയ്ത
അള്ളാഹുവിനു സ്തുതി. അപ്പോൾ പ്രവർത്തിച്ചവർക്കുള്ള പ്രതിഫലം എത്ര വിശിഷ്ടം!

സ്വർഗത്തിലെ സംവിധാനങ്ങൾ കാണുന്ന വിശ്വാസികളുടെ സന്തോഷ പ്രകടനമാണിത് അള്ളാഹു നമുക്ക് ഭാഗ്യം നൽകട്ടെ ആമീൻ


(75)
وَتَرَى الْمَلَائِكَةَ حَافِّينَ مِنْ حَوْلِ الْعَرْشِ يُسَبِّحُونَ بِحَمْدِ رَبِّهِمْ وَقُضِيَ بَيْنَهُم بِالْحَقِّ وَقِيلَ الْحَمْدُ لِلَّهِ رَبِّ الْعَالَمِينَ


മലക്കുകൾ തങ്ങളുടെ രക്ഷിതാവിനെ സ്തുതിക്കുന്നതോടൊപ്പം കീർത്തനം ചെയ്തു കൊണ്ട് സിംഹാസനത്തിന്റെ ചുറ്റും വലയം ചെയ്യുന്നതായി തങ്ങൾക്ക് കാണാം അവർക്കിടയിൽ സത്യപ്രകാരം വിധി കല്പിക്കപ്പെടും ലോക രക്ഷിതാവായ അള്ളാഹുവിനു സ്തുതി എന്ന് പറയപ്പെടുകയും ചെയ്യും

സ്വർഗക്കാരുടെയും നരകക്കാരുടെയും അവസ്ഥ വിവരിച്ചപ്പോൾ മലക്കുകളുടെ അവസ്ഥ കൂടി അള്ളാഹു വിവരിക്കുകയാണ് അവർ അള്ളാഹുവെ സ്തുതിച്ച് കൊണ്ട് അർശിനു ചുറ്റും വലയം ചെയ്യും
ഇമാം ബഗ്‌വി
رحمة الله عليهഎഴുതുന്നുമലക്കുകൾ അർശിനു ചുറ്റും വലയം ചെയ്യുന്നത് അള്ളാഹുവിന്റെ പരിശുദ്ധി വാഴ്ത്തിയും അവനെ സ്തുതിച്ചു കൊണ്ടുമായിരിക്കും. ഈ സ്തുതി വാചകങ്ങൾ ഉരുവിടുന്നത് അവർക്ക് അത് ആനന്ദകരം എന്ന നിലയിലാണ് അല്ലാതെ ഒരു കല്പനയുടെ ഭാഗമായിട്ടല്ല കാരണം കല്പനയുടെയും കീർത്തനങ്ങളുടെയും ലോകം അതല്ലല്ലോ എന്ന് അഭിപ്രായമുണ്ട് (ബഗ്‌വി)


ലോക രക്ഷിതാവിനു സ്തുതി എന്ന് പറയപ്പെടുന്നത് സ്വർഗാവകാശികൾ സ്വർഗത്തിലെത്തി
അള്ളാഹുവിന്റെ വാഗ്‌ദാനം പൂർത്തിയായി എന്ന് മനസ്സിലാകുമ്പോഴാണ് (ബഗ്‌വി)


സൃഷ്ടിപ്പിന്റെ വിവരണത്തെ സ്തുതി കൊണ്ടാണ്
അള്ളാഹു ആരംഭിച്ചത് (ആറാം അദ്ധ്യായം, അൻആം ഒന്നാം വാക്യം.

الْحَمْدُ لِلّهِ الَّذِي خَلَقَ السَّمَاوَاتِ وَالأَرْضَ وَجَعَلَ الظُّلُمَاتِ وَالنُّورَ ثُمَّ الَّذِينَ كَفَرُواْ بِرَبِّهِم يَعْدِلُونَ

(ആകാശങ്ങളും ഭൂമിയും സൃഷ്ടിക്കുകയും ഇരുട്ടുകളും വെളിച്ചവും ഉണ്ടാക്കുകയും ചെയ്ത അള്ളാഹുവിന്നാകുന്നു സ്തുതി. എന്നിട്ടുമതാ സത്യ നിഷേധികൾ തങ്ങളുടെ രക്ഷിതാവിനു സമന്മാരെ വെക്കുന്നു .അൻആം.1 ) എല്ലാ വിധി പ്രസ്താവങ്ങളും നീതി പൂർവം അവസാനിപ്പിച്ച് പരലോക ജീവിതം തുടങ്ങുന്നതിനെയും സ്തുതി കൊണ്ട് അള്ളാഹു അവസാനിപ്പിച്ചിരിക്കുന്നു (ഥബ്‌രി/ഖുർതുബി/ബഗ്‌വി/ഇബ്നുകസീർ)


അള്ളാഹു നമ്മെയെല്ലാം സ്വർഗാവകാശികളിൽ ഉൾപ്പെടുത്തട്ടെ ആമീൻ

Monday, September 13, 2021

അദ്ധ്യായം 39 | സൂറത്ത് സുമർ سورة الزمر | ഭാഗം 08

അദ്ധ്യായം 39  | സൂറത്ത് സുമർ  سورة الزمر  | ക്കയിൽ അവതരിച്ചു | സൂക്തങ്ങൾ 75


(Part -8  -   സൂക്തം 62മുതൽ 68 വരെ സൂക്തങ്ങളുടെ വിവരണം )

 

 

നബിതങ്ങൾ എല്ലാ രാത്രിയിലും ഈ സൂറത്ത് ഓതിയിരുന്നതായി ആയിശ ബീവി رضي الله عنهاപറയുന്നുണ്ടെന്ന് ഇമാം നസാഈ رحمة الله عليه റിപ്പോർട്ട് ചെയ്തിട്ടുണ്ട് (ഇബ്നുകസീർ)

 

بِسْمِ اللّهِ الرَّحْمـَنِ الرَّحِيمِ

 

പരമ കാരുണികനും കരുണാമയനുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടിക്കൊണ്ട് ഞാൻ ആരംഭിക്കുന്നു

 

(62)
اللَّهُ خَالِقُ كُلِّ شَيْءٍ وَهُوَ عَلَى كُلِّ شَيْءٍ وَكِيلٌ


അല്ലാഹു എല്ലാ വസ്തുക്കളുടെയും സൃഷ്ടാവാകുന്നു അവൻ എല്ലാ വസ്തുക്കളുടെ മേലും കൈകാര്യ കർത്താവുമാകുന്നു


അള്ളാഹു എല്ലാ വസ്തുക്കളെയും പടക്കുകയും അതിന്റെ നിയന്ത്രണവും അധികാരവും ഏറ്റെടുക്കുകയും ചെയ്യുന്നു അവയിലെല്ലാം എന്തൊക്കെ നടക്കണമെന്ന് അവൻ തീരുമാനിക്കുകയും അവയെ സംരക്ഷിക്കുന്ന കാര്യം അവൻ നടപ്പാക്കുകയും ചെയ്യുന്നു.അത് കൊണ്ട് ആരാധിക്കപ്പെടുക എന്ന വിശേഷണത്തിനു അവൻ മാത്രമാണ് അർഹൻ.ഒന്നിന്റെയും ഒരു നിയന്ത്രണാധികാരവുമില്ലാത്ത വസ്തുക്കളെ ആരാധിക്കുന്നത് എത്രമാത്രം തെറ്റായ നിലപാടാണാണ് എന്നത് ചിന്തനീയം തന്നെ


(63)
لَهُ مَقَالِيدُ السَّمَاوَاتِ وَالْأَرْضِ وَالَّذِينَ كَفَرُوا بِآيَاتِ اللَّهِ أُوْلَئِكَ هُمُ الْخَاسِرُونَ


ആകാശങ്ങളുടെയും ഭൂമിയുടെയും താക്കോലുകൾ അവന്റെ അധീനത്തിലാകുന്നു
അള്ളാഹുവിന്റെ ദൃഷ്ടാന്തങ്ങളെ നിഷേധിച്ചവരാരോ അവർ തന്നെയാകുന്നു നഷ്ടക്കാർ


അകാശ, ഭൂമികളുടെ ഖജനാവുകളുടെ താക്കോൽ അള്ളാഹുവിങ്കലാണ് അഥവാ ആ ഖജനാവിൽ നിന്ന് ആർക്കെല്ലാം എന്തെല്ലാം കൊടുക്കണം എന്ന് അവനാണ് തീരുമാനിക്കുന്നത് ചിലർക്ക് അവൻ ധാരാളമായി നൽകുന്നു ചിലർക്ക് നൽകാതിരിക്കുന്നു ഇതിലൊന്നും മറ്റാർക്കും യാതൊരു കാര്യവുമില്ല.സ്പഷ്ടമായ തെളിവുകൾ അള്ളാഹു നൽകിയിട്ടും അതെല്ലാം നിഷേധിക്കുകയും തള്ളിപ്പറയുകയും ചെയ്യുന്നവർ അവരുടെ ഭാഗ്യം നഷ്ടപ്പെടുത്തിയവരാണ് കാരണം പരലോകത്ത് അവർ സാശ്വതമായി നരകത്തിൽ പ്രവേശിപ്പിക്കപ്പെടുകയും ഭൂമിയിൽ വിശ്വാസത്തിൽ നിന്ന് പിന്തിരിയുക വഴി പരാചയം സമ്മതിക്കുകയും ചെയ്തിരിക്കുന്നു (ഥിബ്‌രി)
ഇമാം ബൈഹഖി
رحمة الله عليه ഇബ്നു ഉമറി رضي الله عنهൽ നിന്ന് ഉദ്ധരിക്കുന്നു ഉസ്മാൻ ബിൻ അഫ്ഫാൻ رضي الله عنه നബി തങ്ങളോട് എന്താണ് ആകാശ, ഭൂമികളുടെ താക്കോൽ എന്ന് ചോദിച്ചു അപ്പോൾ നബി തങ്ങൾ പറഞ്ഞു ഇത് ആരും (നിങ്ങൾക്ക് മുമ്പ്) എന്നോട് ചോദിച്ചിട്ടില്ല  

لااله الاالله والله أكبر وسبحان الله وبحمده أستغفر الله ولاحول ولاقوة الابالله العلي العظيم هو الأول والاخر والظاهر والباطن يحيي ويميت بيده الحيروهو علي كل شيء قدير

 

ഇതാണത്. ആരെങ്കിലും രാവിലെയും വൈകുന്നേരവും പത്തു തവണ വീതം ഇവ ചൊല്ലിയാൽ ആറ് കാര്യങ്ങൾ അള്ളാഹു അവനു നൽകുന്നതാണ് (1) ഇബ്‌ലീസിൽ നിന്ന് അവൻ സംരക്ഷിക്കപ്പെടും (2) പന്ത്രണ്ടായിരം മലക്കുകൾ അവന്റെ അടുത്ത് സന്നിഹിതരാകും (3) ഒരു കൂമ്പാരം പ്രതിഫലം അവനു നൽകപ്പെടും (4) അവന് ഒരു പദവി ഉയർത്തപ്പെടും (5) അള്ളാഹു സ്വർഗസ്ത്രീകളെ അവനു വിവാഹം ചെയ്തു കൊടുക്കും (6) എല്ലാ വേദഗ്രന്ഥങ്ങളും (ഖുർആൻ, തൌറാത്ത്, ഇഞ്ചീൽ, സബൂർ) പരായണം ചെയ്തവനെ പോലെ പ്രതിഫലം അവനു നൽകപ്പെടും ഹജ്ജും ഉംറയും നിർവഹിച്ച് അത് സ്വീകരിക്കപ്പെട്ടവനു നൽകുന്നത് പോലുള്ള പ്രതിഫലത്തിന്നും അവൻ അർഹനാകും. ഇത് പാരായണം ചെയ്ത രാത്രിയിൽ അവൻ മരണപ്പെട്ടാൽ അവൻ രക്ത സാക്ഷിയായി മരിക്കുന്നതാണ് (ഖുർതുബി/ഇബ്നുകസീർ) ഇത്രയും പ്രാധാന്യമുള്ള ഈ വാക്യങ്ങൾ പാരായണം ചെയ്യാൻ ശ്രദ്ധിക്കുമല്ലോ
ആകാശ ഭൂമികളുടെ താക്കോൽ
അള്ളാഹുവിന്റെ അധീനത്തിലാണ് എന്ന് പറഞ്ഞാൽ അതെല്ലാം നിയന്ത്രിക്കുന്നതും കൈകാര്യം ചെയ്യുന്നതും അവനാണ് എന്ന് സാരം ആ കുറ്റമറ്റ നിയന്ത്രണം നിരന്തരം നാമെല്ലാം കണ്ടു കൊണ്ടിരിക്കുന്നു എന്നിട്ടും അള്ളാഹുവെ നിഷേധിക്കാൻ മുതിരുന്നവർ എത്രവലിയ നിഷേധികളാണ് അവർ ആത്യന്തികമായി പരാജയം ഏറ്റെടുത്തവർ തന്നെ എന്നാണിവിടെ പറയുന്നത് (റാസി)


(64)
قُلْ أَفَغَيْرَ اللَّهِ تَأْمُرُونِّي أَعْبُدُ أَيُّهَا الْجَاهِلُونَ


(നബിയേ) പറയുക
,ഹേ വിവരം കെട്ടവരേ! അപ്പോൾ അള്ളാഹു അല്ലാത്തവരെ ഞാൻ ആരാധിക്കണമെന്നാണോ നിങ്ങൾ എന്നോട് കല്പിക്കുന്നത്?

മക്കയിലെ അവിശ്വാസികൾ നബി തങ്ങളെ അവരുടെ പാരമ്പര്യ വിശ്വാസത്തിലേക്ക് ക്ഷണിച്ചപ്പോഴാണ് ഈ സൂക്തം അവതരിച്ചത് (ബഗ്‌വി)
ഇബ്നു അബ്ബാസ്
رضي الله عنه പറഞ്ഞു മക്ക മുശ്‌രിക്കുകൾ അവരുടെ വിവരദോഷം കാരണത്താൽ നബി തങ്ങളെ അവരുടെ ആരാധ്യ വസ്തുക്കളെ ആരാധിക്കാൻ ക്ഷണിക്കുകയും എന്നാൽ അള്ളാഹുവിനെ അവർ കൂടി  ആരാധിക്കുമെന്ന ഒരു ഒത്തുതീർപ്പ് ഉണ്ടാക്കാമെന്ന് പറയുകയും ചെയ്തതിനുള്ള മറുപടിയാണിത് ഹേ വിവരമില്ലാത്തവരേ! എല്ലാം സൃഷ്ടിച്ച് പരിപാലിക്കുന്ന എല്ലാ കഴിവിന്റെയും കാര്യത്തിന്റെയും ഉടമയായ അള്ളാഹുവിനു പുറമെ ഒരു കഴിവുമില്ലാത്തവരെ ഞാൻ ആരാധിക്കണമെന്നാണോ നിങ്ങൾ എന്നോട് കല്പിക്കുന്നത്. അഥവാ ഞാൻ അതിനു സന്നദ്ധനല്ല തന്നെ എന്ന് സാരം (ഇബ്നുകസീർ)
അപ്പോൾ നിലവിൽ അവർ
അള്ളാഹുവിനെ ആരാധിക്കുന്നില്ലെന്നും ഒത്തു തീർപ്പ് വ്യവസ്ഥയുടെ ഭാഗമായി ആരാധിക്കുന്നത് ആലോചിക്കാമെന്നുമാണ് അവർ പറയുന്നത്. ഇതാണവരുടെ അവസ്ഥ എന്നിരിക്കെ അവർക്ക് അള്ളാഹുവിൽ വിശ്വാസമുണ്ടായിരുന്നു എന്ന് പറയുന്നവരുടെ അവസ്ഥ എത്ര ദയനീയം!


(65)
وَلَقَدْ أُوحِيَ إِلَيْكَ وَإِلَى الَّذِينَ مِنْ قَبْلِكَ لَئِنْ أَشْرَكْتَ لَيَحْبَطَنَّ عَمَلُكَ وَلَتَكُونَنَّ مِنَ الْخَاسِرِينَ


നിശ്ചയമായും തങ്ങൾക്കും തങ്ങളുടെ മുമ്പുള്ളവർക്കും സന്ദേശം നൽകപ്പെട്ടിട്ടുളത് ഇതത്രെ! (
അള്ളാഹുവിനു) തങ്ങൾ പങ്കാളികളെ സ്ഥാപിച്ചാൽ തീർച്ച അങ്ങയുടെ കർമം നിഷ്ഫലമായിപ്പോകുകയും അങ്ങ് നഷ്ടക്കാരുടെ കൂട്ടത്തിൽ ആകുകയും ചെയ്യും


അള്ളാഹു മാത്രമാണ് ആരാധനക്കർഹൻ, ഈ സന്ദേശം എല്ലാ നബിമാരിലേക്കും നൽകിയ അള്ളാഹു അതിനു വിരുദ്ധമായി അള്ളാഹു അല്ലാത്തവരെ ആരാധിച്ചാൽ -ശിർക്ക് ചെയ്താൽ- അഥവാ അതേ നിലപാടിലായി മരണപ്പെട്ടാൽ ചെയ്ത സുകൃതങ്ങളെല്ലാം നിശ്‌ഫലമാകും. പരായം വരികയും ചെയ്യും അത്തരം അക്രമം ആരിൽ നിന്നുണ്ടായാലും സ്ഥിതി ഇതു തന്നെയാണ് എന്ന് ഉണർത്തിയിരിക്കുകയാണ്. നബി തങ്ങളോടാണ് സംബോധനയെങ്കിലും അവിടുത്തെ സമൂഹത്തെ ഉൽബോധിപ്പിക്കലാണ് ലക്ഷ്യം. കാരണം നബി തങ്ങളിൽ നിന്ന് ശിർക്ക് പോയിട്ട് ഒരു ചെറു തെറ്റ് പോലും വരാത്ത വിധം അള്ളാഹു സംരക്ഷണം നൽകിയവരാണ്. ശിർക്കിന്റെ ഗൌരവം ചൂണ്ടിക്കാണിക്കലും ഇവിടെ പ്രധാനം തന്നെയാണ്



(66)
بَلِ اللَّهَ فَاعْبُدْ وَكُن مِّنْ الشَّاكِرِينَ

 

അല്ല. അള്ളാഹുവെ തന്നെ അങ്ങ് ആരാധിക്കുകയും നന്ദിയുള്ളവരുടെ കൂട്ടത്തിൽ ആവുകയും ചെയ്യുക



തങ്ങളുടെ ജനതയുടെ വാക്ക് കേട്ട് ശിർക്ക് ചെയ്യുന്നത് ചിന്തിക്കുക പോലും വേണ്ട അള്ളാഹുവെ മാത്രം ആരാധിച്ചും അവന്റെ അനുഗ്രഹങ്ങൾക്ക് നന്ദി ചെയ്തും ജീവിതം വിജയപ്രദമാക്കുക. നബി തങ്ങൾ ഇത് ഭംഗിയായി നിർവഹിക്കുകയും ചെയ്ത. കാലിൽ നീരു വന്ന് വീർക്കുന്നത് വരെ ദീർഘമായി നിന്ന് നിസ്ക്കരിച്ച തങ്ങളോട് പത്നി  ചോദിച്ചല്ലൊ എന്തിനാണിത്രയും കഷ്ടപ്പെടുന്നത് എന്ന്. അവിടുത്തെ ഉത്തരം ഞാൻ നന്ദിയുള്ള അടിമയാവണ്ടയോ ആഇശാ എന്നായിരുന്നു


(67)
وَمَا قَدَرُوا اللَّهَ حَقَّ قَدْرِهِ وَالْأَرْضُ جَمِيعًا قَبْضَتُهُ يَوْمَ الْقِيَامَةِ وَالسَّماوَاتُ مَطْوِيَّاتٌ بِيَمِينِهِ سُبْحَانَهُ وَتَعَالَى عَمَّا يُشْرِكُونَ


അള്ളാഹുവെ കണക്കാക്കേണ്ട നിലയിൽ അവർ കണക്കാക്കിയിട്ടില്ല ഉയിർത്തെഴുന്നേല്പിന്റെ നാളിൽ ഭൂമി മുഴുവൻ അവന്റെ നിയന്ത്രണത്തിലായിരിക്കും ആകാശങ്ങളും അവൻ നിയന്ത്രിക്കുന്നുണ്ടാകും അവനത്രെ പരിശുദ്ധൻ.അവർ പങ്കു ചേർക്കുന്നതിനെല്ലാം അവൻ അതീതനായിരിക്കുന്നു


മുശ്‌രിക്കുകൾ അള്ളാഹുവിനെ അർഹമായി മനസ്സിലാക്കിയില്ല അത് കൊണ്ടാണ് അവനോടൊപ്പം മറ്റു പലതിനെയും അവർ ആരാധിച്ചത്.വാസ്തവത്തിൽ അവക്കും അള്ളാഹുവിനും തമ്മിൽ യാതൊരു താരതമ്യവും ഇല്ല. അവൻ സർവ ശക്തൻ, എല്ലാം അവന്റെ നിയന്ത്രണത്തിൽ. അതേ സമയം ഇവർ പറയുന്ന ദൈവങ്ങൾ ഒരു പുൽക്കൊടി പോലും സൃഷ്ടിച്ചവരോ ഉടമാവകാശമുള്ളവരോ അല്ല എന്നിരിക്കെ അള്ളാഹുവിനു നൽകുന്ന അതേ ബഹുമാനം ഈ വസ്തുക്കൾക്ക് നൽകുക വഴി അള്ളാഹുവെ പരിഹസിക്കുകയും അവമതിക്കുകയുമാണ് അവർ ചെയ്യുന്നത്. തുടർന്ന് അള്ളാഹു പറഞ്ഞ ആകാശ ഭൂമികളുടെ നിയന്ത്രണത്തെ പറ്റിയുള്ള പരാമർശനങ്ങളിൽ പിടിക്കുക,വലതു കൈ തുടങ്ങിയ ബാഹ്യാർത്ഥങ്ങൾ ആ പദങ്ങൾക്ക് പറയാവതല്ല.അതുകൊണ്ടാണ് ആകാശവും ഭൂമിയും എല്ലാം അവന്റെ നിയന്ത്രണത്തിലാണ് എന്ന അർത്ഥം നാം പറഞ്ഞത്.കാരണം അള്ളാഹുവിനെ സൃഷ്ടികളോട് തുലനം ചെയ്യുന്നതോ അവനു അവയവങ്ങൾ സ്ഥാപിക്കുന്നതോ ആയ പരാമർശനങ്ങളെല്ലാം അബദ്ധമാണ്. ഇബ്നു കസീർ رحمة الله عليهഎഴുതുന്നു ഈ സൂക്തവുമായി ബന്ധപ്പെട്ട് ധാരാളം നബി വചനങ്ങൾ വന്നിട്ടുണ്ട് ഇതിലും ഇതുപോലുള്ളവയിലും നാം സ്വീകരിക്കേണ്ട മാർഗം മുൻഗാമികളുടെ നിലപാടാണ് അത് ഖുർആനിലോ ഹദീസിലോ വന്ന പദപ്രയോഗങ്ങൾ അങ്ങനെ തന്നെ പറയുകയും അതിൽ അർത്ഥം പറഞ്ഞോ രൂപം തോന്നിപ്പിക്കും വിധമോ സംസാരിക്കാതിരിക്കുക എന്നതാണ് (ഇബ്നുകസീർ) പിൽകാലക്കാരായ പണ്ഡിതന്മാരിൽ ചിലർ അള്ളാഹുവിനു അനുയോജ്യമായ വിധം അർത്ഥം പറയാമെന്ന് പറഞ്ഞിട്ടുണ്ട് അതിന്റെ അടിസ്ഥാനത്തിലാണ് നിയന്ത്രണത്തിലാണ് തുടങ്ങിയ അർത്ഥങ്ങൾ നാം പറഞ്ഞിട്ടുള്ളത്


ഉയിർത്തെഴുന്നേല്പിന്റെ നാളിൽ ആകാശങ്ങളും ഭൂമിയും അവന്റെ നിയന്ത്രണത്തിലായിരിക്കും എന്ന് പറഞ്ഞതിൽ നിന്ന് ഇപ്പോൾ അങ്ങനെ അല്ല എന്ന് മനസ്സിലാക്കരുത്.ഇപ്പോഴും എപ്പോഴും എല്ലാം അള്ളാഹുവിന്റെ നിയന്ത്രണത്തിൽ തന്നെയാണ് എന്നാൽ അന്ത്യനാളിൽ ആ നിയന്ത്രണം വളരെ പ്രകടമായിരിക്കും ഇവിടെ ബാഹ്യമായി അത് എന്റെതാണ് ഇത് അവന്റേതാണ് എന്നിങ്ങനെ അവകാശ വാദങ്ങളുണ്ടാകും എന്നാൽ അന്ത്യനാളിൽ ആരും ഒന്നിനും അവകാശ വാദമുന്നയിക്കുകയില്ല.ആർക്കാണിന്നിന്റെ അധികാരം എന്ന് അള്ളാഹു ചോദിക്കും എല്ലാം അടക്കി ഭരിക്കുന്ന അള്ളാഹുവിനു തന്നെ എന്ന് അവൻ മറുപടിയും പറയും എന്ന് ഖുർ ആൻ അദ്ധ്യായം നാല്പത് (ഗാഫിർ) പതിനാറാം സൂക്തത്തിൽ പറഞ്ഞത് ഇവിടെ സ്മര്യമാണ്

 


(68)
وَنُفِخَ فِي الصُّورِ فَصَعِقَ مَن فِي السَّمَاوَاتِ وَمَن فِي الْأَرْضِ إِلَّا مَن شَاء اللَّهُ ثُمَّ نُفِخَ فِيهِ أُخْرَى فَإِذَا هُم قِيَامٌ يَنظُرُونَ


കാഹളത്തിൽ ഊതപ്പെടും.
അപ്പോൾ ആകാശത്തുലുള്ളവരും ഭൂമിയിലുള്ളവരും ചലനമറ്റവരായിത്തീരും. അള്ളാഹു ഉദ്ദേശിച്ചവരൊഴികെ. പിന്നീട് അതിൽ (കാഹളത്തിൽ) മറ്റൊരിക്കൽ ഊതപ്പെടും അപ്പോഴതാ അവർ എഴുന്നേറ്റ് നോക്കുന്നു


ലോകത്തിന്റെ നാശത്തോടനുബന്ധിച്ച് ഇസ്‌റാഫീൽ സൂർ എന്ന കാഹളത്തിൽ ഊതും, അപ്പോൾ അള്ളാഹു ഉദ്ദേശിച്ച ചിലർ ഒഴിച്ച് ബാക്കിയുള്ളവരെല്ലാം മരിക്കും പിന്നീട് അള്ളാഹു നേരത്തെ മരിക്കാത്തവരുടെ ആത്മാവ് പിടിക്കും അതിൽ അവസാനം മരണം കൊണ്ട് ഏല്പിക്കപ്പെട്ട മലക്കായിരിക്കും അപ്പോൾ അള്ളാഹു മാത്രം ശേഷിക്കും ഉണ്ടാവലിനു തുടക്കമില്ലാത്ത വിധം അനാദ്യനായിരുന്ന അള്ളാഹു നാശം ഒരിക്കലുമില്ലാത്ത വിധം എന്നെന്നും ശേഷിക്കുന്ന അവസ്ഥയിലായിരിക്കും എല്ലാവരും മരിച്ച ശേഷം ഒരു ഇടവേള കഴിഞ്ഞ് (ആ ഇട വേള നാല്പത് ആണ്. നാല്പത് ദിവസമോ, മാസമോ, വർഷമോ വ്യക്തമാക്കപ്പെട്ടിട്ടില്ല്ല) ഇസ്‌റാഫീൽ عليه السلا എന്ന മലക്കിനെ അള്ളാഹു ആദ്യം ജീവിപ്പിക്കും എന്നിട്ട് സൂറിൽ ഒരിക്കൽ കൂടി ഊതാൻ കല്പിക്കും അത് എല്ലാവരും പുനർജനിക്കാനുള്ള ഊത്താണ്. ആ ഊത്തോടെ എല്ലാവരും പുനർജ്ജനിക്കും മഹ്‌ശർ മൈതാനിയിൽ എല്ലാവരും ഒരുമിച്ച് കൂടും അപ്പോഴത്തെ ഭീതിയും ഭയവുമാണ് എഴുന്നേറ്റ് നോക്കുന്നു എന്ന് പറഞ്ഞത് (ഇബ്നുകസീർ)


ഇവിടെ സൂറിൽ ഊതപ്പെടുമ്പോൾ
അള്ളാഹു ഉദ്ദേശിച്ചവരൊഴികെ ചലനമറ്റവരാവും എന്ന് പറഞ്ഞത് ആരെയാണ് ഉദ്ദേശിക്കുന്നത് എന്നത് സംബന്ധമായി വിവിധ അഭിപ്രായങ്ങളുണ്ട്.ശുഹദാക്കളാണെന്നും ജിബ്‌രീൽ, മീഖാഈൽ, ഇസ്‌റാഫീൽ, عليهم الصلاة والسلام മരണം കൊണ്ട് ഏല്പിക്കപ്പെട്ട മലക്ക് (അസ്‌റാഈൽ) عليه السلامഎന്നിവരാണെന്നും അഭിപ്രായമുണ്ട്. അനസ് رضي الله عنه നബി തങ്ങളിൽ നിന്ന് ഉദ്ധരിക്കുന്നു നബി തങ്ങൾ ഈ സൂക്തം പാരായണം ചെയ്തു അപ്പോൾ ആരെയാണ് അള്ളാഹു ചലനമറ്റു പോകുന്നവരിൽ നിന്ന് ഒഴിവാക്കിയത് എന്ന് അവർ ചോദിച്ചു തങ്ങൾ പറഞ്ഞു അത് ജിബ്‌രീൽ, മീഖാഈൽ, ഇസ്‌റാഫീൽ, മലക്കുൽ മൌത്ത് عليهم الصلاة والسلامഎന്നിവരാണ്. പിന്നീട് മരണം കൊണ്ട് ഏല്പിക്കപ്പെട്ട മലക്കിനോട് അള്ളാഹു ചോദിക്കും ഇനി ആരാണ് മരിക്കാൻ ബാക്കിയുള്ളത് എന്ന് –അത് അള്ളാഹുവിനു നന്നായി അറിയാം- അപ്പോൾ മലക്ക് പറയും ജിബ്‌രീൽ, മീഖാഈൽ, ഇസ്‌റാഫീൽ عليهم الصلاة والسلامഎന്നിവരും ദുർബലനായ ഈ വിനീതനായ ദാസനും ബാക്കിയുണ്ട് എന്ന്. അപ്പോൾ ഇസ്‌റാഫീൽ, മീഖാഈൽ عليهم الصلاة والسلام എന്നിവരെ മരിപ്പിക്കാൻ അള്ളാഹു കല്പിക്കും അതിനു ശേഷം നിങ്ങൾ മരിക്കുക എന്ന് മരണത്തിന്റെ മലക്കിനോട് അള്ളാഹു പറയും. അപ്പോൾ ആ മലക്കും മരിക്കും. പിന്നീട് ജിബ്‌രീലി عليه السلامനോട് അള്ളാഹു ചോദിക്കും ഇനി ആരാണ് ബാക്കിയുള്ളത് എന്ന്.അപ്പോൾ ജിബ്‌രീൽ عليه السلامപറയും എന്നെന്നും ശേഷിക്കുന്ന നാഥനായ നീയും മരണത്തിലൂടെ നശിച്ചു പോകുന്ന ജിബ്‌രീലും عليه السلامബാക്കിയുണ്ട് എന്ന്. അപ്പോൾ ജിബ്‌രീലേ, താങ്കൾക്കും മരണം ഒഴിവാക്കാനാവില്ലല്ലോ എന്ന് അള്ളാഹു പറയും ജിബ്‌രീൽ عليه السلام ചില പ്രത്യേക വാക്യങ്ങൾ മുഖേന അള്ളാഹുവെ സ്തുതിച്ച് സുജൂദിൽ കിടന്ന് മരണപ്പെടും (ഖുർതുബി)ഏറ്റവും അവസാനം മരിക്കുന്നത് മലക്കുൽ മൌത് عليه السلامആണെനും ജിബ്‌രീൽ عليه السلامആണെന്നും അഭിപ്രായ വ്യത്യാസമുണ്ട്


അന്ത്യനാളിൽ വിജയിക്കുന്നവരിൽ
അള്ളാഹു നമ്മെ ഉൾപ്പെടുത്തട്ടെ ആമീൻ

(തുടരും)


ഇൻശാ അള്ളാഹ്